Johannes 3 - Etestemente Epe ✠ 1951

ONTOPORUA 3. Nikodemus pu Jesus.

¹ Mokati kaafariseji omua ri omuntu, edina rje Nikodemus, h’omukuruntu guaajuda.

² H’okui ire ku Jesus uusiku, nde ta ti ku he: Rabbi, otu tshi tshi, nokutja oua za ku Karunga ng’omurongi; oshoka kapen’omuntu ta vuru okuronga iirongankondo ja tja ngaaka nga’nguee, Karunga nge ke ri na he.

³ Jesus te mu zirire ko: Tshiri, tshiri, andi ku rombuere: Uukuaniirua ua Karunga kapena’muntu te u mono, ng’ina varururua.

⁴ Nikodemus h’ote mu pura: Omuntu ota tshiua okuvarururua ngiini, h’a koka? Ota vuru ando okutshuna mera rja hina, opo a varururue?

⁵ Jesus te mu jamukura mo: Tshiri, tshiri, andi ku rombuere: Omuntu ng’ina varururua itshee momeja no mOmbepo Ondjapuki, iti i mo muukuaniirua ua Karunga.

⁶ Shi tsha za monjama, otsho onjama, ndere shi tsha za mombepo, otsho tuu ombepo.

⁷ Ino kuminua eehapu dandje, sho nda ti: Mu nokuvarururua.

⁸ Ombepo ho tahi pepe mpo ha hara. Tu hu uvu, sho tahi pupu, ndere ku tshi nande, mpo tahi zi na mpo tahi hi. Otsho tuu pomuntu, ngu ta varururua mOmbepo.

⁹ Nikodemus h’ota pura: Otatshi ka ningua ngiini?

¹⁰ Jesus h’ota ti: Ongueje omurongi guaaisrael, ndere ku tshi tshi nani?

¹¹ Tshiri, tshiri, andi ku rombuere: Shi tu tshi, atu tshi popi uo, shi tua mona, atu tsho okorora, ndere ne itamu iteere nande ehokororo rjetu.

¹² Nge tandi popi ku ne mbi juujuni, nde itamu iteere, otamu ki iteera ngiini, nge te popi ku ne mbi jeguru?

¹³ Kapen’omuntu a ronda keguru, gumuike tuu, ngu a zire keguru, nokutja Omuna guOmuntu, ngu e ri meguru.

¹⁴ Ngashi Moses a jerucire ejoka mombuga, otsho ngaa ngii Omuna guOmuntu e nokujerucua.

¹⁵ Opo keshe ngu a hiteera mu he, ka ka kane, ndere nani a mone omuenjo guarushe.

¹⁶ Oshoka Karunga okua ri e hore uujuni shi cike mpa, nde ta gandja Omona omuvaru’oh’ike, opo keshe ngu ti iteere mu he, ka ka kane, ndere nani a mone omuenjo guarushe.

¹⁷ Karunga ina tuma Omona muujuni e je e u pangure, aaue, okue mu tuma e je a hupice uujuni.

¹⁸ Ngu a hiteera mu he, ita ka pangurua, ndere ngu ini iteera, okua pangurua nare, oshoka ini iteera medina rjOmuvaru’oh’ike gua Karunga.

¹⁹ Epanguro orjo tuu ndika: Uujerere oue ja muujuni, ndere aantu oja ri je hore eemurema komeshe guujerere, oshoka iironga jauo oja ri iihineji.

²⁰ Oshoka keshe ngu ta rongo uuhineji, ota tondo uujerere, he ite ke ja kuujerere, iironga je kaji tarikue.

²¹ Ndere ngu ta rongo otshiri, h’ote ke ja kuujerere, opo iironga je jo oroke, oshoka oja rongerua Karunga.

Jesus mu Judea.

²² Konima ha mbjoka Jesus okue ja naarongua je motshirongo tsha Judea, he ta ka menekera mo na jo, nde ta tshatsha.

²³ Na Johannes uo a ri ta tshatsha mu Enon, popepi na Salim, oshoka mpaka opua ri pu nomeja ogendji. Aantu jo je ja ji itshatshice.

²⁴ Johannes okua ri ine edirirua manka modorongo.

²⁵ Aarongua ja Johannes jo taa shimbike eembata naajuda, taa patanene ehijereko.

²⁶ Taa hi ku Johannes, taa ti: Rabbi, tara, nguija a ri na nguee haandija ha Jordan, nde to mu okorora; he ota tshatsha ngaaka, ajeshe otaa hi ku he.

²⁷ Johannes h’ota jamukura, ta ti ku jo: Omuntu ita vuru okukucira tsha, ng’ine tshi peua keguru.

²⁸ Ne ojene omu tshi tshi, nokutja onda tire: Kandi shi Kristus, onda tumu’ike ndi mu tetekerere.

²⁹ Ngu e nomukadona, ohe nakujara; kuume ka ngu a jara, nge e ri po, he e mu uvite, okua njanjukua keui rja nakujara. Ngashiingika nduno enjanju rjandje ndika orja guanicua rju uda.

³⁰ He na koke, ndere ngaje nandi kuke.

³¹ Ngu a zire mombanda, oku ri uo kombanda hajeshe; ongoka guomevi, ohe guopevi, he ta popi uo jopevi. Ngu a zire meguru, ohe e vure ajeshe.

³² Shi a mona na shi a huva, h’ote tsho okorora, ndere kapena ngu ti iteere ehokororo rje.

³³ Ndere ngu a hiteera ehokororo, ota gana uo, nokutja Karunga omunatshiri.

³⁴ Oshoka ngu a tumua ku Karunga, ota popi uo eehapu da Karunga, oshoka Karunga ka gandja Ombepo he erekua notsheerekico.

³⁵ She oku ore Omona, h’okua tura mo ajishe miikasha je.

³⁶ Ngu ti iteere mu Karunga, oku nomuenjo guarushe, ndere ngu a tindira Omona ehiteero, h’ita ka mona omuenjo guarushe, aaue, ondjashi ha Karunga otahi ka kara kombanda he.