Johannes 10 - Etestemente Epe ✠ 1951

ONTOPORUA 10. Omusita omuanaua Jesus.

¹ Tshiri, tshiri, andi mu rombuere, ngu ta hi motshigunda tsheenzi, ina pita motsheero, ndere omompito hi iri ta rondere mo, ohe ombudi, h’omufuci.

² Ndere ngu ta piti motsheero, ohe omusita gueenzi.

³ Omurangeri guotsheero ote mu egurura, nd’eenzi tadi uvu eui rje, h’oti icana eenzi de muene omadina gado, nde te di piica mo.

⁴ Ng’a piica eenzi de, ote di tetekerere, do tadi mu randura, oshoka odi tshi eui rje.

⁵ Do itadi randura omukuiirongo, aaue, otadi h’onda po, oshoka eui rjomukuiirongo ngu kadi ri tshi.

⁶ Ejere ndika okue ri ja rombuere, ndere kaa huvite ko, shi ta popi ku jo.

⁷ Ano te ja rombuere itshee: Tshiri, tshiri, andi mu rombuere: Ongaje otsheero tsheenzi.

⁸ Ajeshe mba ji ire ndje komesho, nand’ojendji, ojo aafuci niimpuru, nd’eenzi inadi ju uva.

⁹ Ongaje otsheero. Omuntu ngu ta hi mo, ta piti mu ngaje, ohe tu upicua. Oti i mo, he ta zi mo nokumona uusita.

¹⁰ Omufuci oti ir’ike a ka jake, he a dipage, a shanagure, ndere ngaje onde ja, opo ja mone omuenjo, jo je gu mone nerooro.

¹¹ Ongaje omusita omuanaua. Omusita omuanaua ota gandjere eenzi de omuenjo gue.

¹² Ndere nakurira, ngu ke shi musita, neenzi kadi shi de, e uete embungu tari ja, ota cigi po eenzi, he ta h’onda po. Nd’embungu tari ru, rjo tari sharakanica eenzi.

¹³ Ndere nakurira ta h’onda po, oshoka ohe nakurira, na sho eenzi ke na na do.

¹⁴ Ongaje omusita omuanaua, ngaje ndi tshi dandje, do dandje di tshi ndje.

¹⁵ Ngashi Tate e tshi ndje, na ngaje ondi tshi Tate, ngaje ote gandjere eenzi dandje omuenjo guandje.

¹⁶ Ondi n’itshee eenzi di iri, di kadi mo motshigunda tsheenzi shi. Na dika uo ondi nokudeeta, nde tadu uvu eui rjandje, po tapu kara otshigunda tshimue nomusita gumue.

¹⁷ Otsho Tate oku ore ndje, oshoka ote gandja omuenjo guandje, ngaje ndi gu tuumburure itshee.

¹⁸ Kakuna ngu te gu kuca ndje, aaue, ongaje muene tii gu gandja, nondi neenkondo okugugandja nondi neenkondo okugutuumburura. Omurombo ngu onde gu peua ku Tate.

¹⁹ Mpaka aajuda oja pengacana itshee morua shi a popi shi.

²⁰ Ojendji jo mu jo oja ti: Oku nombepo ombuineji, ke neendunge, otamu mu puakenene tshee?

²¹ Jamue po taa ti: Eehapu dika kadi shi domuntu e nombepo ombuineji. Ombepo ombuineji ngeno otahi vuru nani okupashurira omuposi omesho?

Pejapurico rjontempeli.

²² Opua ri pu notshituci tshejapurico rjontempeli mu Jerusalem pokufu.

²³ Jesus te ende montempeli morupanda rua Salomon.

²⁴ Aajuda taa mu gongarere, nde taa ti ku he: Sigo unake oto eca eemuenjo detu di kare kadi nuuino?

²⁵ Jesus h’ota jamukura mo: Otii tshi mu rombuere ngaa, ndere itamu iteere. Jironga mbi te rongo medina rja Tate, otaji okorora ndje.

²⁶ Ndere itamu iteere oshoka kamu shi eenzi dandje.

²⁷ Eenzi dandje do tadi uvu eui rjandje, ondi di tshi, do otadi rambarara ndje.

²⁸ Andi di pe omuenjo guarushe, do itadi kana sigoosigo no kakuna ngu te di kuca motshikasha tshandje.

²⁹ Shi nda peua ku Tate, otshi vure ajishejishe, nde kakuna ngu ta vuru okutshijeka motshikasha tsha Tate.

³⁰ Sse na Tate otshimue.

³¹ Mpa aajuda oja jeda omamanja je mu dipage.

³² Jesus h’ota guire mo, ta ti: Iironga iiuanaua ojindji ja Tate onde ji mu urukira. Omoru otshironga tshi ini mua ara mu dipage ndje nomamanja?

³³ Aajuda taa jamukura: Ha kutja moru otshironga otshiuanaua tatu ku dipaga, aaue, ndere moru etshekokarunga, oshoka ngueje omuntu oui ininga muene Karunga.

³⁴ Jesus te ja rombuere, ta ti: Mompango heni inamu tshangua mo nani, taku ti: Onde mu rombuere one ookarunga?

³⁵ Nge ha ruka ookarunga ajeshe, mba ja romborua ku Karunga — nde ompango itahi vuru okudimua po —

³⁶ Ano otamu rombuere ngiini ngu a japurua ku She, ngu e mu tuma muujuni: oto tsheke Karunga, oshoka onda tire: ongaje Omumua Karunga?

³⁷ Ng’itandi rongo iironga ja Tate, itamu iteere.

³⁸ Ndere nge tandi ji rongo, iteereni; ng’inamu ara okuiteera ndje, iteereni iironga, opo mu dimburure, ne mu iteere, nokutja Tate oku ri mu ngaje nangaje ndi ri mu Tate.

³⁹ Mpa oja ara okumukuata, ndere he ta zi mo miikasha jauo, nde ta hi.

⁴⁰ He ta tshuna haandija ha Jordan keshara, mpo Johannes kua ri a tshatsha tango, nde ta kara ko.

⁴¹ Ojendji oje ja ku he, taa ti: Johannes ina ronga iirongankondo.

⁴² Ndere ajishe mbi Johannes e mu popja, ojotshiri. Nd’ojendi je mu iteera.