Johannes 11 - Etestemente Epe ✠ 1951

ONTOPORUA 11. Jesus ta jumuda Lazarus.

¹ Omurumentu, edina rje Lazarus guo mu Betania, momukunda gua Maria nomumuahina Marta, okua ta arukua.

² Maria ohe ngu, ngu a gueekere Muene nomagadi giizimba, nde ta ceta po eempadi de nomafufu guomutse gue. H’omumuahina Lazarus okua ta arukua.

³ Aamuahina aakiintu taa tumu ko ku he, je mu rombuere: Muene, tara, ngu u ore, ota arukua.

⁴ Jesus, sho e tshu uvu, okua ti ku jo: Uuvu mbuka kau shi uokusa, aaue, ouokusimanekica Karunga, Omuna guOmuntu na simanekue mu uo.

⁵ Nde Jesus okua ri e hore Marta nomumuahina Maria na Lazarus.

⁶ Ndere nand’a huvu, nokutja ota arukua, okua kara ko itshee omasiku gaari hu a ri.

⁷ Te ja, ta rombuere aarongua je: Tu eni itshee ku Judea.

⁸ Nd’aarongua taa ti ku he: Muongi, aajuda opo ja ri je ku dipage, nde to hi ko itshee?

⁹ Jesus ta jamukura mo: Eeuiri desiku kadi shi nani omurongo na mbaari? Omuntu, nge te ende pomutenja, iti ipumu, oshoko oku uete uujerere uujuni.

¹⁰ Ndere ngu te ende uusiku, oti ipumu, oshoka uujerere kau ri na he.

¹¹ Sho e tshi popi shi, okua ti ku jo: Lazarus, kuume ketu, a koca. Nde ngaje oko te hi ndi ke mu pendure mo meemposi.

¹² Jo otsho taa ti ku he: Muene, ng’okua koca, te eruka ngaa itshee.

¹³ Jesus h’ota popi okusa kue, jo okua je tshi, ota popi okukoca hu kouara.

¹⁴ H’otsho ano te ja rombuere tshiri: Lazarus a sa.

¹⁵ Ndere onda njanjukua morueni, shi kanda ri ko, opo mu iteere. Naangashiingika tu dengereni eempadi ku he.

¹⁶ Tomas, ngu a rukua uo omukuanambuju, ta rombuere aarongua aakuauo: Tu eni uo, tu se na he!

¹⁷ Jesus okue ja ko, nd’okue mu ada a ninga omasiku gaane mombira.

¹⁸ Betania hi ri popepi na Jerusalem, peestadia omurongo na ntano.

¹⁹ Aajuda ojendji okua je ja uo ku Marta na Maria je je ekereke morua Lazarus.

²⁰ Marta hera a huvu, nokutja Jesus ote ja, okue mu matukirire e ke mu tsakaneke, nde Maria a kara a kaatumba megumbo.

²¹ Marta h’ota rombuere Jesus: Muene, ng’okuaj’omo ua ri muka, ando mumuameme ina sa.

²² Ndere nanena ondi tshi ngaa, nokutja Karunga ote ku pe ajishe, mbi to mu indire.

²³ Jesus te mu jamukura: Mumuanjoko ota ka jumuka.

²⁴ Marta ti i mo, ta ti: Ee, ondi tshi tshi, ona jumuka mejumuko rjesiku rjoshugunina.

²⁵ Nde Jesus ta ti: Ongaje ejumuko, ngaje omuenjo. Ngu a hiteera ndje, ota kara e nomuenjo, nando ona kara a sa.

²⁶ Na ngu ta rumbu, he a hiteera ndje, ke na mpa na mono eso sigororoosigo. Oue tshi iteera shino?

²⁷ He ta jamukura: Eno, Muene, ondi iteera nokutja onguee Kristus, Omumua Karunga omunamuenjo, ngu e ja muujuni mbu.

²⁸ Konima heehapu dika h’ota tondoka, ta hi ti icana omumuahina Maria, nde te mu nongonene ta ti: Omuongi e ja, nder’ote ku icana.

²⁹ Sho e tshu uvu, okua jambuka, nde ta hi ku he.

³⁰ Oshoka Jesus ina cika manka omukunda. Natango okua ri hu a tsakanekerue ku Marta.

³¹ Aajuda, mba ja ri pu he megumbo je mu ekererice, sho ja mono, Maria a cikama ta hi kondje, oje mu randura, taa ti: Ota hi kombira a ka rire.

³² Maria sho a ciki hu Jesus kua ri, okui ihumbire keempadi de, nde ta ti ku he: Muene, ng’okuaj’omo ua ri muka, omumuameme ando ina sa.

³³ Jesus sho e mu mono ta riri, jo aajuda, mba je ja na he, uo taa riri, okua furuka momuenjo, nde ta kekama muii.

³⁴ Mpa ta ti: Omue mu tura peni? Jo otaa ti: Muene, ira u tare.

³⁵ Jesus ta riri.

³⁶ Jo aajuda taa ti: Tareni, okua ri e mu ore tshicikepeni?

³⁷ Jamue po taa puracana: Ngu a pashura omesho ga nguija ngu a varua omuposi, ngeno ina pondora okuninga nguka ka se?

³⁸ Jesus okua kekama itshee muii momuenjo, sho e ja kombira. H’oha ri mekorombombo rja siikirua emanja.

³⁹ Jesus ta rombuere: Jerucii po emanja ndio. Nde Marta, mumuahina gua nakusa, ta ti ku he: Muene, okua nika, oshoka oku na mo nena omasiku gaane.

⁴⁰ Jesus ta jamukura mo: Inandi ku rombuera nani, nokutja ngu ui iteera, oto ka mona eenkondo da Karunga?

⁴¹ Jo taa jeruca ko emanja. Ndere Jesus ta rigamene keguru, he ta ti: Tate, andi ku amberere, sho ui iteera ndje.

⁴² Ngaje ondi tshi nokuri, nokutja arushe oto iteere ndje, ndere shika onde tshi popi, opo aantu, mba je ri mpaka, ji iteere, nokutja ongueje ua tuma ndje.

⁴³ Sho e tshi popi shi, okui igida nokuri muure, ta ti: Lazarus za mo!

⁴⁴ Naanzija omusi h’ota zi mo, a mangua nomarapi komake no keempadi, otshipara tshee tsha siikirua notshikajua tshokuipugura. He Jesus te ja rombuere: Mu ditureni, nde tamu mu eca a he.

Aafariseji taa kundacana Jesus a se.

⁴⁵ Aajuda ojendji, mba je ja ku Maria na Marta, sho ja mono shi tsha ningua ku Jesus, oji iteere mu he.

⁴⁶ Ndere jamue po oji ire kaafariseji, nde taa je epururire shi tsha ningirue ku Jesus.

⁴⁷ Aapristeri aakuruntu naafariseji jo taa hicanica otshira otshinene nde taa ti: Sse natu ningeni tshee, oshoka omuntu nguka ota rongo iirongankondo ojindji?

⁴⁸ Ng’otue mu eca a he, ajeshe otaa hiteere mu he, nde aaroma taa ke ja, taa kuca po otshirongo tshetu naantu.

⁴⁹ Gumue guo mu jo, edina rje Kaifas, ngu a ri omupristeri omukuruntu momuvo ngu, ta ti ku jo:

⁵⁰ Kamu tshi nande, ne itamu diradira, nokutja oshuepo, omuntu gumue ngeno a sire aantu tshi vure sho ajeshejeshe taa jonana po.

⁵¹ Shino ine tshi popja mu he muene, aaue, oshoka okua ri omupristeri omukuruntu omuvo nguka, okua shunganeke, nokutja Jesus ota ka sira aantu.

⁵² Ha kutja aantu mbo ike, aaue, opo a gongere uo aana ja Karunga, mba ja sharakana, ja ninge tshimue.

⁵³ Okuza kesiku ndioka oja tanterere okumudipaga.

⁵⁴ Otsho ano Jesus ka ri ue he ende mo miipaci jaajuda, nde ta hi kiihende jombuga, komukunda, edina rjago Efraim, hu ta kara naarongua je.

⁵⁵ Ndere otshituci tsha Paska tshaajuda otsha ciki, nd’aantu ojendji jotshirongo tshika oji ire kotshituci tsha Paska ku Jerusalem ji ijapure.

⁵⁶ Jo taa kongo ano Jesus, taa kundacana, sho ja cikama montempeli: N’otamu ti ngiini? Ote ja tuu kotshituci?

⁵⁷ Ndere aapristeri aakuruntu naafariseji oja tumu eraka, nokutja, nge kuna ngu e tshi Jesus hu e ri, e tsho orore, opo ja tshiue okumukuata.