Kaafilippi 1 - Etestemente Epe ✠ 1951

ONTOPORUA 1. Ekundico

¹ Paulus na Timoteus, aapija ja Jesus Kristus, kaajapuki ajeshe jomu Filippi nokaaepiskopi no kaadiakoni.

² Oshenda nombiri ha Karunga Tate no ha Muene guetu Jesus Kristus nahi kare puamue nane.

³ Arushe nge nde mu dimburukua, ngaje ote pandura Karunga.

⁴ Ohandi mu garikanene amushe nenjanju momagarikano gandje ageshe.

⁵ Oshoka ne omua tuumba ne mu’iteera evangelium rja Kristus okuza kesiku rjotango sigo onena.

⁶ Ond’itura kutja ngoka a shimbike otshironga otshaanaua mune, ohe te tshi guanica uo sigo okesiku rja Kristus Jesus.

⁷ Nde tsho otsh’uka tuu ndi kare noku mu diradira ngii amushe, oshoka ne amushe omu ri momutima guandje, ngashi mua njanjukua puamue nangaje no momapando gandje no pokupopira no pokukoreka evangelium.

⁸ Karunga ohe ontari handje, nokutja onde mu jeerukua nohore ngashi Jesus Kristus e mu ore.

⁹ Ngaje andi garikana, ohore heni hi koke mokutshiua no meendunge deni adishe.

¹⁰ Ne mu ogorore shoka tsh’ukirira opo mu kare po mesiku rja Kristus mua jera kamu nokapogodidi.

¹¹ Mu’uda iihimati juujuki, j’imicua ku Jesus Kristus kesimaneko no kehamberero rja Karunga.

¹² Jamuameme onda ara ndi mu tshiuicire nokutja shoka tsh’adandje otsha ri koruporo ruevangelium.

¹³ Otsha tshiuika paantu jombara no pu ajeshe nokutja ngaje ondi ri momapando morua Kristus.

¹⁴ Go ga tura ehinekero maamuameme jamue mu Muene, ge ja ts’omukumo okuuvica ohapu ha Karunga, inaa tira.

¹⁵ Tshiri, jamue ohaa huvica Kristus mokasheshe no muukodi, ndere jamue onomuenjo gu’uka.

¹⁶ Jamue ohaa huvica Kristus mohore hotshiri, oshoka oje tshi ngaje onda turua po kepopiro rjevangelium.

¹⁷ Jamue ohaa huvica Kristus mondumbo, kaa neharo ehanaua, taa kembadara okuninga omapando gandje omadigudigu.

¹⁸ Ndere kapu nambudi. Otsha guana Kristus nge t’uvicua nomadiradiro gondumbo nenge neharo ehanaua. Otaku njanjudandje, kuo taku ka njanjudandje uo komesho.

¹⁹ Ondi tshi, shoka atshi oparere ehupico rjandje moru’omagarikano geni no moru’ekuaco rj’Ombepo ha Jesus Kristus.

²⁰ Ondi nejeeeruko netegerero ngaje kandi gugicue nande nande, aaue, ondi nehinekero rja korerera nokutja ng’arushe otsho nanena Kristus ta simanekua morutu ruandje, nge ndi nomuenjo nenge nge te si.

²¹ Oshoka Kristus ohe omuenjo guandje. Okusa okuo kungaje erikoro.

²² Tshiri okukara kuandje morutu, nge taku oparere iihimati jiironga jandje, ngaje hi tshi, shi tshi nokuogororua otshini po.

²³ Otsho andi ciminikua keembinga mbari. Onda jeerukua oku ha ndi kare pu Kristus. Shoka otsh’opara tshi vure otshikuauo.

²⁴ Ndere morueni ondi nokukara manka monjama.

²⁵ Na shoka ondi tshi tshi nehinekero kutja te kara po, te kara pu ne amushe, ne mu koke mu njanjukirue ehiteero.

²⁶ Erigoro rjeni mu Kristus Jesus moruandje ri ninge eneenene nge nde ja ku ne.

²⁷ Kareni ouara neendjenda di adi oparere evangelium rja Kristus, opo ndi tare nge nde ja, nenge ndi uve, nge ndi ri kokure nokutja omua kora mombepo himue, mua tsompango himue mokukondjera puamue nangaje ehiteero rjevangelium.

²⁸ Nokutja aanandumbo inaje mu tirica. Shoka otsho edidiriko rjekano rjauo no rjehupico rjeni. Edidiriko ndika ari zi ku Karunga.

²⁹ Oshoka inamu ucirua okuiteera ike Kristus, aaue, oku mu epekerua uo.

³⁰ Na ne uo omu nokukondja ekondjo ndi mua mona pungaje ne mue ri uva ndi ri na ngashingika.