Jakobus 5 - Etestemente Epe ✠ 1951

ONTOPORUA 5. Aajamba taa kumagidua.

¹ Eno tuu, jajamba ne, rireni nokuriraganena iishuna jeni, mbi taji ke mu ada.

² Uujamba ueni tau oro, neenguuo deni tadi riua kuucici.

³ Otshingoldi notshisilveri tsheni otsha ning’iikogo. Jo iikogo mbika otaji ke mu pa uusama, jo taji ri onjama heni, ja f’omuriro.

⁴ Tareni, ondjambi haarongi mba ja teja momapja geni, ndji mue ja tindira, otahi kugu. Nonkugo hauo oha ada omakutsi ga Muene gueengundu daakuiita.

⁵ Kombanda hevi ne mua kara nerumbo. Nokuguanica uuharu ueni ne mua ondodera eemuenjo deni esiku rjokutserua.

⁶ Omujuki omue mu pangura, nde ne mue mu dipaga. He ine mu tinda.

⁷ Jamuameme, kareni ano nokuididimika sigo okejo rja Muene. Tareni omurongi guepja oha tegerere iihimati iitoue jevi. Oha tege nonteni sigo oja mono ovura hotango na ndji ha shugunina.

⁸ Otsho na ne uo kareni nonteni, korekeni eemuenjo deni, oshoka ejo rja Muene ori ri popepi.

⁹ Inamu pacana uusama, jamuameme, kamu pangurue. Tareni omupanguri okua cikama potsheero.

¹⁰ Jamuameme, mokueepekua no mokuididimika orereni otshoorerua tshaaprofeti, mba ja popja medina rja Muene.

¹¹ Tareni, ss’atu amberere aanerago mba j’ididimika. Ehididimiko rja Job omue ri uva, ne omu tshi eshuriro ndi Muene e mu ningira, oshoka Muene oku nondjeerera nesiroshenda.

¹² Komesho giinima ajishe, jamuameme, inamu gana nenge keguru, nenge kevi, nenge egano rirue. Nge mua ti “eno” natshi kare “eno”. Nge mua ti “ajee” natshi kare “ajee,” ne kamu pangurue.

¹³ Nge oku na guamue ta nik’uupongo, na garikane. Ngu e ri naua, na amberere.

¹⁴ Nge oku na gumue guomune ta arukua, n’icane aapristeri jeklesia. Jo je mu garikanene, jo je mu guajeke omagadi medina rja Muene.

¹⁵ Negarikano rjehiteero otari upica omuvu. Muene ote mu pendura. Na nge e na eendjo, otadi mu diminua po.

¹⁶ Okororeracaneni eendjo deni, ne mu garikanenacane, opo mu upicue, oshoka okugarikana kuomujuki nokudiginina otaku vuru otshindji.

¹⁷ Elias okua ri omuntu koshi hotshipango tshokueepekua ngashi sse uo. Okua garikana nuudiginini, ovura kahi roke ue pevi ndika. Nde ovura inahi roka ue eemvo ndatu neemuedi kanekamue.

¹⁸ Okuza mpoka okua garikana itsheue, nde eguru rja gandja ovura nevi orja menica iihimati jarjo.

¹⁹ Jamuameme, nge oku na gumue t’idirururica ngu a puka kotshiri,

²⁰ na tshiue, nokutja ngu ta garura omurunde kondjira hepuko, ota upica omuenjo gue keso, nde ta siikire omajonaguro ogendji.