Kaaefesi 6 - Etestemente Epe ✠ 1951

ONTOPORUA 6. Omakumagido

¹ Janona vurikeni kaakuruntu jeni mu Muene, tsh’otsho tsh’uka.

² “Simaneka sho na njoko” shoka otshipango tshotango, shi tshi nerombuerero:

³ “U kare naua nomuenjo omure kombanda hevi.”

⁴ Ooshe ne, inamu gejica neji aanona jeni, aaue, ja putudeni metiro no merongo rja Muene.

⁵ Japija ne, vurikeni koojene jeni jopevi ndika nokutira nokukekama nomuenjo gu’uka, ngashi ku Kristus.

⁶ Inamu tara ike piironga jeni omesho gaantu, ne mu pandikue ku jo. Kareni aapija ja Kristus mba haa guanica eharo rja Karunga nomuenjo agushe.

⁷ Rongeni nenjanju ngashi mboka haa rongere Muene, ha aantu.

⁸ Omu tshi tshi naua nokutja keshe ngu ha rongo uuhanaua, ota peua ku Muene ondjambi he, ohe omupija nenge omuvarua.

⁹ Na ne oojene, ja ningireni uo ngaano. Inamu ja tirica neji. Omu tshi tshi nokutja Muene guauo ogueni uo ngu e ri meguru. Ita joorora aantu korupe ruauo.

¹⁰ No pu mbi, jamuameme, kareni mua korerera mu Muene meekondo de eenene.

¹¹ Ihomatekeni iiruico ja Karunga, kamu sindue komarangero gomusatana.

¹² Katu kondjica onjama nombinzi ike. Sse otu nokuruica oojene naanankondo naapangeri juujuni mbu ueemrema, neembepo duumbudi dokoshi heguru.

¹³ Akaneni ano iiruico ja Karunga, ne mu kare neenkondo dokutinda esiku ehineji, nokuididimika mu ajishe inamu tengatenga.

¹⁴ Kareni nduno ocika, mu’imangereka otshiri meembuetero, ne mua zara eenguuo diiheera duujuki.

¹⁵ Kareni mua zarekua keempadi deni nehirongekido rjokuuvica evangelium rjombiri.

¹⁶ Ndere unene kuateni otshikandekico tshehiteero okudima na tsho iikuti ajishe jomutondi, mbi ja f’omuriro.

¹⁷ Kuceni embare rjotsheera rjehupico, negongamuere rjombepo, okutja ohapu ha Karunga.

¹⁸ Garikaneni arushe mombepo nomagarikano nomiindiro ageshe, taatareni nokugarikanena nuudiginini aajapuki.

¹⁹ Garikaneniindje uo, ndi peue ohapu ha tsa nge te hekama okana, ndi uvice nehinekero otshoorekua tshevangelium.

²⁰ Ngaje omutumua guarjo nanto ndi ri momapando, ndi ri uvice nuuradi, ngashi otshipango tshandje tshe tshi ara.

²¹ Ndere ne mu tshiue naua okuuharera kuandje niironga jandje, otamu k’okororerua ku Tishikus, h’omumuameme omuhorike, h’omupija omudiginini mu Muene.

²² Andi mu tumu ku ne, opo mu tshiue naua shoka tsha tsa pu sse, he a hekererice eemuenjo deni.

²³ Ombiri nahi kare naamuameme, ohore nehiteero mu Karunga Tate no mu Muene Jesus Kristus.

²⁴ Oshenda nahi kare najeshe, mba je ore nuudiginini Muene guetu Jesus Kristus. Amen.