Johannes 17 - Etestemente Epe ✠ 1951

ONTOPORUA 17. Ehamberero enene rja Jesus.

¹ Jesus sho a popi dika, okua rigamenica omesho keguru, nde ta ti: Tate, erara rje ja, simanekica Omumohe, opo Omumohe e ku simaneke uo.

² Oue mu pere epangero rjo monjama ahishe, h’a pe ajeshe omuenjo guarushe, mba ue mu pa.

³ Ndere shika otsho omuenjo guarushe, je ku tshiue, Karunga gumuike guotshiri, na ngu ua tuma, Jesus Kristus.

⁴ Onde ku simaneka komband’evi. Otshironga shi ua pere ndje, onde tshi guanica.

⁵ Nde ngashiingika, Tate, simaneka ndje pu nguee muene nehadimo, ndi nda ri na rjo pu ngueje, uujuni manka kaua ri po.

⁶ Ondu uvicira aantu edina rjohe, mba ua pa ndje m’uujuni. Oja ri johe, nde ngueje ue ja pere ndje, jo ja pungura eehapu dohe.

⁷ Nena oje tshi, nokutja ajishe mbi ua pere ndje, oja za mu ngueje.

⁸ Oshoka eehapu, di ua pere ndje, onde di ja pa, je di iteera, ja dimburura tshiri, nokutja onda za mu ngueje, jo ji iteera, nokutja ongueje ua tuma ndje.

Jesus ti indirire aapostoli.

⁹ Andi ji indirire. Itandi indirire uujuni, aaue, oombo mba ua pere ndje, oshoka jo ojohe.

¹⁰ Ajishe jandje ojohe, mbi johe ojandje, ngaje onda simanekerua mu jo.

¹¹ Kandi ri ue muujuni, ndere jo oje ri muujuni, nde ngaje otandi ja ku ngueje; Tate omujapuki, ja kareka medina rjohe, mba ua pere ndje, opo ja kare uo tshimue nga’sse.

¹² Sho nda ri pu jo, onde ja kareka medina rjohe. Mba ua pere ndje, onde ja gamena, inapu ka kana nand’ogumue mokati kauo, ohike tuu ngu omona guekano, omambo opo ga guanicue.

¹³ Ndere ngashiingika andi ja ku ngueje; ngaje andi tshi popi muujuni, opo ja kare je nenjanju rjandje rju udirira mu jo jene.

¹⁴ Onde ja pere ohapu johe; uo uujuni oue ja tonda, oshoka kaje shi jo muujuni, ngashi ngaje uo kandi shi guo muujuni.

¹⁵ Itandi indire, kutja u ja kuce mo muujuni, aaue matsa, andi indire u ja gamene kuuineji.

¹⁶ Jo kaje shi jo muujuni, ngashi ngaje uo kandi shi guo muujuni.

¹⁷ Ja japurica motshiri! Eehapu dohe odo otshiri.

¹⁸ Ngashi u unzira ndje muujuni, na ngaje onde ju unzira muujuni.

¹⁹ Ndere andi ji ijapurire muene, opo ja japurue motshiri.

Jesus ti indirire uo aahiteeri ajeshe.

²⁰ Ha mbej’ike andi indirire, aaue, ajeshe uo, mba taa ki iteera ndje nofu moru ohapu hauo.

²¹ Opo ajeshe ja kare tshimue ngashi ongueje Tate mu ngaje na ngaje mu ngueje opo ja kare uo tshimue mu sse; uujuni opo u iteere, nokutja ongueje ua tuma ndje.

²² Ehadimo ndi ua pa ndje, onde ri ja pa uo, opo ja kare tshimue nga’sse.

²³ Ngaje mu jo, ngueje mu ngaje, opo ja kare tshimuike tsha pua; uujuni opo u tshiue, nokutja ongueje ua tuma ndje, ngueje u jo ore, ngashi ua ri u ore ndje.

²⁴ Tate, onda ara uo, mpa ndi ri, jo ngeno uo opo je ri pu ngaje, mba ua pere ndje, ja tare ehadimo rjandje, ndi ua pa ndje, oshoka oua za u ore ndje, mank’uujuni ua ri inau tshitua.

²⁵ Tate, nguej’u uka, uujuni inau ku dimburura, ndere ngaje onde ku dimburura na mboka oja dimburura, nokutja ongueje ua tuma ndje.

²⁶ Ngaje onde jo ororera edina rjohe, notandi rjo orora nofu, opo ohore, ndji u ore ndje, hi kare mu jo, na ngaje mu jo.