Johannes 20 - Etestemente Epe ✠ 1951

ONTOPORUA 20. Petrus na Johannes pombira.

¹ Mesiku rjotango rjotshiuike ongura onene natango ku neemurema, Maria Magdalena okue ja kombira, nde ta mono emanja rja kucua ko nare kombira.

² Ta matuka, ta hi ku Petrus no komurongua, ngu Jesus a ri e hore, nde ta ti ku jo: Muene oje mu kuca mo mombira, nde katu tshi, mpa je mu tura.

³ Petrus nomurongua nguija jo ju unduka, taa hi kombira.

⁴ Ajeshe jaari taa piti puamue, je enderera, ndere omurongua nguija ta cigi po Petrus, ohe a ciki tango kombira.

⁵ To ondamene mo mombira, nde ta mono omarapi omatokere ge ri mpo, ndere h’ina ha manka mombira.

⁶ Na Simon Petrus te je, e mu randura, ta hi mombira, na he omarapi ngaa a mono ge ri mo.

⁷ Notshikajiua tshokuipugura, shi tsha ri komutse gue; inatshi turua pomarapi omatokere, tsho tsha gonjua tshi ikarera peshara ri iri.

⁸ H’omurongua nguija uo ta hi mo, ngu a ri a cika kombira tango, he ta mono shi, ti iteere.

⁹ Ndere nanena kaa ri ja kuata eehapu dija, nokutja Jesus oku nokujumuka mo maasi.

¹⁰ Mpa aarongua taa tshuna itshee kaandjauo.

¹¹ Nde Maria a kara a cikama pombira pondje, he ta riri. Manka ta riri, h’oto ondamene a tare mo mombira.

¹² He ta mono aajengeli jaari, je ri meenguuo eentokere, ja kaatumba, mpo pua ri pua rangekua omudimba gua Jesus, gumue ropomutse, mukuauo ropeempadi.

¹³ Jo taa mu popica, taa ti: Mukiintu, oto ririre tshee? He ta ti ku jo: Oshoka oja kuca mo Muene guandje, nde kandi tshi mpa je mu tura.

¹⁴ Manka e ri ta popi shi, okua punguruka, nde ta mono Jesus a cikama komesho ge. Ndere ka ri a dimburura Jesus.

¹⁵ He Jesus otsho a tja: Mukiintu, oto ririre tshee? Ore to kongo? Maria okuaj’e tshi, oh’omurongi guotshikunino. Otsho ano a jamukura, ta ti: Muene, ng’ongueje ue mu kuca mo, rombuera ndje nduno, mpa ue mu tura, ndi ke mu tare po.

¹⁶ Jesus h’ota ti: Maria! He ano okua punguruka, nde ta ti ku he: Raboni, atshi ti: Muongi!

¹⁷ Nde Jesus ta ti: Ino njenga ndje, oshoka inandi ronda nanena ndi he ku Tate. Ndere inda kaamuameme, nde to ka tja: Otandi rondo ndi he ku Tate, h’oSho, ku Karunga kandje h’oKarunga keni.

¹⁸ Maria h’oku unduka nokuri, nde ta ka rombuera aarongua: Muene nde mu mona. Shika a rombuera ndje.

Jesus mokati kaapostoli.

¹⁹ Onguroshi mesiku ndija rjotango rjotshiuike iihero jondjugo okua ja patua, mu aapostoli ja ri ja gongarere mo, ja tira aajuda. Jesus h’ote ja mo, a cikama mokati kauo, nde te ja popica: Ombiri nahi kare na ne!

²⁰ Sho e tshi tja, okue ju urukire omake norupati. Aarongua jo ja njanjukua nokuri, sho ja mono Jesus.

²¹ He ta ti itshee ku jo: Ombiri nahi kare na ne! Ngashi Tate a tumine ndje, otsho uo ngaje tandi mu tumu.

²² Sho a popi shino, h’ote ja fudire, nde ta ti: Tuumbeni Ombepo Ondjapuki!

²³ Mba tamu ka dimina po eendjo, oje di diminua po, na mba tamu cigire po eendjo, oje di cigirua po.

²⁴ Tomas, gumue po pu mboka omurongo na jaari, ngu ti icanua uo Omukuanambuju, ka ri po, sho e ja.

²⁵ Aarongua aakuauo jo taa mu rombuere, taa ti: Sse otua mona Muene. Nde he ta ti ku jo: Mank’inandi mona momake ge otshiraro tsheembosha, ine tura omunue guandje miiraro jeembosha, ngaje ine tura eke rjandje morupati rue, inandi iteera.

²⁶ Omasiku uunutatu ga pitire po, nd’aarongua taa gongarere itshee mondjugo, he Tomas opo a ri uuna ndo. Jesus h’ote ja mo, iihero ja patua, ta cikama mokati kauo, nde ta ti: Ombiri nahi kare na ne!

²⁷ Nde ta rombuere Tomas: Tura mo nduno omunue guohe, nguee to tara omake gandje. Eta eke rjohe hu, nde to ri tura morupati ruandje, nguee ku kare ue inu iteera, aaue, iteera nduno.

²⁸ Tomas h’oti i mo, ta ti: Muene guandje ngu’oKarunga kandje.

²⁹ Nde Jesus ta ti: Otsho ua mono ndje, Tomas, opo nduno ui iteera. Aanerago oombo inaa mona, jo ji iteera.

³⁰ Niironga iikumisi ojindji ji iri Jesus okue ji ronga miipaci jaarongua je, mbi inaji tshangua membo ndika.

³¹ Ndere mbijaka oja tshangua, opo mu iteere, nokutja Jesus Kristus oh’Omumua Karunga, nde mokuiteera ne mu mone omuenjo medina rje.