Johannes 16 - Etestemente Epe ✠ 1951

ONTOPORUA 16. Jesus a hara okutuma Ombepo Ondjapuki

¹ Shino onde tshi mu rombuere, kamu shinde ndje.

² Jo taa ke mu tida mo meesinagoga; eno, erara otari ja, anuua, ngu te mu dipaga, ota rongere Karunga.

³ Shino otaa ke tshi mu ningira, oshoka kaa tu tshi, sse na Tate.

⁴ Ndere onde tshi mu rombuere, opo, erara nge rje ja, mu dimburukue, nokutja onde tshi mu rombuera shi.

⁵ Inandi tshi mu rombuera okuza ketameko, oshoka onda ri pu ne. Ndere ngashiingika ote hi ku ngu, ngu a tuma ndje. Ndere kakuna nand’ogumue mokati keni, ngu ta pura ndje: Oto hi peni?

⁶ Eemuenjo deni oda nik’uupongo nduno, oshoka onde tshi mu rombuera shi.

⁷ Ndere andi mu rombuere otshiri: Otshe mu oparera, sho te hi, oshoka ng’ite hi ko, Omupopiri ite ja ku ne, ndere nge te hi ko, ngaje otandi mu mu tumine.

⁸ Nge te ja ano, uujuni te u tshiuica, nokutja okuna uurunde nuujuki nepanguro.

⁹ Okuna uurunde, oshoka inaj’iteera ndje.

¹⁰ Okuna uujuki, oshoka ote hi ku Tate, nd’itamu mono ndje ue.

¹¹ Okuna epanguro, oshoka omupangeri guujuni mbu okua pangurua nare.

¹² Nojindji ji iri ondi nokujimurombuera, ndere ngashiingika itamu vuru okujuumbata.

¹³ Ndere nguija, nge e ja. Ombepo hOtshiri, ote ke mu ronga otshiri atshishe; oshoka ita popi mu he muene, aaue, atshishe shi tu uvu, te tshi popi, na shi tatshi ke ja nare, h’ote tshi mu uvicire.

¹⁴ H’ota ka simaneka ndje, oshoka ota ka kuca mu mbioka jandje, he te ji hokorora.

¹⁵ Ajishe mbi ja Tate ojandje uo. Ano onde mu rombuera: Ota ka kuca mu mbioka jandje, he te ji mu okororera.

Uupongo uaarongua moru okuha kua Jesus.

¹⁶ Okarara okatshona ke ri po, itamu mono ndje ue, ndere itshee tapu ke ja okarara okatshona, nde tamu ka mona ndje itshee, oshoka ote hi ku Tate.

¹⁷ Jamue po paarongua taa puracana: Okutja ngiini, sho ta ti ku sse: Okarara okatshona ke ri po, itamu mono ndje ue, ndere itshee tapu ke ja okarara okatshona, nde tamu ka mona ndje itshee, na shoka ote hi ku Tate?

¹⁸ Jo taa ti ano: Okutja ngiini, sho ta ti: Opena okarara okatshona, katu tshi shi ta ti.

¹⁹ Jesus okua dimburura ngaa, nokutja oja ara okumupura, nde ta ti ku jo: Otamu puracana, sho nda ti: Okarara okatshona ke ri po, itamu mono ndje ue, ndere itshee tapu ke ja okarara okatshona, nde tamu ka mona ndje.

²⁰ Tshiri, tshiri, andi mu rombuere: Otamu ka rira, ne tamu ka kema, ndere uujuni otau kara nenjanju. Otamu ka nik’uupongo, ndere uupongo ueni otau ka tshitukicua enjanju.

²¹ Omukiintu, nge e ri pokuvara, okua ponga, oshoka erara rje orja cika, ndere okanona nge ka varua, ita dimburukua ue uudigu moru enjanju, oshoka omuntu okua varua muujuni.

²² Na ne omua s’uupongo ngashiingika, ndere otandi ke mu mona itshee, nd’eemuenjo deni tadi ka kara nenjanju, rjo enjanju itamu ri kucua nand’okomuntu.

Erongo rjokuindira.

²³ Esiku ndioka itamu ka pura ndje ue. Tshiri, tshiri, andi mu rombuere: Nge tamu indire tsha ku Tate medina rjandje, ote tshi mu pe.

²⁴ Sigo onena inamu indira tsha medina rjandje. Indireni, nde tamu peua, opo enjanju rjeni ri ude pombanda.

²⁵ Shino onde tshi mu rombuera nda popja ejere, ndere okarara take ke ja, itandi mu rombuere ue ejere, aaue, otandi ke mu ororera Tate neehapu da fatuka.

²⁶ Esiku ndioka otamu ki indira medina rjandje, ndere itandi mu rombuere nokutja ngaje muene otandi mu indirire Tate.

²⁷ Oshoka Tate muene oku mu ore, oshoka ne omua ri mu ore ndje, ne mui iteera nokutja ngaje onda za mu Karunga.

²⁸ Ngaje onda zire mu Tate, nde ja muujuni, nitshee tandi cigi po uujuni, ngaje te tshuna ku Tate.

²⁹ Nd’aarongua taa ti ku he: Tara, ngashiingika oto popi da fatuka, ngueje ito popi ue ejere.

³⁰ Ngashiingika otu tshi tshi, nokutja ou tshi ajishe, ngueje ino pumbua okupura muntu; otui iteera nduno nokutja oua za mu Karunga.

³¹ Jesus ti i mo, ta ti ku jo: Ngashiingika omui iteera’ nduno?

³² Tareni, erara otari ke ja, rjo rje ja nokuri, ne otamu ka sharakanicua po; keshe tuu gumue kaandje, nde tamu cigi ndje po. Ndere kandi ri po ongaje ike, Tate ota kara pu ngaje.

³³ Shino onde tshi mu rombuera, opo mu kare mu nombiri mu ngaje. Muujuni otamu kara mu nuudigu uunene, ndere, inekereni, uujuni onde u sinda.