Kaaefesi 2 - Etestemente Epe ✠ 1951

ONTOPORUA 2. Esimano rjomukriste

¹ Ne mua ri mua sa muurunde no momajonaguro geni.

² Moka mua njanganjanga nare komukaro gu’uujuni no keharo rjomupangeri ngu e neenkondo motshirongo tshomuku, rj’ombepo ndji ahi rongo maana jeshumo.

³ Mokati ka mboka nasse uo tu’endaenda muuharu uetu uonjama. Otua guanica shoka tsha arikua korutu no kuuharu, nde tua ri aana jondjashi okuza ketshito rjetu, ongashi jarue ajeshe.

⁴ Karunga kesiroshenda eneenene, mohore he hoku tu ora,

⁵ he e tu pa omuenjo puamue na Kristus, sse mba tua ri tua sira muurunde. Oshenda he ohe mu upica.

⁶ Mu Jesus e tu jumuda noku tu pa omukaro motshirongo tsheguru.

⁷ Otsho a hara okuorora ehudo enene rjuujamba uoshenda he momacimbo ageshe gokomesho mondjeerera he, ndji e hi tu ningira mu Kristus Jesus.

⁸ Moru’oshenda no meenkondo dehiteero ne mu’upicua. Rjo kari shi otshironga tsheni, aaue, egano rja Karunga.

⁹ Ha moru’iironga, opo kapu kare gumue t’itangere.

¹⁰ Oshoka osse otshironga tshe, tua tshitirua mu Kristus Jesus, tu kare niironga iihanaua, Karunga e ji rongekida, sse tu ji ronge.

¹¹ Omorua shi dimburukueni: Omua ri nare aapagani panjama. Otsho mua rukua aantu mba inaa fukarekua ku mboka kua ja fukarekua monjama nomake.

¹² Merara ndika ne mua ri mua topoka na Kristus. Inamu jarurua maana jotshiguana Israel. Omaguaneno inaga tsa pu ne. Kamua ri netegerero nomarombuerero. Mua ri kamu na Karunga muujuni mbuka.

¹³ Omua ri kokure. Ndere nena mu Kristus Jesus omu ri popepi moru’ombinzi ha Kristus.

¹⁴ Ohe ombiri hetu. Iitoporua iijaari okue ji tura kumue, noruamba ruetopoko, okutja etondacano, he e ru kumuna po nonjama he.

¹⁵ Okua dima ompango ndji ha ri niipango neemkaro, opo a ninge ombiri nokutshiturura mboka jaari, ja ninge mu he muene omuntu omupe.

¹⁶ Mboka jaari ja turua kumue morutu rumue, a hara oku ja anganica na Karunga komutshigakano nokusica ngii etondacano mu he.

¹⁷ Okue ja nde t’uvica ekundano ehanaua rjombiri ku ne sho mua ri kokure, nombiri ku mboka ja ri popepi.

¹⁸ Oshoka omorue sse jaari tu nompito hoku ha ku Tate m’Ombepo himue.

¹⁹ Ano kamu shi ue aahenda naakuiirongo, aaue, aandjauo jaajapuki naanegumbo ja Karunga.

²⁰ Omua tungirua momukanka guaapostoli no guaaprofeti. Ndere Jesus Kristus ohe emanja rjopotshikororo.

²¹ Mu he etungua arishe tari ka pama rjo ari koko, ri ninge otempeli ondjapuki mu Muene.

²² Nane mua tungua mu he, mu ninge omukara gua Karunga m’Ombepo.