Kaahebrei 12 - Etestemente Epe ✠ 1951

ONTOPORUA 12. Oruporo ruomeehamo.

¹ Ano sho tua kondekua kotshikogo shika otshinene tsheentari, na sse uo otua ara tu ekereshi atshishe shi atshi tu cinaneke nuurunde mbu ua kakatera ku sse. Sse otua ara tu matuke nuudiginini mematuko rjokucigacana po, ndi ri nokumatakua ku sse.

² Tu tareni Jesus omutoti h’omuguanici guehiteero rjetu. Oku’umbata omutshigakano he ta dini omatsheko moru’enjanju ndi a pungurirua, ta kaatumba korurjo ruotshipangerapundi tsha Karunga.

³ Eno, diradireni ngu a humbata ondumbo ndji odigu ha zi kaarunde, ne kamu vurue kamu idinice.

⁴ Inamu tinda manka sigo okombinzi mekondjo rjeni rjokukondjica uurunde.

⁵ Omua dimbua ehekererico ndi ari popi na ne ng’aanona sho ari ti: “Mumuandje ino dina egeero rja Muene. Ino rimbirirua nge to geerua ku he.

⁶ Oshoka keshe ngoka Muene e mu ore, ote mu geere. He ta denge omunona keshe ngoka e mu tuumba.”

⁷ Ididimikeni nge tamu geerua. Karunga ota kara na ne ongashi nojana. Omunona nguno oku ri peni, ngu ita geerua ku she?

⁸ Ngeno okua mua kara kamu geerua, nanto ajeshe taa dengua, ando ne aana jomubuanda, ha aana jotshiri.

⁹ Ootate hetu hopanjama oje tu geera nde sse tua vurika ku jo. Ano inatsh’opara unene tu vurike ku She heembepo, sse tu kare nomuenjo?

¹⁰ Mbejaka oje tu geera pandunge dauo okarara okatshona. Ndere nguka ote tu geere negeero ndi ari tu kuaca okumona ejapuro rje.

¹¹ Egeero keshe orja fa kari monica enjanju pecimbo rjarjo, aaue, uupongo. Ndere okuza mpoka otari etere mboka ja putudua ku rjo otshihimati tshombiri no tshuujuki.

¹² Ano korekeni itsheue omake geni ga vurua, neengoro kadi neenkondo.

¹³ Ningeni eenkatu d’uka neempadi deni, kapu kare gumue ta shongora, nde ta puka, aaue na erudue.

¹⁴ Kongeni ombiri hajeshe nejapuro. Ngu ke ji na ita ka tara Karunga.

¹⁵ Tareni naua kapu kare gumue t’ekereshi oshenda ha Karunga, omudi omururu kagu tutume, guo tagu imbi, nde ojendji taa njatekua.

¹⁶ Kapu kare omuhonderi nenge omudini gu’uujapuki ngashi Esau ngu a randere ecigururo rjuukuruntu ue otshikurja tshimuike.

¹⁷ Oshoka omu tshi tshi nokutja okuza mpoka, sho a hara okucigurura ejambeko, okua shundurua. Ina mona erundururo rjomadiradiro nanto e ri konga nomoodi.

¹⁸ Oshoka ne inamu engena kondundu ndji ahi vuru okupampadarua, komuriro gua sama, kiikogo iiruude, keemrema no kotshikunguru.

¹⁹ Konkugo heembendo, keehapu d’uvika kokurekure, pu do aapuakeni oj’indirire kapu popiue ue otshingi na jo.

²⁰ Oshoka oja njengua okupuakena shoka tsha tiua: “Na nge ku notshimuna ike atshi njenge ondundu, otshi nokudipagua nomamanja.”

²¹ Eno emoniko ndika orja ri etirici unene. Moses muene okua ti: “Ngaje onda anduka, ngaje te kekama.”

²² Aaue, one omua engena kondundu Sion, kotshirando tsha Karunga omunamuenjo, ku Jerusalem homeguru, kongundu haajengeli homajovi ogendji.

²³ Kegongaro rjaatango, ja tshangerua meguru, ku Karunga omupanguri guajeshe, keembepo daajuki ja guana ja pua.

²⁴ No ku Jesus, h’omujakuri gueguaneno epe, ketshatshamino nombinzi he, ndji ahi popi naua, hi vure ndjija ha Abel.

²⁵ Kotokeni naua kamu dine ngu ta popi. Oshoka mbejaka ja dina, nge kua ja njengua okujepa egeero, ano unene na sse nge atu dini ngu ta popi meguru.

²⁶ Eui rje orja kekamicire nare evi. Ndere nena eehapu domarombuerero adi ti: “Rumue itshee onda ara okukekamica ha evi ike, aaue, neguru uo.”

²⁷ Neehapu doka: rumue itsheue, ot’orora nokutja shoka atshi vuru okukekamicua oshoka otshitshitua, otatshi ka tshitururua, opo pu kare shoka itatshi vuru okukekamicua.

²⁸ Ano sho tatu peua uukuaniirua mbu itau vuru okukekamicua, sse otua ara kupandura noku karera Karunga noku mu njanjuda netiro nomasimaneko.

²⁹ Oshoka Karunga ketu ohe omuriro hagu rungunica.