Kaahebrei 1 - Etestemente Epe ✠ 1951

ONTOPORUA 1. “Kristus e vure aajengeli”

¹ Orundji no meendjira odindji Karunga a popja nootate mokana kaaprofeti.

² Peshuriro rjomasiku ngano okua popja ku sse m’Omona gue ngu a turua po omucigururi guajishe, e mu tshitica uo uujuni.

³ Ohe ehadimo rjuujerere ue, h’otshifeca tshuukarunga ue. Meenkondo dohapu he ot’umbata atshishe. Okua eta ekuriro kuurunde he ta kaatumba korurjo ru’Omusimanekua muure uomombandabanda.

⁴ Ta tundua unene e vure aajengeli ongashi a cigurura edina ri vure gauo.

⁵ Omujengeli oguni a rombuerua ku Karunga: “Ngueje omumuandje onena ndjika onde ku vara”? Nenge: “Ngaje otandi ningi she, he ta ningi omumuandje.”

⁶ Nge ta fara otsheeri muujuni ota ti: “Aajengeli ajeshe ja Karunga naje mu amberere.”

⁷ Kaajengeli ota ti: “Aajengeli je ote ja ningi eembepo, aakareri je omaraka gomuriro”.

⁸ K’Omona ta ti: “Otshipundi tshohe, Karunga, atshi kara po arusherushe, rjo epangerodimbo rjuujuki orjo epangerodimbo rjotsirongo tshohe.

⁹ Ou ore uujuki, no u tonde uuhineji. Otsho Karunga, Karunga kohe e ku guajekera nomagadi genjanju u vure jakueni.”

¹⁰ Ko taku tiua: “Ngueje Muene evi oue ri dika okuza koshimbi, nde rjo eguru iironga jomake gohe.

¹¹ Go otaga shuru po, ndere ngueje oto karerere, go ageshe taga kurupa ng’eenguuo.

¹² Oto ga rundurura ngashika onguuo, nde go taga runduruka. Ndere ngueje oto kara po ng’arushe. Do eemvo dohe itadi shuru po.”

¹³ Oguni guomaajengeli a rombuerua ku he: “Kaatumba korurjo ruandje sigo onda ningi aatondi johe otshipundi tsheempadi dohe.”

¹⁴ Mboka ajeshe kaa shi eembepo dejakuro, ja tumua okukarera mboka j’ucirua okucigurura erago?