Johannes 12 - Etestemente Epe ✠ 1951

ONTOPORUA 12. Jesus megumbo rja Lazarus.

¹ Omasiku kanekamue komesho gotshituci tsha Paska tshaajuda Jesus okui ire ku Betania, hu Lazarus e ri, ngu a ri a sa, ndere ta jumudua ku Jesus.

² Hoka taa mu terekere uurarero. Marta ta jakura. Lazarus ogumue gua mba taa kaatumba kotshiriro.

³ Nde Maria te eta mo otshijuma tshi nomagadi gokuguaajeka, ge nondiro. H’ota guaajeke eempadi da Jesus, nde te di ceta nomafufu gomutse gue. Egumbo arishe orju nda ezimba rjomagadi nga.

⁴ Gumue po guo maarongua je, Judas Iskariot, ngu te ke mu orora, ta ti:

⁵ Otshike omagadi ngano inaga randua po omandenari omacere gatatu, nde taga peua aacigona?

⁶ Shino ine tshi popja anuua a jeerera aacigona, aaue, osho a ri omufuci, h’a ri nokapunda keembongo, ta pungura shi tsha turua mo.

⁷ Jesus ta ti: Mu eceni, e tshi pungurire esiku rjefumbikiro rjandje.

⁸ Oshoka aacigona oje ri pu ne arushe, ndere ngaje itandi kara pu ne.

⁹ Aajuda ojendijendji sho je mu uvu, nokutja ohe e ri ko, oje ke ja ho, ha morua Jesus ike, aaue, oja ara uo okutara Lazarus, ngu a jumudua kuusi.

¹⁰ Aapristeri aakuruntu nde taa diradira okudipaga uo Lazarus.

¹¹ Oshoka aajuda ojendji oje ja morue, nashoka oji iteera mu Jesus.

Jesus ta ambererua mu Jerusalem.

¹² Esiku rja nofu ongundu onene haantu ohe ja kotshituci. Sho ju uvu, Jesus i itura mondjira a he ku Jerusalem.

¹³ Oja ndembura omaare, nde taa hi je mu tsakaneke, taa higida: Hosana, na simanekue ngu te ja medina rja Muene, mukuaniirua guIsrael.

¹⁴ Jesus ta ada okandongi, te ka rondo, ngashi kua tshangua:

¹⁵ Ino tira, mukadona gua Sion, tara, omukuniirua guohe ote ja, a ronda kokanomona kondongi.

¹⁶ Shino aarongua oja ri tango kaa tshu uvite, ndere Jesus sho a hadimicua, oje tshi dimburukua, nokutja otsha ri tshe mu tshangerua, sho tsha guanicua mu he.

¹⁷ Nd’aantu, mba ja ri pu he, sho a hicana Lazarus a ze mo mombira, e mu jumude, oje mu okorora.

¹⁸ Otsho ano aantu ji ire je ke mu tsakaneke, oshoka oju uvu nokutja okua rongo otshirongankondo shika.

¹⁹ Nd’aafariseji taa kundacana, taa ti: Kamu uete nani, nokutja itatu pondora ue tsha? Tareni, uujuni aushe otau mu randura.

Jesus naapagani.

²⁰ Mokati kongundu, ndji he ja kotshituci ja ka garikane, omua ri uo aapagani jamue.

²¹ Jo oje engene ku Filipus, ngu a za ku Betsaida mu Galilea, taa mu indire, taa ti: Muene, otua ara unene tu tare uo Jesus.

²² Filipus ta hi, te tshi rombuere Andreas, Andreas itshee na Filipus taa tshi rombuere Jesus.

²³ Jesus h’ote ja jamukura, ta ti: Erara orje ja, Omuna guOmuntu ta ka adimicua.

²⁴ Tshiri, tshiri, andi mu rombuere: Otshirja, ng’inatshi guira mevi tshi sire mo,

²⁵ Otatshi ikarere po tsho ike; ndere nge tatshi sire mo, otatshi vara iirja ojindji. Ngu e hore omuenjo gue, ote gu kanica po; ngu a tonda omuenjo gue muujuni mbu, ote gu upica komuenjo guarushe.

²⁶ Nge kuna ngu ta karere ndje, na randure ndje; hu ndi ri, nomukareri guandje hu ta kara. Nge kuna ngu ta karere ndje, Tate ote mu simaneke.

²⁷ Ngashiingika omuenjo guandje ogu nuumbanda; nandi tje ngiini? Tate, upica ndje merara ndika. Ndere morua shi nde ja merara ndika.

²⁸ Tate, adimica edina rjohe. Nde mpaka eui orja zi keguru, tari ti: Onda adimica, ngaje otandi ka adimica itshee.

²⁹ Aantu, mba ja cikama hu, nde taa huvu eui, oja ti: Kua ndunduma; jamue po: Omujengeli a popja na he.

³⁰ Nde Jesus ta jamukura, ta ti: Eui ndika inari ja morua ndje, aaue omorueni.

³¹ Ngashiingika epanguro otari ja muujuni; ngashiingika omupangeri guujuni mbu otu umbirua pondje.

³² Ndere ngaje, ng’onda jerucua kevi, ote shiri ajishe ku ngaje.

³³ Shino okue tshi popi okuepurura eso tari ka tja ngiini te ri si.

³⁴ Aantu jo taa jamukura mo, taa ti: Ss’otu uva mompango, nokutja Kristus ta ka kara sigoosigo. Oto ti ngiini ano: Omuna guOmuntu ota ka jerucua? Nguk’Omuna guOmuntu ore?

³⁵ Jesus ti i mo, ta ti: Erara eshupi ouara uujerere otau ka rumba mokati keni. Endeni, manka mu nuujerere kamu guirue keemurema; ngu te ende meemurema, ke tshi hu ta hi.

³⁶ Manka mu nuujerere, iteereni ano muujerere, opo mu ninge aana juujerere. Jesus sho e tshi popi, okua zi po, nde te jo orama.

Aajuda inaa hara okuiteera.

³⁷ Nand’a ronga iirongankondo ja tja ngii e ji ronga miipaci jauo, inaa hiteera mu he.

³⁸ Opo ohapu homuprofeti Isaias hi guanicue, sho ta ti: Muene, ore ti iteere euvico rjetu. Nokooko kua Muene okuo ororerua re?

³⁹ Jo ja njengua uo okuiteera, oshoka Isaias okua ti itshee:

⁴⁰ Okua ninga otshite momesho gauo, h’a kukutica eemuenjo dauo, kaa huete ue nomesho, jo kaa huvite ue neemutima, opo ji idirurure, h’e je erukice.

⁴¹ Shino Isaias okue tshi popja, sho a mona ehadimo rje, he te mu popi.

⁴² Naakuruntu ojendji oji iteera mu he, ndere moru aafariseji inaa tshe epurura, kaa tidue mo megongaro.

⁴³ Oshoka oja ri je hore esimano paantu komesho gesimano pu Karunga.

⁴⁴ He Jesus ti igida ano, ta ti: Ngu a hiteera ndje, ha ngaje a hiteera, aaue, onga ngu a tuma ndje.

⁴⁵ Ngu ta mono ndje, ota mono ngaa ngu a tuma ndje.

⁴⁶ Ngaje onde ja muujuni ng’uujerere, opo keshe ngu a hiteera ndje, ka kare meemurema.

⁴⁷ Nge kuna ngu tu uvu eehapu dandje, nde ite di diginine, ha ngaje tandi mu pangura, oshoka inii ja okupangura uujuni, aaue, ndi u upice.

⁴⁸ Ngu a dina ndje, h’ita tuumba eehapu dandje, oku na gumue, ngu te mu pangura. Ohapu, ndji nda popja, otahi mu pangura mesiku rjoshugunina.

⁴⁹ Oshoka inandi popja mu ngaje muene, aaue, ngu a tuma ndje, ohe a rombuera ndje shi ndi nokupopja nokuuvica.

⁵⁰ Ondi tshi tshi, nokutja otshipango tshe omuenjo guarushe. Shi te popi, otii tshi popi ngashi Tate a rombuera ndje.