Johannes 4 - Etestemente Epe ✠ 1951

ONTOPORUA 4. Jesus mu Samaria.

¹ Jesus okua dimburura, aafariseji anuua oju uva, nokutja ota mono aarongua ojendji, he ta tshatsha uo ojendji e vure Johannes.

² (Nande Jesus muene ina tshatsha, ndere aarongua je).

³ H’otsho ano ta cigi po Judea, nde ta hi itshee mu Galilea.

⁴ Ondjira ohe mu farere mu Samaria.

⁵ H’ote ja momukunda gua Samaria, edina rjago Sikar, popepi nepja, ndi Jakob e ri pere omona Josef.

⁶ Mpoka po opua ri omucima, gua rukua omucima gua Jakob. Jesus a vurua koruendo, h’ota kaatumba nduno pomucima. Ouiri oha ri pontikanekamue.

⁷ Omukiintu omusamaria te ja okuteka omeja. Jesus h’ote mu popica: Pe ndje uo ndi nue!

⁸ Aarongua je oja ri ja hi momukunda ja ka rande okurja.

⁹ Omukiintu omusamaria ti i mo, ta ti: Oto indire ndje ngiini nduno okunua, ngueje ndi tshi omujuda, ndere ngaje omusamaria? Oshoka aajuda kaa hendacana naasamaria.

¹⁰ Jesus h’ota jamukura, ta ti ku he: Ngeno kua ua dimburura omagano ga Karunga, ngueje u tshi, ngu te ku indire: pe ndje uo ndi nue, ando oto mu indire, nde he te ku pe omeja ge nomuenjo.

¹¹ Omukiintu h’ota ti: Muene, ku na shi to teke na tsho, guo omucima omure; omeja nga ge nomuenjo, oue ga kuca peni?

¹² Ngueje ando omukuruntu u vure tate Jakob, ngu e tu pe omucima nguno? He muene omo kua ha nu, naana je niimuna je.

¹³ Jesus te mu zirire ko, ta tii: Keshe ngu ta nu omeja ngano, ona s’enota itshee, ndere ngu ta nu omeja nga andi mu pe, ita s’enota ue sigoosigo.

¹⁴ Go omeja nga andi mu pe, otaga ningi mu he orucicija ruomeja, tagi ifaraafara momuenjo guarushe.

¹⁵ Omukiintu h’ota ti: Muene, pe ndje omeja nga, kandi se ue enota, ngaje kandi je ue huka, ndi je ndi teke.

¹⁶ Jesus h’ote mu rombuere: Inda u ki icane omurumentu guohe, nde to ja huka.

¹⁷ Omukiintu h’ote mu jamukura, ta ti: Kandi na murumentu. Jesus ti i mo, ta ti: Ou ri mondjira, sho to ti: Kandi na murumentu.

¹⁸ Oshoka oua ri naarumentu jatano, nde nena ou na gumue, ngu ke shi guoh’erera. Mpa ua popja dotshiri.

¹⁹ Omukiintu ngu ta ti: Muene, ondi tshi uete, nokutja ongueje omuprofeti.

²⁰ Ootate oko kua haj’injongamenene Karunga kondundu ndjo, nde ne omua ti: Ku Jerusalem oku neshara rjokumuinjongamenena.

²¹ Jesus ta ti: Iteera ndje, mukiintu, ecimbo otari ja, itamu injongamenene ue Tate kondundu ndjo no ku Jerusalem.

²² Ne otamu injongamenene shi kamu tshi tshi. Ss’atu injongamenene shi tu tshi tshi, oshoka ehupico otari zi kaajuda.

²³ Ndere ecimbo otari ja — rjo ori ri popepi nokuri — aahambereri jotshiri mu naa hinjongamenene Tate mombepo no motshiri, oshoka Tate ota kongo aahambereri ja tja ngaaka.

²⁴ Karunga Ombepo, nde mba taa mu injongamenene, naa mu injongamenene mombepo no motshiri.

²⁵ Omukiintu h’ota ti ku he: Ondi tshi tshi, nokutja Messias ote ke ja (ngu ti icanua Kristus); nge e ja, ote tu rombuere iinima ajishe.

²⁶ He Jesus ta ti: Ongaje ngu, ngu te popi na ngueje.

²⁷ Aarongua je oja garuka, manka ta popi, nde taa kumua ko, sho ta kundacana nomukiintu, ndere kamua ri nand’ogumue e mu pura: oua ara tshike nenge otamu kundacana tshike.

²⁸ Omukiintu h’ota cigi po otshijuma tshe, ta hi momukunda, nde ta rombuere aantu:

²⁹ Ireni, mu ka tare omurumentu, ngu a rombuera ndje ajishe, mbi nda ninga. Puamue ohe Kristus.

³⁰ Jo otaa zi mo momukunda, nde taa hi na he.

³¹ Mpano aarongua taa mu indire: Rabbi, rja!

³² Nde ta ti ku jo: Ondi nokurja otshikurja, shi kamu tshi.

³³ Aarongua jo taa kundacana: Puamue omuntu e mu etera okurja.

³⁴ Jesus ta ti ku jo: Otshikurja tshandje otsho shi: ndi ronge eharo rja ngu a tuma ndje, ngaje ndi guanice iironga je.

³⁵ Nani ne kamu tja: Itshee eemuedi iine, netejo orja cika? Tareni, andi mu rombuere: Rigameniceni omesho geni, ne mu tare omapja, go ga tiriganena etejo nare.

³⁶ Ngu ta teja, ota tuumba ondjambi, nde iihimati te ji gongerere omuenjo guarushe, opo omuteji nomukuni uo ju ude enjanju.

³⁷ Tsh’otsho ohapu hi notshiri, ndji tahi ti: Gumue ota kunu, gumue a hiri ta teja.

³⁸ Ngaje onde mu tuma, mu teje mbi inamu ronga, jamue ji iri oja ronga, nde ne omua ha miironga jauo.

³⁹ Aasamaria ojendji jo momukunda nguija oji iteere mu he moru eehapu domukiintu, ngu a hokororere: He okua rombora ajishe mbi nda ninga.

⁴⁰ Aasamaria sho je ja nduno ku Jesus, oje mu indire a menekere pu jo. Ta kara po nduno omasiku gaari.

⁴¹ Ndere ojendji je vure mbeja jotango oji iteere mu he moru erongo rje.

⁴² Jo otaa rombuere omukiintu ngo: Nena ss’itatu iteere ue morua shi ue tu rombuere, aaue, oshoka ss’ojene otue mu uva, sse tu tshi, nokutja nguka Omukuriri tshiri guujuni.

Jesus mu Galilea.

⁴³ Konima homasiku gaari Jesus h’ota zi mo mumukunda, nde ti idenge ondjira ta hi ku Galilea.

⁴⁴ Oshoka Jesus muene okuo okorora nokutja omuprofeti ka simanekua motshirongo tshaandjauo.

⁴⁵ Sho e ja mu Galilea, aagalileji oje mu jakura nenjanju, oshoka oja monene ajishe mbi a ningire motshituci mu Jerusalem; jo uo oja ri kotshituci.

⁴⁶ Mu Galilea h’ota ka tarera po itshee Kana, mu a tshitukicire omeja omavinju. Po otapu ja erenga rjomukuaniirua, ngu e nomona ta arukua.

⁴⁷ Sho a huvu, Jesus a zi ku Judea, e ja mu Galilea, okua hi ku he. H’ote mu garikana a he ko, h’a ke erukice omona, ngu a ri ta ar’okusa.

⁴⁸ Jesus te mu rombuere: Ne ng’itamu mono omadidiriko niirongankondo, itamu iteere.

⁴⁹ Erenga rjomukuaniirua rjo tari garikana itshee: Muene, ira nduno, manka omumuandje ina sa.

⁵⁰ Mpa Jesus ta ti: Tshuna, omumohe oku nomuenjo. Omurumentu ngu ti iteere ohapu, ndji Jesus e mu rombuere, nde ta hi.

⁵¹ Mondjira, manka ta hi, aapija je jo taa mu tsakaneke, taa mu rombuere, nokutja omona oku nomuenjo.

⁵² H’ote ja pura, nokutja ouiri hi ini mu a peperere. Jo taa ti: Ohera pouiri ontinuuari omukici gue mu ecere.

⁵³ Mpa she okua dimburukua, nokutja ouiri oho ngaa himue, mpa a rombuererue ku Jesus ta ti: Omumohe oku nomuenjo. Notsho ano a hiteerere muene negumbo rje arishe.

⁵⁴ Shika otsho otshirongankondo otshitijari, Jesus e tshi rongo sho a zi ku Judea, a he ku Galilea.