Johannes 6 - Etestemente Epe ✠ 1951

ONTOPORUA 6. Jesu ta kutica aantu mombuga

¹ Konima ha mbjoka Jesus h’ota hi haandija hefuta rja Galilea, nokutja efuta rja Tiberias.

² Ongundu onene haantu h’ohe mu randura, oshoka oja mono iirongankondo, mbi a ningi maavu.

³ Mpano Jesus ta hi kondundu, nde ta kaatumba ko naarongua je.

⁴ Otshituci tsha Paska tshaajuda otsha ri popepi.

⁵ Jesus sho a rigamene ko, ta mono ongundu onene haantu he ja ku he, nde ta pura Filipus: Otatu ka randa peni eemboroto okukutica ajeshe mbo?

⁶ Okue tshi popi ouara okumumakera, oshoka he muene okua ri e tshi shi ta ka ninga.

⁷ Filippus h’ota jamukura: Eemboroto da ha meendenari omacere gaari inadi guana, ngeno keshe muntu a mone nand’okatshuutshu.

⁸ Gumue po guo maarongua je, Andreas, omumuahina gua Simon Petrus, ta ti ku he:

⁹ Opun’omumati mpaka e neemboroto ntano neeshi mbaari. Od’ike otadi pondora po tshee mpo?

¹⁰ He Jesus ta ti: Eceni aantu ja kaatumbe manka. Mpono opua ri pu nomuidi ogundji. Aarumentu taa kaatumba, oja ri pomajovi gatano.

¹¹ Jesus h’ota kuca eemboroto, ta amberere, he te di toporere ajeshe, mba ja kaatumba mpo. Tsh’otsho tuu eeshi mbaari, nga’mpa ja ara di cike.

¹² Sho ja kuta, ta rombuere aarongua je: Gongereni uupambu aushe, mbu u upa ko, kau kane.

¹³ Je u gongere, nde taa huda iimbare omurongo niijari nuupambu ueemboroto ntano, mbu u upa ko ku mbono, mba ja rja.

¹⁴ Aantu sho ja mono otshirongankondo, shi Jesus a ningi, oja ti: Otshiri, nguk’ohe omuprofeti, ngu te ke ja anuua muujuni.

¹⁵ Ndere Jesus a hangara, aantu nokutja oja arere okumukondjica je mu ninge omukuaniirua. Otsho ano a zi po a he itshee kondundu, oh’ike.

Jesus te ende kombanda hefuta.

¹⁶ Etango tari ningine. Aarongua je taa hi kefuta.

¹⁷ Jo taa rondo mosikepa, nde taa taaguruka efuta okuha ku Kafarnaum. Kua ruuda manka, nde Jesus ine ja ku jo.

¹⁸ Efuta rjo orja pindja, oshoka otshikunguru otshidigu otsha tukuka.

¹⁹ So ja shinga osikepa puure pu cike eesitadio eemurongo mbaari na ntano nenge eemurongo ndatu, taa mono Jesus te ende kombanda hefuta, jo taa mbandara unene.

²⁰ Ndere he ta ti ku jo: Ongaje ngu, inamu tira!

²¹ Nenjanju taa mu tuumba mosikepa. Nzija osikepa oha farua komutunda guotshirongo, mpo ja ara okuha ko.

Jesus ta shunganeke esakramente ejapuki.

²² Ngaangura aantu mba ja ri haandija hefuta, oju uvu, nokutja kakuna ue osikepa huu, shira himuike ndji, ndere Jesus muene ina rondere mosikepa puamue naarongua je, aarongua ojo ike ja ka taaguruka.

²³ Ndere eesikepa dimue oda zire ku Tiberias, de ja popepi neshara, mpo ja rire eemboroto, di da jambekerue ku Muene.

²⁴ Ano sho ja mono, Jesus ke po naarongua je, oja rondo mesikepa, nde taa hi ku Kafarnaum okumukonga.

²⁵ Sho je mu mono haandija hefuta, oje mu pura: Muene, oue ja ko unake huno?

²⁶ Jesus h’ote ja rombuere: Tshiri, tshiri, andi mu rombuere, itamu kongo ndje, oshoka omua mona omadidiriko, aaue, otamu kongo ndje, sho mua rire eemboroto, nde tamu kuta.

²⁷ Inamu ihepica neendia di tadi shuru po, ndere akaneni okurja hu taku kara komuenjo guarushe, shika otamu tshi peua kOmuna guOmuntu. Nguka tuu okua didirikua ku Karunga She.

²⁸ Jo taa mu pura: Natu ninge ngiini tu ronge iironga ja Karunga?

²⁹ Jesus ta jamukura: Otshironga tsha Karunga otsho shi: Iteereni mu ngo, ngu a tuma.

³⁰ Jo taa pura itshee: Oto rongo otshirongankondo tshiini, tu tshi mone, sse tu ku iteere? Oto rongo tshike nduno?

³¹ Ootate oja rire omana mombuga, ngashi pua tshangua: Onde ja pere omboroto okurja, ndji ha zire keguru.

³² Jesus ta ti ku jo: Tshiri, tshiri, andi mu rombuere: Ke shi Moses, ngu e mu pere omboroto ndji ha zire keguru, aaue, oTate te mu pe omboroto hotshiri, ndji ha zire keguru.

³³ Oshoka omboroto ndjino oho’ndjija ha zire keguru, ho otahi pe uujuni omuenjo.

³⁴ Jo taa mu garikana: Muene, tu pa omboroto ndjija harushe.

³⁵ Jesus h’ota ti ku jo: Ongaje omboroto homuenjo. Ngu te ja ku ngaje, ka s’ondjara ue, na ngu ti iteere ndje, ka s’enota ue.

³⁶ Onde tshi mu rombuere, omua mona ndje, ndere inamu iteera ndje.

³⁷ Ajishe mbi te peua ku Tate, otaji ja ku ngaje; na ngu te ja ku ngaje, itandi mu ekereshi.

³⁸ Oshoka onda zire keguru, nde ja muujuni, ha kutja ndi ronge eharo rjandje, aaue, eharo rja ngu, ngu a tuma ndje.

³⁹ Eharo rja ngu a tuma ndje, nokutja orja Tate oondika: Inandi kanica tsha shi nda peua ku he, ndere ndi tshi pendure mesiku rjoshugunina.

⁴⁰ Eharo rja Tate, ngu a tuma ndje, orjo ndika: Keshe ngu ta mono Omona, he ti iteere uo mu he, na peue omuenjo guarushe, onandi mu pendura mesiku rjoshugunina.

⁴¹ Mpaka aajuda oja ngungutura, oshoka okua tire: Ongaje omboroto homuenjo, ha zire keguru, he ja poshi.

⁴² Nde taa ti: Ngu Jesus, k’ohe mumua Josef nani, she na hina tu ja tshi. Nena ota tshiua ngiini okupopja nokutja: Onda zire keguru?

⁴³ Jesus h’ota jamukura mo: Inamu ngunguturiracana!

⁴⁴ Kakuna ngu te ja ku ngaje, Tate, ngu a tuma ndje, ng’ite mu ciminike ko. Nde ngaje otandi mu jumuda mesiku rjoshugunina.

⁴⁵ Okua tshangua kaaprofeti: Ajeshe onaa rongua ku Karunga. Keshe ngu a huva ku Tate, he a rongua uo ku he, ote ja ku ngaje.

⁴⁶ Ha kutja ngeno oku na ngu a mona Tate; aaue, oh’ike tuu, ngu a zire ku Tate, he okua mona Tate.

⁴⁷ Tshiri, tshiri, andi mu rombuere: Ngu ti iteere ndje, oku nomuenjo guarushe.

⁴⁸ Ongaje omboroto homuenjo.

⁴⁹ Oosho oja rire omana mombuga, nde oja sa.

⁵⁰ Oho omboroto, ndji, ha zire keguru, opo keshe ngu te hi ri, ka se.

⁵¹ Ongaje omboroto homuenjo, ngu nda zire keguru. Ngu ta ri omboroto ndjino, ota kara e nomuenjo sigoosigo. Nd’omboroto, ndji onandi gandja, onjama handje hi ninge omuenjo guujuni.

⁵² Mpa aajuda taa patacana, jo taa ti: Ota tshiua ngiini okutupa onjama he oho tu rje?

⁵³ Jesus h’ote ja rombuere: Tshiri, tshiri, andi mu rombuere: Ng’itamu ri onjama hOmuna guOmuntu, ne itamu nu ombinzi he, itamu kara mu nomuenjo mu ne.

⁵⁴ Ngu ta ri onjama handje, he ta nu ombinzi handje, ota kara e nomuenjo, nde ngaje onandi mu jumuda mesiku rjoshugunina.

⁵⁵ Oshoka onjama handje okurja kuotshiri nombinzi handje okunua kuotshiri.

⁵⁶ Ngu ta ri onjama handje, he ta nu ombinzi handje, ota kara mu ngaje, na ngaje omu he te kara.

⁵⁷ Ngashi Tate omunamuenjo a tuma ndje, nde ngaje te rumbu morua Tate, otsho uo ngaa ngii ta rumbu morua ndje, ngu ta ri ndje.

⁵⁸ Oho omboroto, ndji ha zire keguru, ha kutja ngashi oosho ja rire omana mombuga, nde ja sa; ngu ta ri omboroto ndjino, ota rumbu sigoosigo.

⁵⁹ Eehapu dika okue di popja, sho a ronga aantu ku Kafarnaum mosinagoga.

⁶⁰ Ojendji jo maarongua je, sho je tshi uvu, oja ti: Ndjoka ohapu odigu ndjo. Ore te hi kuata ndjono?

⁶¹ Jesus h’okua tshiua mu he muene, nokutja aarongua oje hi ngunguturire. He ta ti ku jo: Eehapu dino otadi shindi ne?

⁶² Ndere uunarumue ng’onamu ka mona Omuna guOmuntu ta rondo hu a zire?—

⁶³ Ombepo oho hahi gandja omuenjo, onjama kahi noruporo. Eehapu di nde di mu rombuera, odo ombepo nomuenjo.

⁶⁴ Ndere uo mokati keni omu na jamue, mb’inaji iteera. Oshoka okuza ketameko Jesus okua ri e ja tshi, mb’inaji iteera, na ngu te ke mu orora.

⁶⁵ H’ota ti: ano onde tshi mu rombuera: Kakuna ngu ta vuru okuja ku ngaje, ng’ine tshi peua ku Tate.

⁶⁶ Okuza petango mpo aarongua ojendji ja za po, jo kaa hende ue na he.

⁶⁷ Jesus ta rombuere nduno mbeja omurongo na jaari: Na ne uo omua ara mu cige ndje po?

⁶⁸ Nde Simon Petrus ta jamukura mo: Muene, sse atu hi ku re? Ngueje ou neehapu domuenjo guarushe.

⁶⁹ Ss’otui iteera, sse tua tshiua, nokutja onguee Kristus, Omumua Karunga.

⁷⁰ Jesus h’ote ja jamukura, ta ti: Inandi ogorora nani omurongo na jaari, ndere gumue mokati keni osatana?

⁷¹ He ta popi Judas Iskariot, omumua Simon; oshoka ngu one ke mu orora, nande a ri gumue gua mbeja omurongo na jaari.