Kaaefesi 3 - Etestemente Epe ✠ 1951

ONTOPORUA 3. Esimano rjomuapostoli

¹ Opo ngaje Paulus nda zi okuninga omumangua gua Kristus Jesus koruporo rueni ne japagani.

² Ndi tshi omua uva nare iironga joshenda ha Karunga, ndji nda peua morueni.

³ Memoniko ngaje ond’ororerua otshoorekua shi nde mu tshangera pombanda neehapu eentshona.

⁴ Nge tamu di lesha, otamu vuru okudimburura etshiuo rjandje motshoorekua tsha Kristus.

⁵ Shoka inatsh’ororerua aana jaantu momacimbo garue gonare, ngashi tsh’ororerua nena aapostoli je aajapuki naaprofeti k’Ombepo.

⁶ Nokutja aapagani mu Kristus Jesus ojo aacigururi, aakuanegongaro, haa mon’oruporo momarombuerero moru’evangelium.

⁷ Onda ninga omupija guarjo meenkondo doshenda ha Karunga, ndji nda peua keharo rjepangero rje.

⁸ Nde ngaje, ngu ndi vurike kaajapuki ajeshe, nda peua oshenda hokuuvica mokati kaapagani uujamba ua Kristus, mbu itau konakonua,

⁹ hokufaturura naanaa eguanico rjotshoorekua, tsha ri tsh’orama okuza komacimbo garushe mu Karunga h’omutshiti guiinima ajishe.

¹⁰ Omapangero nomanankondo gomeguru naa tshiuicirue keklesia uunongo oundjiundji ua Karunga.

¹¹ Otsho ehuco rjarushe rjeharo rje, e ri guanica mu Kristus Jesus Muene guetu.

¹² Mu he tu nomukumo, ompito nehinekero moru’ehiteero rjetu mu he.

¹³ Otsho ngaje andi mu indirire, kamu rimbirirue moru’uudigu uandje, mbu te mu umbatere, ouo esimano rjeni.

¹⁴ Otsho ngaje andi tsire eengoro ku Karunga, She ha Muene guetu Jesus Kristus.

¹⁵ Ngu omazimo ageshe gomeguru no kombanda hevi ge mu rukirua.

¹⁶ He e mu pe eenkondo kuujamba uehadimo rje, ne mu korekue momuntu guomeni k’Ombepo he.

¹⁷ Kristus, opo a kare meemuenjo deni moru’ehiteero, ne mua tsama mua dikika mohore.

¹⁸ Opo mu vure okunongera puamue naajapuki ajeshe uumbuaragandja nuure, uure uopombanda nuure uomoshi.

¹⁹ Ne mu vure okudidirika ohore ha Kristus ndji hi vure omadiradiro ageshe geendunge detu, ne mua udirira Karunga.

²⁰ Ndere ohe ngu ta vuru oku tu ningira oundjiundji mbu u vure omiindiro nomadiradiro getu moru’eenkondo doka adi rongo musse.

²¹ Ohe na simanekue meklesia no mu Kristus Jesus komarudi nomarudi, arushe sigo arushe Amen.