Johannes 21 - Etestemente Epe ✠ 1951

ONTOPORUA 21. Jesus to orokere aarongua pefuta.

¹ Jesus te ja to orokere aarongua itshee pefuta rja Tiberias. To orokere otshingii.

² Simon Petrus na Tomas, ngu ti icanua uo Omukuanambuju, na Natanael guo mu Kana tsha Galilea, naana Zebedeus naarongua je jaari ji iri jo je ja mumue.

³ Simon Petrus te ja rombuere: Ote ka tega eeshi. Jo taa hi mo, taa ti: Na sse otatu hi na nguee. Jo ja hi nduno, taa rondo mosikepa, nda kaa ri ja kuata mo tsha uusiku mbo.

⁴ Peruua tari tende, Jesus h’okua cikama komunkunkuro, nde jo kaa ri je mu dimburura, nokutja oJesus.

⁵ Jesus ta ti ku jo: Janona, omu na po okurja? Jo taa jamukura: Aaje!

⁶ He ta ti: Umbireni otshijurico korurjo rokasikepa, tamu mono ngaa tsha. Taa tshu umbire mo nduno, nd’itaa vuru ue okutshishira mo kouundji ueeshi.

⁷ H’omurongua nguija, ngu Jesus a ri e mu ore, ta ti ku Petrus: Omuene. Nde Petrus sho a huvu: Omuene, ta zara nzija ohema, oshoka okua ri ouara, nde ti ihumbire mefuta.

⁸ Aarongua aakuauo taa randura ko nosikepa, osho ja ri popepi nomunkunkuro, eemetre omacere gaari. Jo taa kokorora otshijurico tshu uda eeshi.

⁹ Sho ja rondo kuuajere, oja ada ko omuriro gua temua, mu noshi himue nomboroto hi ri po.

¹⁰ Mpa Jesus h’ota ti: Etererii ko eeshi ho, pu do mua kuata.

¹¹ Simon Petrus h’ota rondo mosikepa, nde ta kokororere otshijurico kuuajere, tshi neeshi ecere rimue, neemurongo ntano neeshi ndatu; nand’oda ri odindji, inadi tejagura otshijurico.

¹² Jesus ta ti ku jo: Ireni, tu rjeni! Nde kapua ri nand’ omurongua gumue po ja mba ja kaatumba pokurja, a ri a hinekera a pure, ta ti: Onguee re? Oshoka oja ri je tshi, nokutja Omuene.

¹³ Jesus te ja, ta kuca omboroto, te hi ja pe, noshi otsho tuu.

¹⁴ Mpo Jesus okuo orokere aarongua je orutitatu, hera a jumuka kuusi.

Petrus ta ningi omusi ta omunene.

¹⁵ Konima hokurja Jesus okua pura Simon Petrus, ta ti: Simon, mumua Johannes, ou ore ndje u vure mbano? He ti i mo: Eeno, Muene, ou tshi, nokutja ondi ku ore. Mpa Jesus h’ote mu ti: Rica eenzigona dandje!

¹⁶ Nde Jesus te mu pururura: Simon, mumua Johannes, ou ore ndje? He ti i mo: Ee, Muene, ou tshi, nokutja ondi ku ore. Jesus te mu ti itshee: Rica eenzigona dandje!

¹⁷ Nde te mu pura orutitatu: Simon, mumua Johannes, ou ore ndje? Ngashiingika Petrus a hehama, shok’e mu pura orutitatu, nde ta ti: Muene, ngueje ou tshi ajishe, ou tshi itshee ngaa, nokutja ondi ku ore. Mpa Jesus h’ote mu ti: Rica eenzi dandje!

¹⁸ Tshiri, tshiri, andi ku rombuere: Sho ua ri omumati, okua ho izareke muene, nde to tshiingi hu ua ara. Nde esiku rimue, nge ua ka kurupa, oto ka taandereka omake gohe, nd’omuntu a hiri te ku zareke, he te ku fara hu ino ara.

¹⁹ Shika okue tshi popi te mu ucikire, nokutja ona simaneke Karunga neso rja tja ngiini. Sho e tshi tja, ote mu rombuer’ike: Randura ndje!

²⁰ Nde Petrus ta punguruka, ta mono omurongua ta randura ko, ngu Jesus a ri e mu ore, ngu a ri uo i igameka ponturo he puurarero, h’ota pura: Muene, ore te ke ku orora?

²¹ Petrus sho e mu mono, okua ti ku Jesus: Muene, nguka ota ka ninga tshee?

²² Jesus ta jamukura: Ng’onda ara, nguka a kare sigo andi ja, ou na ngeno na tsho? Onguee randura ndje!

²³ Ano ehepururo ndika orje enda mokati kaamuahina, nokutja omurongua nguka ita si. Nde Jesus ine mu tja: Ita si, aaue, okua ti ike: Ng’onda ara a kare sigo andi ja, ou na ngeno na tsho?

²⁴ Omurongua nguno, ngu te tsho okorora, h’e tshi tshanga, sse otu tshi, nokutja ehokororo rje orjotshiri.

²⁵ Ndere oku na iikuauo ojindji Jesus e ji rongere, ndere ngeno okuaj’oja tshangua ko otshimuetshimue, ando uujuni inau vura okukuata omambo ngaka ge nokutshangua.