Johannes 19 - Etestemente Epe ✠ 1951

ONTOPORUA 19. Jesus ta pangurua a se.

¹ Nde Pilatus ta gandja Jesus a ka kuatue, h’a dengue neengora.

² Aakuiita jo taa tungu otshingongo tshomakuega, taa tshi mu dingire komutse, nde taa mu zareke nduno eruakani etirigane.

³ Jo taa hengene ko, taa ti ku he: Kundua, mukuaniirua guaajuda! Nde taa mu denge orupi korupanda.

⁴ He Pilatus ta zi mo itshee, ta ti ku jo: Tareni, andi mu fara ku ne pondje, opo mu tshiue, nokutja kandi uete mo ondjo mu he.

⁵ Jesus h’ota zi mo nduno, a zarekua otshingongo tshomakuega neruakani etirigane. Nde ta ti ku jo: Tareni, omuntu e ri ngiini nguno?

⁶ Aapristeri aakuruntu naapija, sho je mu mono, oji igida, taa ti: Mu arera, mu arera komutshigakano! Nde Pilatus ta ti ku jo: One mu kucii po nduno, nde tamu ke mu arera, oshoka ngaje kandi uete mo otshikoro mu he.

⁷ Aajuda taa jamukura, taa ti: Ss’otu nompango, nd’ompango ndjika oku notshikoro tshokusa, oshoka okui ininga Omumua Karunga.

⁸ Pilatus sho a huvu eehapu dika, okua tiririra.

⁹ Mpa h’okua zi mo itshee mondjugo hokupangurira, nde ta pura Jesus: Oua zi kuni? Nde Jesus ine mu pa nand’ejamukuro.

¹⁰ Pilatus ta ti ku he: Ongiini, ito jamukura ndje? Ku tshi nokutia ondi neenkondo okukuarera komutshigano nokukumangurura mo?

¹¹ Jesus te mu jamukura, ta ti: Ngeno ku neenkondo mu ngaje, mank’ino di peua adi zirire mombanda. Otsho ano omuntu, ngu a heta ndje ku ngueje, e notshikoro otshinene tsha pitirira.

¹² Okuza mpoka Pilatus okua kara ngaa ta kongo, ngeno e mu mangurure mo, ndere aajuda jo ja jogerera, taa ti: Ngu nge to mu mangurura mo, ku shi kuume komukesari, oshoka ngu ti itura muene kuukuaniirua, oku notshisindo atshi cemenene omukuaniirua.

¹³ Pilatus sho e tshi uvu shika, okua fara Jesus pondje, ta kaatumba kotshipundi tshokupangurira, kesha ndi tari icanua Litostrato, motshihebereji Gabata.

¹⁴ Okua ri esiku rjerongikido rja Paska, potundi ontikanekamue, sho a rombuere aajuda: Tareni, omukuaniirua guaajuda.

¹⁵ Ndere taj’igida: Nguka na ze po, na ze po, mu arera komutshigakano. Pilatus ta ti ku jo: Ijoo, nandi arere omukuaniirua gueni? Nd’aapristeri aakuruntu taa jamukura: Sse katu nomukuaniirua, omukesari ike tu na.

¹⁶ Mpa Pilatus okue mu gandja a ka arerue komutshigakano. Jo taa kuca nduno Jesus, nde taa mu fara pondje.

Jesus ta arerua komutshigakano.

¹⁷ Nokuihumbatera muene omutshigakano okua zi po mpa, ta hi keshara, ndi tari icanua: Eshara rjeenkue, motshihebereji Golgata.

¹⁸ Oko hoka taa ke mu arera komutshigakano, nitshee jaari kombinga no kombinga, Jesus mokati.

¹⁹ Pilatus ta tshanga epakorua, te ri tura komutshigakano. Mu mua tshangua: Jesus omunazareta, omukuaniirua guaajuda.

²⁰ Aajuda ojendji oja resha eendanda di, oshoka ponima mpoka mpo pua arerua Jesus, opua ri pue egama omukunda omunene; oda ri da tshangua motshihebereji no motshigereki no motshilatina.

²¹ Nde aapristeri aakuruntu taa rombuere Pilatus: Ino tshanga ua tja: Nguk’omukuaniirua guaajuda, tshanga ua tja: Nguk’a tja: Ongaje omukuaniirua guaajuda.

²² Pilatus h’ota jamukura mo, ta ti: Shi nda tshanga, otatshi kara tsha tshangua.

²³ Aakuiita sho ja arera Jesus komutshigakano, oja kuca po eenguuo de, nde taa di topora iipambu iine, keshe mukuiita otshipambu tshimue, nohema he. H’oha ri ha tungua kahi tshi kutatununua okuza komutse sigo okomaguru.

²⁴ Jo otsho ano nokuri taa rombueracana, taa ti: Inatu ara okuitetagura, tu ogororeni tu tare, nokutja ahi ningi ha re. Otsho ngii eehapu domuprofeti di guanicue, di da tja: Oji itoporere eenguuo dandje, jo taa hihogororere onguuo handje. Aakuiita otsho ja ningi.

²⁵ Pomutshigakano gua Jesus opua ri hina nomumuahina gua hina na Maria, omukiintu gua Kleofas, na Maria Magdalena.

²⁶ Jesus sho a mono hina nomurongua, ngu a ri e mu ore, ja cikama mpo, okua ti ku hina: Mukiintu, tara, omumohe ngo!

²⁷ Komurongua nde ta ti: Tara, onjoko ngu! Okuza mpoka omurongua okue mu tuumba maandje.

Jesus ta si komutshigakano.

²⁸ Jesus sho a ri e tshi, nokutja ajishe oja guanicua, okua ti, opo eehapu domambo di guanicue uo ciru: Nda s’enota.

²⁹ Mpo opua ri pu notshijuma tshu uda omeja omaruru. Jo taa huda otshiponameja omeja omaruru, taa tshi tura kotsheenguti, jo taa tshu unzire kokana kue.

³⁰ Jesus sho a nu omeja omaruru, okua ti: Tsha rongua tsha pua! Ta sizimike omutse, nde ta gandja omuenjo gue.

³¹ Kaku cigua eemudimba keemutshigakano mesiku rjesabata, oshoka orja ri esiku rjerongikido (ndere esabata ndika orja ri esiku enene po), aajuda oji indire Pilatus omasipa gado ga ka tejue po, do di kucue ko nduno.

³² Aakuiita taa ja nokuri, nde taa tejagura omasipa ga guotango no gomukuauo, ngu a ri a harerua na he.

³³ Ndere sho je ja ku Jesus, nde taa mono, nokutja a sa nare, inaa tejagura ue omasipa.

³⁴ Ndere gumue guaakuiita te egurura orupati rue negongamuere, naanzija mo omua z’ombinzi nomeja.

³⁵ Ngu e tshi mona shika, ote tsho okorora, rjo ehokororo rjotshiri. H’oku tshi, nokutja ota popi dotshiri, opo ne uo mu iteere.

³⁶ Oshoka ajishe mbika oja ningua, opo eehapu domambo di guanicue, di tadi ti: Inamu teja nand’esipa rimue.

³⁷ Na di tadi rombora adi ti: Onaa tara ku he, ngu ju urura.

Jesus ta fumbikua.

³⁸ Josef guo ku Arimatea (ngu a ri omurongua gua Jesus, ndere okua ri ike a tira aajuda, sho a ri ino oroka po), te ja ti indire Pilatus, omudimba gua Jesus e gu kuce ko. Pilatus te tshi pitika. H’okue ja ano, nde ta kuca ko omudimba gua Jesus.

³⁹ Na Nikodemus, ngu a hire nare ku Jesus uusiku, oko a ri, e ja a heta omiira ga vundakanicua naloe, ge cike puukende ecere rimue.

⁴⁰ Jo taa turura ko omudimba gua Jesus, nde taa gu dingire momarapi omatokere mumue niizimba mbi iinikanaua, ngashi ngaa kua hatshi ningua kaajuda pokufumbika.

⁴¹ Roponima mpo kua pua arererua Jesus, opua ri otshikunino; motshikunino muka omo mua ri ombira ompe, mu inamu rara nanena omuntu.

⁴² Moka oja rangekere mo Jesus, moru esiku rjerongikido rjaajuda, oshoka ombira oha ri popepi.