Johannes 8 - Etestemente Epe ✠ 1951

ONTOPORUA 8. Omukiintu omuonderi e ja ku Jesus.

¹ Jesus okua hi kondundu heemono.

² Nde ongura onene ta hi itshee montempeli, aantu ajeshe oje ja ku he. He ta kaatumba te ja rongo.

³ Aanongo jomambo naafariseji taa heta ku he omukiintu, a ri a kuatua moruondero; jo taa mu cikameke mokati.

⁴ Nde taa ti ku he: Muongi, omukiintu ngu a kuatua ngashingiika moruondero.

⁵ Moses okue tu rombuera mompango, aantu ja tja ngaaka ja dipague nomamanja. Ngueje oto ti ngiini?

⁶ Jo taa tshi popi ike okumumakera, opo ja tshiue okumupopa. Nde Jesus ta njongama, ta tshanga mevi nomunue gue.

⁷ Sho ja diginine okumupura, ok’ukirire, nde ta ti ku jo: Ngu ke nondjo mokati keni, nu umbe tango emanja mu he.

⁸ Ta njongama itshee, ta tshanga mevi.

⁹ Sho je tshu uvu, oja zi mo koogumue taa tameke komukuruntu; Jesus ohike a kara mo nomukiintu, ngu a cikama mokati.

¹⁰ Jesus h’otu ukirire, nde ta ti ku he: Mukiintu, mba je ku popa, oje ri peni? Kakuna nand’ogumue, ngu e ku pangura?

¹¹ Omukiintu ta jamukura, ta ti: Aaue, nand’ogumue, Muene. Jesus h’ote mu rombuere: Na ngaje uo itandi ku pangura. Inda, ndere ino jona ue.

Jesus uujerere uujuni.

¹² Jesus okue ja rombuere itshee, ta ti: Ongaje uujerere uujuni. Ngu ta randura ndje, ite ende meemurema, ota ka kara e nuujerere uomuenjo.

¹³ Aafariseji taa ti ku he: Oto okorora mu nguee muene; ehokororo rjohe kari notshiri.

¹⁴ Jesus ta jamukura mo: Nand’ote hokorora mu ngaje muene, ehokororo rjandje ori notshiri, oshoka ondi tshi hu nda za na hu te hi; ndere ne kamu tshi hu nda za na hu te hi.

¹⁵ Ne ohamu pangura parupe, ngaje kandi pangura nand’omuntu.

¹⁶ Na nge tandi pangura, rjo epanguro rjandje ori notshiri, oshoka k’ongaje ike ndi ri po, aaue, ongaje na Tate, ngu a tuma ndje.

¹⁷ Mompango heni omua tshangua mo, nokutja ehokororo rjaantu jaari ori notshiri.

¹⁸ Ano ngaje, ngu ti ihokorora muene, na Tate to okorora ndje, ngu a tuma ndje.

¹⁹ Mpa taa mu pura: Sho oku ri peni? Jesus h’ota ti: Kamu tshi ndje ngaje na Tate; ngeno kua mua tshiua ndje, ando mua tshiua uo Tate.

²⁰ Eehapu dika Jesus okue di popi potshikeca tshomagano, sho a rongo aantu montempeli. Kakuna ngu te mu kuata, oshoka ecimbo rje inari cika.

Ngu ini iteera, ta si meendjo de.

²¹ Jesus te ja rombuere itshee: Ote hi, otamu ka konga ndje, ndere tamu ka sira meendjo deni. Hu te hi, itamu vuru okuja ko.

²² Aajuda taa puracana: A hara ngeno i idipage muene, sho ta ti: Hu te hi, itamu vuru okuja ko?

²³ Nde ta ti ku jo: N’ojoposhi, ngaje ogomombanda N’ojomuujuni, ngaje kandi shi gomuujuni mbu.

²⁴ Ano onde mu rombuera: N’otamu sire ngaa meendjo deni; oshoka ng’itamu iteere nokutja ngaje ngu, otamu sire ngaa meendjo deni.

²⁵ Jo taa ti ku he: Onguee re ano? Jesus ti i mo ta ti: Ongaje etameko, ngu te popi uo ku ne.

²⁶ Ondi nojindji ndi ji popje na ne, ngaje ndi mu pangurire mo; ndere ngu a tuma ndje, ohe ogotshiri, nde shi ndu uva ku he, otsho shi te popi muujuni.

²⁷ Jo inaa dimburura, nokutja ota ti Karunga She.

²⁸ Ano Jesus te ja rombuere: Nge mua jeruca Omuna guOmuntu, otamu ka dimburura, nokutja ongaje ngu, ngu ita rongo tsha mu he muene, aaue, ndere otandi popi ajishe ngashi Tate e tshi ronga ndje.

²⁹ Ngu a tuma ndje, oku ri na ngaje, h’ita cigi ndje po ongaje ike, shoka ote rongo arushe shi tshe mu oparera.

³⁰ Sho a popi eehapu dika, aantu ojendji oji iteerere.

Iihere jaajuda.

³¹ Jesus h’ota rombuere aajuda, mba je mu iteera: Nge tamu diginine eehapu dandje, tshiri, otamu ningi aarongua jandje.

³² Otamu ka tshiua otshiri, nd’otshiri tatshi mu mangurura mo.

³³ Jo taa jamukura mo: Sse aanona ja Abraham, sse katua ri nande aapija jomuntu. Oto ti ngiini ano: Otamu ka mangururua mo?

³⁴ Jesus ti i mo, ta ti: Tshiri, tshiri, andi mu rombuere: Keshe ngu ta ningi ondjo, omupika guondjo.

³⁵ Omupija ka kara arushe megumbo, ndere omona ha kara mo sigoosigo.

³⁶ Omona nge te mu mangurura mo, omua mangururua mo.

³⁷ Ondi tshi tshi, nokutja n’aanona ja Abraham; ndere mua ara mu dipage ndje, oshoka ohapu handje itahi mono eshara mu ne.

³⁸ Ngaje ote popi shi nda mona pu Tate; ne otamu popi shi mua mona pu sho.

³⁹ Jo taa jamukura mo: Abraham ohe tate. Jesus ti i mo: Ne ng’aanona ja Abraham, ningeni nduno uo iironga ja Abraham.

⁴⁰ Ndere ne omua ara mu dipage ndje, ngaje omuntu, ngu te mu rombuere otshiri, shi ndu uva ku Tate; Abraham ine tshi ninga shi.

⁴¹ Ne amu rongo iirongo ja sho heni. Jo taa guire mo taa ti: Ss’inatu varua moruondero, ss’otu na tate gumuike, oKarunga.

⁴² Nde Jesus ta ti ku jo: Karunga ngeno a ri ohe Sho, ando ne omu ore ndje, oshoka onda za mu Karunga, nde tandi ja. Inandi ja mu ngaje muene, aaue, ohe a tuma ndje.

⁴³ Otshike kamu uvite ko eraka rjandje? Oshoka itamu vuru okuuva eehapu dandje.

⁴⁴ Omu na satana sho, na ne mua ara okuronga keharo rja sho. Ngu omudipagi guaantu hera a za, he ke na otshiri, oshoka othiri katshi ri mu he. Nge ta popi iirombo, ota popi tshemuene, oshoka omupopi giirombo, h’ohe she hiirombo.

⁴⁵ Nge tandi mu rombuere otshiri, itamu iteere ndje.

⁴⁶ Ore po pu ne ta vuru okupa ndje ondjo? Nge tandi mu rombuere otshiri, otshike nduno itamu iteere ndje?

⁴⁷ Ngu a za mu Karunga, ohu uvu ohapu ha Karunga. Otsho ano itamu puakene ndje morua shi inamu za mu Karunga.

⁴⁸ Mpa aajuda taa jamukura, taa ti ku he: Inatu tja notshiri, ongueje omusamaria, u nombepo ombuineji?

⁴⁹ Jesus ti i mo: Kandi nombepo ombuineji, ndere otandi simaneke Tate, nde ne tamu tsheke ndje.

⁵⁰ Itandi kongo esimano rjandje: gumuike te ri kongo, he ta pangura.

⁵¹ Tshiri, tshiri, andi mu rombuere: Ng’omuntu ta diginine eehapu dandje, ke na mpa na mono eso sigoosigo.

⁵² Aajuda jo taa guire mo, taa ti: Naangashiingika otu tshi tshi nduno, nokutja ou nombepo ombuineji. Abraham okua sa, naaprofeti oja sa, nde ngueje oto ti nokutja ngu ta pungura eehapu dandje, ke na mpa na makere eso sigoosigo.

⁵³ Nguee nduno ou vure ngaa tate Abraham? Naaprofeti uo ja sa. Oto iningi re?

⁵⁴ Jesus ta jamukura mo: Nge tandi isimaneke ngaje muene, esimano rjandje ori ri ouara. Otate ngu ta simaneke ndje, ngu ta tiua ku ne ohe Karunga keni.

⁵⁵ Nde ne kamu mu tshi, ndere ngaje ondi mu tshi. Na nge te ti: Kandi mu tshi, ando ngaje omupopi guiirombo nga ne. Ndere ondi mu tshi, ngaje te diginine ohapu he.

⁵⁶ Abraham sho okua ri a rigora, anuua ta ka mona ngeno esiku rjandje. Okue ri mona, nde ta njanjukua.

⁵⁷ Jo aajuda otaa ti ku he: Ino ada ngaa nanena keemuvo eemurongo ntano, ndere ongueje ua mona Abraham?

⁵⁸ Jesus h’oti i mo, ta ti: Tshiri, tshiri, andi mu rombuere: Abraham manka a ri ine ja po, ngaje opo ndi ri.

⁵⁹ Jo taa jeda omamanja nokuri, ngeno je mu umbe. Nde Jesus to orama, nde ta zi mo montempeli.