Kaafilippi 4 - Etestemente Epe ✠ 1951

ONTOPORUA 4. Omakumagido nomapanduro

¹ Jamuameme, aahorike, noonakujeerukua, one enjanju rjandje nondjambi handje, kareni mua cikama meenkondo mu Muene.

² Andi kumagida Evodia ngaje t’indire Sintike, ja kare ja tsompango himue mu Muene.

³ Nangueje uo, mukuetu omudiginini, otii ku indire u ja kuace, oshoka oj’ipjakidira evangelium puamue nangaje no na Klemens, no naakuaci jandje jakuauo. Omadina gauo oga tshangua membo rjomuenjo.

⁴ Njanjukueni arushe mu Muene. Ote ti itsheue: njanjukueni.

⁵ Ondjeerera heni nahi tshiuike kaantu ajeshe. Muene oku ri popepi.

⁶ Inamu kara notshisho tsha tsha, aaue, eempumbue deni di fareni ku Karunga momagarikano no momiindiro no momaamberero.

⁷ Ndere ombiri ha Karunga ndji hi vure eendunge adishe, ho hi gamene eemuenjo deni nomadiradiro geni mu Kristus Jesus.

⁸ Tshi romborua jamuameme, diradireni meemuenjo deni atshishe tshi notshiri, sho tsh’opara, sho tsh’uka, sho tshi nuujapuki, sho tsh’oparera ohore, sho tshi nokusimanekua, sho tsha f’omukaro omuhanaua, nenge shoka tshi nokupandikua.

⁹ Ndere ningeni shoka mua rongua, mua tuumba mua uva ne mua mona mungaje. Nde Karunga kombiri ta kara na ne.

¹⁰ Enjanju rjandje orja ri enene mu Muene, oshoka mua joroka, nde tamu vuru okukuacandje. Omua sirandje otshisho arushe, ndere okua mua njengua.

¹¹ Itandi popi doka moru’orueepo ruandje, aaue, onda rongua nare okuguana na mbjoka ndi na.

¹² Ote vuru okuuharera muucigona no muujamba. Ond’igirira okukara akushe no miinima ajishe, okutja okukara nda kuta nenge okus’ondjara, okukara neroro nenge okuididimika meendjepo.

¹³ Ote vuru atshishe mu ngoka ta korekendje.

¹⁴ Ndere omua ninga naua tshiri, sho mua kuacandje muudigu uandje.

¹⁵ Omu tshi tshi uo, jafilippi, sho nda tameka okuuvica evangelium, nda zi ku Makedonia, kakua ri egongaro rirue rja guanekua nangaje nomukaro guokugandjacana, oniike ngaa.

¹⁶ No ku Tessaloniki uo ne omua tuminandje, shoka nda pumbua, rumue nenge ruaari.

¹⁷ Kari shi egano rjo rjene te kongo, aaue, onda kembadara okurikora oundji no koruporo rueni.

¹⁸ Shoka ndi na otsha guana, tsha guanenena. Onda f’omujamba hera tuu nda peua ku Epafroditus, shoka mua tuminandje, tsho otshizimba otshaanaua, egano rjopara, rja pandikua ku Karunga.

¹⁹ Kuujamba ue Karunga kandje na guanice nauerera mu Kristus Jesus omiindiro geni ageshe.

²⁰ Ndere Karunga Tate hetu na simanekue arusherushe.

²¹ Otamu kundu omujapuki keshe guomu Kristus Jesus.

²² Aamuameme ajeshe, mba je ri pungaje, taje mu kundire po. Aajapuki ajeshe otaje mu kundu, unene mboka jomombara homukuaniirua.

²³ Oshenda ha Muene guetu Jesus Kristus nahi kare nomuenjo gueni Amen.