Jakobus 4 - Etestemente Epe ✠ 1951

ONTOPORUA 4. Inamu fa aantu jopajuni.

¹ Orugodi neendjuma deni ohadi zi peni? Itadi zi nani muuharu ueni mbu au kondjo miikuarutu jeni?

² Omua aruka, nde itamu peua tsha. Ohamu dipaga, amu sokasheshe, nde itamu vuru oku tshi akana. Ohamu umana, amu kondjo, nde itamu vuru okuirikorera tsha, oshoka kamu garikana.

³ Otamu indire ndere itamu peua tsha, oshoka amu indire nomadiradiro omiineji, okutja uuharu ueni nau kuticue.

⁴ Jahonderi ne, kamu tshi nani nokutja uukuume u’uujuni mbuka ouo uutondi ua Karunga? Ano keshe ngu a hara kuninga kuume kuujuni mbuka ota ka ninga omutondi gua Karunga.

⁵ Nenge omu tshi nokutja omatshangua otaga ti ouara: “Ombepo ndji ha turua mu sse oha gama nani kokasheshe?”

⁶ Aaue, otahi gandja oshenda ohindji. Otsho tsha tiua: “Karunga oku nondumbo naanantsinu, nde aahitshonopeki ote ja pe oshenda.”

⁷ Ano vurikeni ku Karunga. Itekeni omusatana, he e mu he ondapo.

⁸ Engeneni ku Karunga, he a hengene ku ne. Jerekeni omake geni, jarunde ne, ceteni eemtima deni, jantu ne jeemuenjo mbari.

⁹ Jemateni, seni uupongo rireni. Eendjora deni di ninge eendira, enjanju rjeni ri ninge uupongo.

¹⁰ Itshonopekeni ku Muene, nde he ote ke mu nenepeka.

¹¹ Inamu rundiracana jamuameme. Ngoka ta rundire mumuahina, nenge ta pangura mumuahina, ota rundire ompango he ta pangura ompango. Ndere nge to pangura ompango, nena ku shi omuguanici, aaue, omupanguri guaho.

¹² Ndere opu na gumuike ngu a gandja ompango, ngu ha pangura, ngu e neenkondo dokushundura no dokuupica.

¹³ Ndere ngueje, ongue’re nduno sho ho pangura mukueni? Tareni, ohamu ti: “Nena nenge ngura otua ara tu he kotshirando shika, tu menekere ko omuvo gumue, tu ka tshingice nokurikora omariko.”

¹⁴ Ndere kamu tshi shoka atshi etua kesiku rjangura.

¹⁵ Okurumba kueni pevi ndika okutshike? Okuo oruici ndu ru uetikue okarara okatshona, nde taru andjagana. Shuepo okupopja: “Muene nge e tshi ara, nasse nge tu nomuenjo, otua ara tu ka ronge shika nenge shijaka.”

¹⁶ Ndere nena amu itanga ontsinu heni. Okuitanga kua tja ngaaka okuineji.

¹⁷ Ano keshe ngu e tshi okuronga uuhanaua nde ite tshi ningi, ohe omurunde.