Johannes 14 - Etestemente Epe ✠ 1951

ONTOPORUA 14. Erareko rja Jesus.

¹ Eemuenjo deni inadi nik’uupongo! Ne omui iteera mu Karunga, iteerii ndje uo!

² Megumbo rja Tate omu nomatsari ogendji; ng’okua katshi ri ngiika, ando nde mu rombuera, te ti; oshoka andi hi ndi ke mu rongikidire omashara.

³ N’onda ha, ng’onde mu rongikidira omashara, ote garuka, ndi mu ire, opo ne uo mu kare hu ndi ri.

⁴ Hu te hi, omu tshi ko, nondjira mu hi tshi.

⁵ Nde Tomas ta ti ku he: Muene, katu tshi nani hu to hi, nd’ondjira otu hi tshi peni?

⁶ Jesus te mu jamukura: Ongaje ondjira, ngaje otshiri, ngaje omuenjo. Kapuna ngu ta hi ku Tate, ine endera mu ngaje.

⁷ Ng’okua mu tshi ndje, ando na Tate omu mu tshi. Ndere okonena tamu ke mu tshiua, ne mue mu mona.

⁸ Filipus ta ti: Muene, tu urukira Sho, sho tsha guana sse.

⁹ Jesus ta jamukura mo: Orure nda ri pu ne, ndere nanena inamu dimburura ndje? Filipus, ngu e uete ndje, na Tate oku mu uete. Oto ti ngiini ano: Tu urukira Sho?

¹⁰ Inamu iteera nani, nokutja ngaje ondi ri mu Tate, he Tate e ri mu ngaje? Eehapu dino onde di mu rombuera, inandi di popja mu ngaje muene. Ndere Tate, ngu e ri mu ngaje, he ta rongo iironga.

¹¹ Inamu iteera nani, nokutja ngaje ondi ri mu Tate, he Tate e ri mu ngaje?

¹² Ng’inamu iteera shi, iteerii ndje moru iironga jo jene. Tshiri, tshiri, andi mu rombuere: Ngu a hiteera ndje, niironga mbi te rongo, ote ji rongo, nde te ke ji ronga ji vure po, oshoka andi hi ku Tate.

¹³ Atshishe shi tamu indire Tate medina rjandje, andi tshi guanica, opo Tate a simanekerue mOmona.

¹⁴ Nge tamu indire ndje medina rjandje, andi tshi rongo.

¹⁵ Nge mu ore ndje, diginineni nduno iipango jandje.

¹⁶ Andi indire Tate, nde te ke mu pa Omupopiri a hiri, a kare pu ne sigoosigo.

¹⁷ Ombepo hotshiri. Uujuni itau vuru okuhituumba, oshoka kau hi uete, uo kau hi tshi; ndere ne omu hi tshi, oshoka otahi kara pu ne, ho tahi kara mu ne.

¹⁸ Itandi mu cigi po aacigua, aaue, andi garuka ngaa ku ne.

¹⁹ Okarara okatshona ke ri po, uujuni itau mono ndje ue. Nde ne otamu ka mono ndje, oshoka ote rumbu, na ne uo otamu ka rumba.

²⁰ Esiku ndija onamu dimburura nokutja ngaje ondi ri mu Tate na ne mu ngaje na ngaje mu ne.

²¹ Ngu e niipango jandje, he te ji diginine uo, ohe ngo, ngu e hore ndje. Nde ngu e hore ndje, oku orikue uo ku Tate, na ngaje ndi mu ore, ngaje andi mu ihororere.

²² Judas, ha kutja Iskariot, ta ti ku he: Muene, otshike tshi ri po, sho ua ara u tu ihororere, ka kutja uujuni?

²³ Jesus ta jamukura mo, ta ti: Nge puna ngu e hore ndje, ota ka diginina erongo rjandje. Tate uo oku mu ore, ss’otatu ja tu dike egumbo mu he.

²⁴ Ndere ngu ke hore ndje, ita diginine erongo rjandje. Nd’erongo, ndi mu uva, kari shi rjandje muene, aaue, orja nguka, ngu a tuma ndje, nokutja orja Tate.

²⁵ Shino onde tshi mu rombuera, manka ndi ri pu ne.

²⁶ Nd’Omupopiri, Ombepo Ondjapuki, ngu ta ku undurua ku Tate medina rjandje, ote ja e mu ronge ajishe, he e mu dimburukice ajishe, mbi nde mu rombuera.

²⁷ Ombiri andi mu cigire, ombiri handje andi hi mu pe; ha ngashi uujuni tau hi pe, tandi hi mu pe. Eemutima deni inadi ponga, do inadi mbandara.

²⁸ Omu uva, sho nde mu rombuera: Andi hi, nde tandi garuka ku ne. Nge mu ore ndje ngeno, ando na ne tamu njanjukua morua shi tandi hi ku Tate, oshoka Tate oku vure ndje.

²⁹ Ngashiingika onde tshi mu rombuera, manka inatshi ningua, opo mu iteere, nge tsha ningua.

³⁰ Itandi popi ue ku ne odindji, oshoka omupangeri guujuni mbu ote ja, ndere ke na na ngaje.

³¹ Ndere opo uujuni u tshiue, nokutja ngaje ndi ore Tate, na ngaje te rongo ngashi Tate a rombuera ndje: Cikameni nduno, tu eni!