Jakobus 3 - Etestemente Epe ✠ 1951

ONTOPORUA 3. Kotokeni pokupopja.

¹ Jamuameme, inamu kembadara ojendjijendji ja ninge aarongi jeehapu. Omu tshi nokutja mboka otaa purua mepanguro edigu.

² Ss’atusheni ohatu puka miinima ojindji. Ndere ngu ka puka meehapu ohe omurumentu a guana a pua. Ota vuru okupangera orutu rue arushe.

³ Nge atu tura iitomo momakana guupuka, ou vurike ku sse, ss’atu shingi uo orutu ruauo arushe.

⁴ Tara uo omatembameja, nanto omaneenene, nanto haga undurua keembepo eedigu, otaga shingua kotshipungururico otshitshona hoka omushingi e ga arera.

⁵ Otsho uo eraka, nanto otshikuarutu otshitshona, ari rongo iinima iinene. Tara omuriro nanto omutshona, otagu vuru okusameka omuguru omunene.

⁶ Eraka orjo uo omuriro, rjo uujuni u’uda onjanja. Mokati kiikuarutu jetu eraka ori neenkondo dokunjateka orutu arushe, dokusameka eendjenda detu okuza kokuvarua kuetu, rjo rjene nge rja samekua komuriro guarushe.

⁷ Omarudi ageshe giirikama, geedira, gomajoka no giikuauo ajishe otaga vuru okudeurua, nde ga deurua tshiri kaantu.

⁸ Ndere eraka itari vuru okudeurua komuntu, orjo uuhineji mbu kau nevuriko, rj’uda uuzigo mbu au dipaga.

⁹ Onarjo atu amberere Karunga na Tate, no narjo atu tuku aantu ja tshitua otshifeca tsha Karunga.

¹⁰ Mokana kumue amu zi ehamberero netuko. Katshi ningue ngaano jamuameme.

¹¹ Monzo himue hocicija otamu zi nani omeja omatoue nomaruru?

¹² Jamuameme, omukuju otagu vuru okuiima eemono, nenge omuvinju eenkuju? Otsho omucima omururu itagu vuru okuvira omeja omatoue.

¹³ Ore guomune onkurungu e neemkaro eemhanaua? Na orore iironga je meendjenda de eembuanaua mengungumano rjuunongo.

¹⁴ Ndere nge omu nuukodi uururu neendjuma meemtima deni, inamu itanga nokupopja iirombo motshipara tshotshiri.

¹⁵ Uunkurungu mbuka kau shi mbu tau zi kombanda, aaue, mbu uopajuni, uopanjama uo uopamusatana.

¹⁶ Oshoka apeshe mpo pu nuukodi neendjuma, opu nevundakano nuuhineji aushe.

¹⁷ Uunkurungu mbu au zi kombanda, otango ouo ua jera, ou nombiri uo, kau nuuntsa, kau neembata, u’iteera uuhanaua, u’uda esiroshenda niihimati iihanaua, kau tokora ouara, uo kau nekojuuko.

¹⁸ Otshihimati tshuujuki atshi kunua mombiri ku mboka haa diginine ombiri.