Johannes 18 - Etestemente Epe ✠ 1951

ONTOPORUA 18. Jesus ta kuatua.

¹ Konima heehapu dika Jesus okua hi naarongua je, nde ta tokora okaronga Zedron. Hu okua ri ku notshikunino, he ta hi mo puamue naarongua.

² Otsho ano Judas, ngu te ke mu orora, a ri e tshi po ponima mpa, oshoka Jesus okua ri e ja ko orundji naarongua je.

³ Judas okua kuca aakuiita naapija jaapristeri aakuruntu no jaafariseji, nde te ja ko neenjeka neerampa nomagonga.

⁴ Jesus okua ri e tshi ajishe, mbi taji ke ja, ano tu uruka ko, nde ta ti ku jo: Otamu kongo re?

⁵ Jo taa jamukura mo: Ojesus omunazareta. Jesus ta ti ku jo: Ongaje ngu. He Judas ta cikama po, ngu te ke mu orora.

⁶ Sho a ti ku jo: Ongaje ngu, ajeshe oja tshuna ruanima, nde taa guire poshi.

⁷ H’ote ja pura itshee: Ore tamu kongo? Taa ti: Ojesus omunazareta.

⁸ Jesus ta ti: Onde mu rombuera nare, nokutj’ongaje ngu. Ng’ongaje nduno tamu kongo, eceni mbo ja he.

⁹ Opo ohapu hi guanicue, sho a ti: Mba ua pere ndje, inandi ja kanica, nand’ogumue.

¹⁰ Simon Petrus, ngu a ri e nomuere, okue gu pueja mo, nde ta denge omupija guomupristeri omukuruntu, ta tete ko okutsi kue kokurjo tuu, gepa. Edina rjomupija Malkus.

¹¹ Nde Jesus ta rombuere Petrus: Tura omuere guohe morumpangua. Ehoro ndi nda peua ku Tate, itii ri nu nani?

Jesus pu Annas na Kaifas.

¹² Aakuiita nerenga rjauo naapija jaajuda jo tsho taa kuata Jesus, nde taa mu manga.

¹³ Oje mu fara tango ku Annas, ngu a ri shemueno ha Kaifas, ngu a ri momuvo ngu omupristeri omukuruntu.

¹⁴ Ndere Kaifas onguija, ngu a rombuerere aajuda: Omuntu gumue ta si, oshuepo tshi vure otshiguana atshishe tatshi si.

¹⁵ Simon Petrus nomurongua gumue a hiri ojo kua ja randura Jesus. Omurongua nguka okua ri e tshiuikue komupristeri omukuruntu, he ta hi ano na Jesus potshoto tshegumbo rjomupristeri omukuruntu.

¹⁶ He Petrus ta kara a cikama kontu potsheero. H’omurongua nguija, ngu a ri e tshiuikue komupristeri omukuruntu, ta zi mo itshee, ta popi nomukiintu, omurangeri guotsheero, nde te eta mo uo Petrus.

¹⁷ Omukiintu ngu, omurangeri guotsheero, ta ti ku Petrus: Ko nguee gumue guaarongua jomuntu nguno? He ta jamukura: Aaje, ko ngaje.

¹⁸ Aapija naakareri oja ri ja cikama pomuriro, jo taa shushurukua, oshok’okua ri ku nuutarara; na Petrus ta cikama pu jo ta shushurukua.

¹⁹ Omupristeri omukuruntu ta pura Jesus aarongua je nomarongo ge.

²⁰ Jesus ta jamukura: Onda popja montanesho huujuni. Mosinagoga no montempeli mu kua hamu gongara aajuda ajeshe, omo kua handi ongo, nd’ine popja nando otsha tandi oreke.

²¹ Oto pura ndje tshee? Pura mbeja, mba ju uva ndje, shi nde ja rombuera. Tara, jo oje tshi, shi nda popja.

²² Peehapu dika Jesus h’okua peua po orupi ro korupanda komupija, ngu a cikama mpo, ta ti: Otsho to jamukura omupristeri omukuruntu ngaano?

²³ Nde Jesus he ta jamukura: Ng’onda popja neji, tshi rombora, nde ng’onda popja tshu uka, oto dengere ndje tshee?

²⁴ Mpa Annas te mu tumu, a mangua, ku Kaifas, omupristeri omukuruntu.

²⁵ Nde Petrus okua cikama mpo, ta shushurukua. Jo taa ti ku he: Ko nguee gumue po paarongua je? He ti ipatana, ta ti: Aaje.

²⁶ Gumue po paapija pomupristeri omukuruntu, mukuauo gua nguija, ngu a tetua okutsi ku Petrus, ta ti ku he: Inandi ku mona uo na he motshikunino?

²⁷ He Petrus ti ipatana itshee, naanzija ekondomboro rjo otari igi.

Jesus pu Pilatus.

²⁸ Okuza ku Kaifas Jesus ta farua mondjugo hokupangurira. Okua ri ongura onene. Jo jene kaa ri ja ha mo mondjugo hokupangurira, kaa kare ja nigira, ndere ja tshiue ngeno okurja otshiriro tsha Paska.

²⁹ Ano Pilatus muene h’ote ja pondje ku jo, nde ta pura, ta ti: Omuntu nguno omu mu nene ondjo ha tshee?

³⁰ Jo taa jamukura, taa ti: Ngeno kuaj’omuntu ngu ke shi omunandjo, ando inatu mu gandja ku ngueje.

³¹ Pilatus ta ti ku jo: Mu kucii po nduno, mu mu pangure kompango heni. Aajuda jo taa ti: Sse katu na mpango okudipaga omuntu.

³² Opo ohapu hi guanicue, ndji Jesus a popja okuurukira eso rjatjangiini, ndi e nokusa.

³³ Pilatus ta tshuna mondjugo hokupangurira, nde ti icana Jesus, te mu pura: Onguee mukuaniirua guaajuda?

³⁴ Jesus ti i mo, ta ti: Oto tshi popi munguee muene, nenge aantu je tshi ku rombuera?

³⁵ Pilatus ta jamukura mo: Ou tshi, ngaje omujuda? Aantu johe naapristeri aakuruntu oje ku gandja ku ngaje. Oua ninga tshee?

³⁶ Jesus ti i mo, ta ti: Uukuaniirua uandje kau shi uo muujuni mbu. Ngeno kua uukuaniirua uandje uo muujuni mbu, ando aapija jandje ja kondja, kandi he miikasha jaajuda. Ndere uukuaniirua uandje kau shi ua huu.

³⁷ Mpa Pilatus ta ti ku he: Ano ongueje omukuaniirua? Jesus ta jamukura, ta ti: Ngashi to ti, ongaje omukuaniirua. Otsho nda varerua, ngaje nde ja muujuni, ndi okorore otshiri. Ngu a za motshiri, eui rjandje ote rju uvu.

³⁸ Nde Pilatus ta ti ku he: Otshiri otshike? Sho e tshi ti, okua hi pondje, ta ka popja naajuda, ta ti: Kandi uete mo ondjo mu he.

³⁹ Nde omu nomukaro, potshituci tsha Paska ndi mu diturire mo gumue meemango. Omua ara nduno, ndi mu mangururire mo omukuaniirua guaajuda?

⁴⁰ Ajeshe jo taji igida, taa ti: Ha nguka, aaue, oBarabas. He Barabas okua ri omukorokoshi.