Johannes 1 - Etestemente Epe ✠ 1951

ONTOPORUA 1. Jesus a za ku Karunga, he Karunga.

¹ Poshimbi opua ri Ohapu, hOhapu oha ri pu Karunga, he Karunga ohe a ri Ohapu.

² Ndjika oha ri poshimbi pu Karunga.

³ Ajishe oja tshitua ku ho, po kapu na tsha tsha tshitirue, shi inatshi tshitua ku he.

⁴ Mu he omua ri mu nomuenjo, go omuenjo ogua ri uujerere uaantu.

⁵ Uujerere mbu hau jerere mo meemurema, ndere eemurema inadi u kuata.

⁶ Tapu ja omuntu, a hundurua ku Karunga, edina rje Johannes.

⁷ Nguka okua ri e ja okuokorora, a hokorore uujerere, opo ajeshe ji iteericue ku he.

⁸ Ka he a ri uujerere, okua ri ike omuokorori guujerere.

⁹ Uujerere uotshiri, mbu tau minikire omuntu keshe, ngu te ja muujuni.

¹⁰ Omuujuni a ri, uo uujuni ohe e u tshita, ndere uujuni inau mu dimburura.

¹¹ Okui ire maandje, nde mbo jaandje inaa mu tuumba.

¹² Ndere ajeshe, mba je mu tuumba, okue ka pe eenkondo, ja ningi aanona ja Karunga, nokutja ombeja, mba taj’iteere medina rje.

¹³ Mb’inaa za mombinzi no meharo rjonjama no meharo rjomurumentu, ndere oja varua mu Karunga.

¹⁴ Ho Ohapu oha ninga omuntu, ho ha kara mokati ketu; ss’otua mona ehadimo rje, ehadimo rjOnakuvaru’oh’ike gua She, a huda oshenda notshiri.

¹⁵ Johannes okue mu okorora, sho ti igida ta ti: Ohe ngu nde mu tire: Ngu ta randura ndje, okua ri komesho gandje, oshoka okua ri ko, manka ngaje nda ri kandi po.

¹⁶ Merooro rje otua peua mo atushe oshenda noshenda.

¹⁷ Oshoka ku Moses ompango oha gandjua, ndere ku Kristus Jesus oshenda notshiri oje tu etua po.

¹⁸ Kakuna ngu a mona Karunga, nandoodiro. Onakuvaru’oh’ike, ngu e ri mekoro rja She, okue mu orora.

Ehokororo rja Johannes.

¹⁹ Ehokororo rja Johannes orjo tuu ndika: Aajuda jo mu Jerusalem sho ju unzire ku he aapristeri naaleviti je mu pure ja tje: Onguee re?

²⁰ Nde he te epurura, h’ina patana, ta ti: Ngaje kandi shi Kristus.

²¹ Jo taa mu pura itshee: Onguee re ano? Shira Elias? He ta ti: Aaue, ha ngaje. Onguee nani omuprofeti? Ta jamukura: Aaje.

²² Jo taa ti nduno ku he: Onguee re, tu ka fare ejamukuro ku mbeja, mba je tu tumine? Otu itire ngiini nguee muene?

²³ H’oti i mo ta ti: Ongaje eui rjomuigidi mombuga. Parereni Muene ondjira, ngashi omuprofeti Isaias a tire.

²⁴ Aatumua oja zire maafariseji.

²⁵ Jo taa mu pura itshee: Otshike nduno to tshatsha, nge ku shi Kristus nenge Elias nenge omuprofeti?

²⁶ Johannes te ja jamukura, ta ti: Andi tshatsha nomeja, ndere mokati keni omua cikama gumue, ngu kamu mu tshi.

²⁷ Ohe tuu, ngu ta randura ndje, ohe ngu a ri komesho gandje, ngaje inande ereka okuditura nand’omunja guorukaku rue.

²⁸ Mbika oja ningirue ku Betania, haandija ha Jordan, hu Johannes a ri ta tshatsha.

²⁹ Esiku rja nofu Johannes sho a mono Jesus te ja ku he, okua ti: Tareni Onzigona ha Karunga, ndji tahi kuca po eendjo duujuni.

³⁰ Ohe ngoo, ngu kua te rombora, te ti: Otaku ja omuntu, ta randura ndje, ngu a za tango. Okua ri ko, manka nda ri kandi ko.

³¹ Kanda ri ndi mu tshi, ndere onde ja okutshatsha nomeja, opo he a horoke mu Israel.

³² Johannes h’oto okorora ta ti: Onda mona Ombepo ha zi meguru ha fa onguti, nde tahi mu tenene.

³³ Kanda ri ndi mu tshi; ndere ngu a tuma ndje okutshatsha nomeja, ohe a rombuera ndje: One ka mona Ombepo ahi zi meguru, ho tahi mu tenene, ohe ngu ta tshatsha nOmbepo Ondjapuki.

³⁴ Onde tshi mona, ngaje nde tshi tshiuica, nokutja nguka Omumua Karunga.

Aarongua jotango.

³⁵ Ngaangura Johannes okui ire ko itshee, ta cikama naarongua jaari.

³⁶ Sho a mono Jesus te ende po, okua ti: Tareni, Onzigona ha Karunga.

³⁷ Aarongua jaari mba, hera je tshu uvu, jo taa randura Jesus.

³⁸ Nde Jesus ta pungurukire ku jo. Sho a mono, nokutja oje mu randura, okua ti ku jo: Otamu kongo tshee? Jo taa ti: Rabbi, otaku ti: Muongi, kaandjohe okuni?

³⁹ He ta jamukura, ta ti ku jo: Ireni, mu tare! Jo taa hi na he, taa mono uo mpo tu uhara, nde taa huhara na he. Okua ri kouiri ontimurongo.

⁴⁰ Andreas, mumuahina ha Simon Petrus, gumue gua mba jaari, mba je tshu uva ku Johannes, na mba kua taa mu randura.

⁴¹ H’ota tsakaneke tango mumuahina Simon, nde ta ti ku he: Ss’otua mona Messias-otaku ti Kristus.

⁴² H’ote mu fara ku Jesus. Jesus te mu tara, nde ta ti: Onguee Simon, omumua Jonas, kongashiingika oto rukua Kefas nokutja Emanja.

⁴³ Ngaangura Jesus okua ara okuza po mpo a huke ku Galilea; he ta tsakanene na Filipus. Jesus h’ote mu rombuere: Randura ndje!

⁴⁴ Filipus okua zi ku Betsaida, komukunda gua Andreas na Petrus.

⁴⁵ Nde Filipus itshee ti itsu mu Nathanael, ta ti ku he: Ss’otue mu mona, ngu a tshangerue ku Moses mompango no kaaprofeti: Jesus Omumua Josef omunazareta.

⁴⁶ Natanael te mu pura: Mu Nazaret otamu zi otshaanaua ngaano? Filipus ta jamukura: Ira u tare!

⁴⁷ Jesus sho a mono Natanael te je, okua ti: Tara, nguka omuisraelita tshiri, mu kamu neruado.

⁴⁸ Natanael h’ote mu pura: Oua tshiua ndje peni? Jesus te mu jamukura: Filipus sho e ku icana, onda adikua nde ku mona nare u ri momukuju.

⁴⁹ Natanael h’oti i mo ta ti: Rabbi, ngueje Omumua Karunga, ongueje omukuaniirua gua Israel.

⁵⁰ Jesus ta ti: Osho nda ti, onde ku monene momukuju, opo nduno ui iteera. Oto ka mona iinima iinene ja pitirira mbika.

⁵¹ Ta ti ku he: Tshiri, tshiri, andi mu rombuere, onamu ka mona eguru rje eguruka naajengeli taa zi mo, jo taa tenene kombanda hOmuna guOmuntu.