Kaaefesi 4 - Etestemente Epe ✠ 1951

ONTOPORUA 4. Aakriste ajeshe ja f’orutu rumue mu Kristus

¹ Ano ngaje omumangua morua Muene andi mu indire, kareni neendjenda di adi oparere ehicano ndi mu’icanua.

² Ehitshonopeko neengungumano nonteni hi kare mune. Ididimikiracaneni mohore.

³ Kembadareni ombepo himue hi kare mokati keni nokukaracana nombiri.

⁴ Oshoka ne orutu rumue, nombepo himue, ongashi mu’icanenua uo ketegerero rimue.

⁵ Muene gumue, ehiteero rimue, etshatsho rimue.

⁶ Karunga gumue, he She hajeshe, ngu e ri po kombanda hajeshe, ha rongica ajeshe, e ri mu ajeshe.

⁷ Ndere keshe tuu mokati ketu okua peua oshenda ngashi e hi erekerua ku Kristus.

⁸ Ngashi kua tirue: “Okua rondo ta hi kombanda. Ta kuca na he aakuatua, nde ta pe aantu omagano ge.”

⁹ Ndere okuronda huka itaku orora nani nokutja a kuruka tango momasiru gevi?

¹⁰ Ngu a kuruka, ohe ngaa ngoka a ronda kombanda heguru arishe, opo a hude atshishe.

¹¹ Tsh’otsho a hucira jamue ja ninge aapostoli, jamue ja ninge aaprofeti, jakuauo itshee ja ninge aahuvici jevangelium, nenge aasita naarongi.

¹² Jo ja turua po keputudo rjaajapuki meguanico rjejakuro rjauo, ketungo rjorutu rua Kristus.

¹³ Sigo ss’atusheni otua ada eguaneno rjehiteero rimue, etshiuo rj’Omumua Karunga, tua ninga aarumentuerera, tua koka muukoke ua Kristus.

¹⁴ Sse katu kare ue aanona, mba taa tengatengicua kombepo keshe herongo rjontumba no rjongandi, taa teraganicua kiikengerera jaantu, kiiherekera ja kotoka mbi aji fara mepuko.

¹⁵ Aaue, sse otua ara okugama kotshiri mohore, nokukoka apeshe mu he, ohe ngoka ngu omutse, oKristus.

¹⁶ Okuza ku he, orutu arushe aru turua kumue, nde aru pamekua nekuaco rjotshironga tshotshikuarutu keshe, shi tshi cike peenkondo datsho. Otsho orutu aru koko ndongo orua tungua rua pama mohore.

¹⁷ Shika andi popi ano noku mu indiririra mu Muene. Inamu enda ue mua f’aapagani, mba haa hende nomuenjo gua pirarara.

¹⁸ Eendunge dauo odi ri meemrema. Oje ri kokure nomuenjo guomu Karunga moru’uusama uomeni rjauo no moru’uuposi ueemuenjo dauo.

¹⁹ Mekano rjauo jo oj’iteera uuharu uonjama nokuninga eendjo adishe doshoni, inaa kuta.

²⁰ Ndere ne inamu mona Kristus mondjira ndjika,

²¹ nge mue mu uva ne mue mu rongua ngashi tshoparera otshiri ndji hi ri mu Jesus.

²² Moru’eendjenda deni donare omu nokuishura omuntu omukuru ngu ta jonua po kuuharu uiirombo.

²³ Itshiturureni mombepo hokeemuenjo deni.

²⁴ Zareni omuntu omupe, ngu a tshitua a fe Karunga muujuki no muujapuki uotshiri.

²⁵ Otsho nduno, eceni iirombo, popjeni eehapu dotshiri keshe ngaa na mukuauo, oshoka osse iikuarutu mokukaracana.

²⁶ Nge tamu geje, inamu jona. Ondjashi heni hi kare ha dimua etango nge ari ningine.

²⁷ Inamu pa omusatana eshara.

²⁸ Omufuci ka jake ue, aaue, na ronge. Niironga jomake ge n’irongere eriko ehanaua, opo a kare e na tsha tshokukuaca ngu a hepa.

²⁹ Mokana keni kamu ze ohapu ombuineji, aaue, odoka adi koreke mehiteero, di adi oparere ehupico rja mukueni.

³⁰ Inamu nikic’Ombepo Ondjapuki uupongo. Omu nedidiriko rja ho sigo okesiku rjekuriro.

³¹ Uururu negejo nondjashi nombujagano nomatukane naga kucue mo mokati keni kumue nuumbudi aushe.

³² Karacaneni mondjeerera no mesiroshenda nokudiminacana po eendjo ngashi Karunga e mu dimina po uo mu Kristus.