Jakobus 2 - Etestemente Epe ✠ 1951

ONTOPORUA 2. Iironga iihanaua.

¹ Jamuameme, sho mu’iteera Muene guesimano Jesus Kristus, nena inamu joorora aantu komarupe gauo.

² Omurumentu ngu a zara okanane kotshingoldi neenguuo doparerera, nge ta hi motshigongi tsheni, mo tamu ja uo omucigona, a zara eenguuo eembuineji,

³ na ne amu tara nguka a zara eenguuo doparerera, amu ti ku he: “Kaatumba mpaka peshara ehanaua,” komucigona amu ti: “Cikama ngueje hui” nenge “kaatumba mpaka potshipundi tshandje tshokeempadi,”

⁴ nena nduno inamu joorora memtima deni, mua pangura komadiradiro omiineji?

⁵ Puakeneni, jamuameme aahorike unene. Karunga in’ogorora nani aacigona juujuni mbuka ja ninge aajamba mehiteero naacigururi jotshirongo shi Karunga a rombuerera mboka je mu ore?

⁶ Ndere ne omua dina omucigona. Kaa shi aajamba mba haa mu epica, jo haa mu fara kaapanguri?

⁷ Ha jo haa tsheke nani edina ndi rja simana, rjo orjo ndi mua rukirua?

⁸ Ano nge tamu guanica otshipango tshuukuaniirua, ngashi etshangua ari ti: “Hora mukueni ngashi u’ihore muene,” otamu rongo naua.

⁹ Ndere nge amu joorora aantu komarupe gauo, amu ningi ondjo, nompango ahi mu ti, ne aajoni.

¹⁰ Oshoka ngu ha diginine ompango ahishe, he ta dini otshipango tshimue, ota jono ku ajishe.

¹¹ Oshoka he ngu a tire: “Ino ondera,” he okua tire uo: “Ino dipaga.” Ano ngueje nge ito ondere, ndere oto dipaga, ua ning’omujoni guompango.

¹² Popjeni ne rongeni nga mboka haa pangurua kompango hemangururo.

¹³ Oshoka epanguro itari sire oshenda ngoka ina sir’oshenda. Omunesiroshenda ka tira epanguro.

¹⁴ Otatshi kuaca tshike jamuameme, nge ku na gumue ta ti: ondi iteera, ndere ke niironga? Ehiteero otari vuru oku mu upica?

¹⁵ Nge ku nomumuameme omurumentu nenge omumuameme omukiintu ke na tsha tshokuzara, ke neendia di e di pumbua keshe esiku,

¹⁶ ndere gumue guomokati keni ta ti: “Indeni nombiri, shushurukueni, ikuticeni,” nde ne itamu ja pe sho ja pumbua korutu, otatshi kuaca tshike?

¹⁷ Otsho ehiteero orja sa murjo rjene, nge kari niironga.

¹⁸ Eno otaku vuru okutiua ku nima: “Ngueje ou nehiteero, ngaje ndi niironga.” Urukirandje ehiteero rjohe ndi kari niironga, ngaje nda ara ndi ku urukire miironga jandje ehiteero.

¹⁹ Ngueje u’iteera Karunga gumuike. Onaua tshiri. Ndere aasatana oje tshi iteera uo, nde jo ohaa kekama.

²⁰ Oua ara nduno oku tshi dimburura nena, muntu ngueje, omucece, nokutja ehiteero ndi kari niironga orja sa?

²¹ Tate hetu Abraham ina ninga omujuki moru’iironga, sho a gandja omona gue Isak ng’oshura kombanda hohaltari?

²² U uete ko ano nokutja ehiteero orja ronga puamue niironga? Ehiteero orja ninga rja guana rja pua moru’iironga?

²³ Otsha guanicua shoka tsha tiua momatshangua: “Abraham oku’iteera Karunga”, rjo rje mu jarurirua uujuki, nde h’a rukua kuume ka Karunga.

²⁴ Otsho amu mono naua nokutja omuntu ota ningi omujuki kiironga, ha kehiteero ike.

²⁵ Otsho omubuanda Rahab okua ninga omujuki moru’iironga, sho a hedirire eendadi nde e di pitica mondjira hirue.

²⁶ Oshoka orutu karu nomuenjo orua sa, otsho ehiteero orja sa nge kari niironga.