Kaahebrei 11 - Etestemente Epe ✠ 1951

ONTOPORUA 11. Iihorerua jehiteero rja kora.

¹ Ehiteero orjo ehinekero rja kora mu mbika tua tegerera, rjo okutuumba ng’otshiri shoka itatshi monikua.

² Rjo orjo rja monica aakuruntu jonare ehokororo ehanaua.

³ Moru’ehiteero sse otua dimburura nokutja uujuni oua tshitua nohapu ha Karunga, opo sho tshi uetikue tshi ze mo mu shoka katshi uetikue.

⁴ Meenkondo dehiteero Abel okua ningire Karunga oshura ndji hi vure ndija ha Kain. Rjo rje mu monica ehokororo rjuujuki ndi Karunga e mu okororera moru’omagano ge. Mu rjo ota popi nanena nanto a sa.

⁵ Meenkondo dehiteero Henok okua kucua ka adikue keso. Ina monikua ue, oshoka Karunga e mu kuca po. Sho a ri ina kucua oku’okororua nokutja okue mu panda.

⁶ Ngoka ke nehiteero ita vuru okupandikua ku Karunga. Oshoka keshe ngu a hara okuha ku Karunga, oku nokuiteera nokutja oko e ri, nde ta pe ondjambi mba taje mu kongo.

⁷ Meenkondo dehiteero Noe okua tunga metiro etembameja kehupico rjaangandje, ngija a hororerua shoka inatshi monikua manka. Mehiteero rje okua pangura uujuni nokua ningi omucigururi gu’uujuki, mbu au zi mehiteero.

⁸ Meenkondo dehiteero Abraham okua vurika, nde ta tembukire kotshirongo, tsh’ucua tshi ninge uuciga ue. Okua tembuka ina tshiua hoka ta ka ha.

⁹ Meenkondo dehiteero okua kara motshirongo tshomarombuerero a f’omukuiirongo. Okua kara arushe momatsari puamue na Isak na Jakob, jo aacigururi jomarombuerero puamue na he.

¹⁰ Oshoka okua tegerera otshirando tsha dikua neenkondo, omutungi h’omutshiti guatsho oKarunga.

¹¹ Omeenkondo dehiteero, Sara ngu omuceta a mon’eenkondo dokuninga hina nanto a kurupa, oshoka a hinekera ngoka e mu pa erombuerero.

¹² Otsho mua tutumina momurumentu gumue, ngu a ri a kurupa, oruvaro ndu ru vure eenjoci dokeguru, karu tshi kujarurua ngashi ehekevi rjokomukunkuro guefuta.

¹³ Oja si ajeshe mehiteero, inaa tuumba uuhanaua mbu ua rombuererua. Oje u tara kokure noku u kunda no j’epurura nokutja ojo aahendi naakuiirongo kombanda hevi ndika.

¹⁴ Mba haa popi ngaano ohaa horora nokutja ohaa kongo manka otshirongo tshaandjauo.

¹⁵ Ngeno okua ja diradira shija ja zire, ando ja mon’erara rjokutshuna ko.

¹⁶ Ndere oja aruka otshirongo tshi vure shijaka, shoka tshomeguru. Otsho Karunga ina tinda okuiruka Karunga kauo, oshoka okue ja tungira otshirando.

¹⁷ Mehiteero rje Abraham okua gandja Isak ng’oshura, sho a makerua. Ohe a peua omarombuerero ta gandja epona rje.

¹⁸ H’ohe a rombuerua: “Omu Isak tamu zi oruvaro ruohe.”

¹⁹ Okua diradira nokutja Karunga oku na eenkondo doku mu jumuda kuusi. Tsh’otsho e mu garurirua ng’otsheerekera.

²⁰ Mehiteero rjomiinima jokomesho Isak okua jambeka Jakob na Esau.

²¹ Mehiteero Jakob okua jambeka mokusa kue aanona jaari ja Josef nokua garikana a hitsira koruoondje rue.

²² Mehiteero Josef okua dimburukua mokusa kue etembu rjaana ja Israel nokue ja rombuere eehapu da tsa pomasipa ge.

²³ Mehiteero Moses sho a varua oku’orekua kaakuruntu je eemuedi ndatu, oshoka oja mona okanona ka ri k’opara. Inaa tira otshipango tshomukuaniirua.

²⁴ Mehiteero Moses sho a kokere, ina ara kutarua ng’omuna guomona omukadona gua Farao.

²⁵ Okua arere kukara puamue notshiguana tsha Karunga momeepeko, nde ta dini enjanju rjuurunde ndi ari shuru po nzija.

²⁶ Mokutshekua kua Kristus okua dimburura eriko enene ri vure uujamba ua Egipti, oshoka okua tara kondjambi.

²⁷ Omeenkondo dehiteero a cigi po Egipti, ina tira ondjashi homukuaniirua. A gama ku ngoka ke uetikue a fa e mu tara.

²⁸ Mehiteero oku’uharera efeste rja Paska negogo rjombinzi opo omudipagi guiitsheeri ke ji njenge.

²⁹ Meenkondo dehiteero oja tokora efuta etirigane ngashi evi ekukutu. Aaegipti oje tshi erekera uo no ja ninagurua.

³⁰ Omeenkondo dehiteero omakuma ga Jeriko ga kumuka po, ngija je ga kunkura omasiku uunuari.

³¹ Omeenkondo dehiteero Rahab omubuanda ina sa puamue na mboka kaa nehiteero, oshoka a hedirire eendadi nombiri.

³² Nandi guede ko tshike keehapu dandje? Erara inari guana oku mu okororera Gedeon, Barak, Samson, Jefte, David, Samuel naaprofeti.

³³ Meenkondo dehiteero oja sinda iirongo jaakuaniirua, oj’uca uujuki, ja tuumba omarombuerero, ja citika omakana geenkoshi.

³⁴ Oja dima eenkondo domuriro, j’ijakere omeego gomuere, ja ningi aanankondo muunkundi uauo, ja ninga eefure mekondjo no ja tida eengundu daakuiita jaakuiirongo.

³⁵ Aakiintu oja garurirua aasi jauo kejumukico. Jarue oj’epekua nomeepeko omadigudigu. Ndere kaa harere kumangururua, opo ja ka mone ejumuko ehanaua unene.

³⁶ Jamue oj’ididimika mokutshekua no mokudengua, meemango no meendrongo.

³⁷ Oja dengua nomamanja, ja tetagurua notshisaha, ja makerua, ja dipagua neemuere, ja endagura ja ri ja zara eenguuo deenzi niipa jiikombo, ja mon’orueepo, ja cinanekua jo ja ningirua neji.

³⁸ Uujuni inau kara ua opara oku kara na jo. Oj’endahenda neembuga neendundu momakuena no meembogo devi.

³⁹ Mboka ajeshe nanto ja ri aahokorori jehiteero, inaa mona eguanico rjomarombuerero,

⁴⁰ oshoka Karunga okue tu rongere otshaanaua tshi vure shijaka. Ndere mbejaka ja mone ike eguanico puamue na sse.