Kaahebrei 10 - Etestemente Epe ✠ 1951

ONTOPORUA 10. Oshura hotshiri.

¹ Mompango omu na ike omuzizimbe gu’uuhanaua uokomesho, ha ecano rjotshiri rjiinima mbi. Otsho itahi vuru neeshura di adi ningua arushe keshe omuvo okugandja uujuki ku mbo haa ningi oshura.

² Ngeno okua ha vura, ando ja zimbuka okuninga oshura, oshoka mboka ja jerekua tshiri, kaa hihuvitire ue ng’aarunde.

³ Adi ningururua kedimburuco rjeendjo keshe omuvo.

⁴ Ombinzi heentsezi no hiikombo itahi vuru okudima eendjo.

⁵ Opo a zi okupopja pejo rje muujuni ta ti: “Ino ara eeshura nomagano, aaue, orutu ua tshitandje.

⁶ Eeshura defiko neeshura deendjo ino di panda.

⁷ Otsho nda tire: Tara andi ja okuguanica eharo rjohe, Karunga, ngashi nda tshangerua membo.”

⁸ Tango okua tire: Eeshura nomagano, neeshura defiko neeshura deendjo ino di ara, ino panda shoka atshi gandjua keharo rjompango.

⁹ He ta ti itsheue: Tara andi ja okuguanica eharo rjohe, Karunga. Ano ota shurica shoka tshotango, opo a ture po shoka otshitijari.

¹⁰ Okeharo ndika sse tua japurua moru’oshura horutu rua Jesus Kristus sigo arushe.

¹¹ Omupristeri keshe ta cikama po keshe uuna miironga je iijapuki nokuniga orundji eeshura doka, di itadi vuru okukuca po eendjo.

¹² Ndere ohe tuu nguka ngija a ningire eendjo oshura himuike, ota kaatumba sigoosigo korurjo rua Karunga.

¹³ Ta tegerere ike aatondi je ja ninge otshipundi tshokeempadi de.

¹⁴ Noshura ndjika himuike okua guanica sigo arushe mbo ja ara okujapurua.

¹⁵ Shoka tsh’okororua uo k’Ombepo Ondjapuki, oshoka, sho a tire:

¹⁶ “Eguaneno orjo ndika nda ara ku ri ninga na jo” Muene ta ti: “Iipango jandje onda ara oku ji tura momadiradiro gauo, noku ji tshangera meemuenjo dauo.

¹⁷ Ite dimburukua ue eendjo nomajonaguro gauo.”

¹⁸ Ndere onga, nge oga dimua po, itapu pumbiua ue oshura moru’eendjo.

¹⁹ Ano jamuameme, ss’otu nehinekero rja kora tu he muujapuki u’uujapuki moru’eenkondo dombinzi ha Kristus.

²⁰ Okue tu rongera ondjira ompe, hi nomuenjo, tahi pitire metoporico, okutja omonjama he.

²¹ Otu nomupristeri omunene, ta rere ondjugo ha Karunga.

²² Tu engeneni ano neemuenjo kadi niirombo, nehiteero rja kora, oshoka eemtima detu oda kucirue kehihuvo rjuuhineji, ruo orutu ruetu rua koshua nomeja ga jera.

²³ Inatu ara okutengatenga mokudiginina ehepururo rjetegerero rjetu, oshoka omudiginini ongu e tu pa omarombuerero.

²⁴ Otua ara okukembadara tu kumagidacane kohore no kiironga iihanaua.

²⁵ Katu ece egongaro rjetu ngashi jamue haa ningi, aaue, otu kumagidacane, uneenene sho tamu mono nokutja esiku ori ri popepi.

²⁶ Oshoka nge atu jono neharo rjetu arishe, nanto tua mona etshiuo rjotshiri, nena kapu na ue oshura moru’eendjo detu.

²⁷ Aaue, epanguro etirici ari tu tegerere, nomuriro gua geja tagu mana po aanandumbo.

²⁸ Nge ku na gumue a dina ompango ha Moses, he oku nokusa nge opu neentari mbari nenge ndatu. Ita sirua oshenda.

²⁹ Ndere uudigu uegeero ou cike peni mbu u’irongerua ku ngu a rjata neempadi Omumua Karunga, a dina ombinzi heguaneno ndji he mu japura, nokua njana Ombepo hoshenda?

³⁰ Oshoka otu tshi ngu a tire: “Egeero orjandje, ongaje tandi ka geera.” Na itsheue: “Muene ota ka pangura otshiguana tshe.”

³¹ Iishuna jouara okugua momake ga Karunga omunamuenjo.

³² Dimburukueni omasiku gonare, sho mua minikirua, nde ne mu’ididimike momakondjico omadigu gomeepeko.

³³ Esiku rimue omua ri po miipaci jaantu mua tshekua ne mua epekua. Rimue mua ri aakuauo ja mboka ja adikua uo ku mbika.

³⁴ Oshoka omua ri mu uvitire aakuatua omeehamo, ne mua kara mua njanjukua iinima jeni sho mue ji jekua, oshoka omu tshi nokutja omu nuujamba mbu u vure iinima mbi, mbu au kara arushe.

³⁵ Ano, inamu kanica ehinekero rjeni ndi ari mu monica ondjambi onene.

³⁶ Omua pumbua ehididimiko mu guanice eharo rja Karunga, opo mu peue shoka mua rombuererua.

³⁷ Oshoka okacimbo okatshona kouara “nde te ke ja ngoka e nokuja, ita kara ko.

³⁸ Omujuki guandje ota mon’omuenjo mehiteero. Nge ta tshuna monima, omuenjo guandje itagu mu okua.”

³⁹ Ndere sse katu shi aana mba haa tshuna monima, aaue omboka jehiteero kerikoro rjomuenjo.