Jakobus 1 - Etestemente Epe ✠ 1951

ONTOPORUA 1. Ekundico. Omakumagido.

¹ Jakobus, omupija gua Karunga no gua Muene guetu Jesus Kristus ota kundu omazimo omurongo na gaari, nga ge ri mesharakano.

² Jamuameme, njanjukirueni tshiri omamakero ageshe, nge amu ka adikua ku go.

³ Oshoka omu tshi nokutja nge tamu monikua ng’aanankondo mehiteero rjeni, rjo ari mu koreke mehididimiko.

⁴ Ehididimiko ari guanica otshironga, nokutja ne amu ka ninga mua guana mua pua, inamu pumbua tsha.

⁵ Nge ku na gumue e neempumbue duunkurungu, ne u indire ku Karunga, ngu ha gandja ku ajeshe otshindji, ke nohapu odigu, nde te u peua.

⁶ Ndere he n’indire mehiteero, ina rimbirirua, oshoka nakurimbirirua okua f’ekucikuci rjefuta ndi ari injengicua kombepo nde tari teraganicua.

⁷ Omuntu a tja ngaaka ka diradire nokutja ta peua tsha ku Muene.

⁸ Omuntu ngu e neemtima mbari, oha tengatenga meendjira de adishe.

⁹ Mukuetu omutshona n’itangere uunene ue.

¹⁰ Omujamba n’itangere ehitshonopeko rje, oshoka ota shuru po a f’ontsheno homuiidi.

¹¹ Etango ari piti ri nuupju uarjo. Rjo ari ganjica omuiidi. Ontsheno haguo ahi jagumuka, nehoparo rjorupe ruaho kari po ue. Otsho omujamba ta ganja meendjira de.

¹² Omunerago tshiri omurumentu ngu a diginina memakero, oshoka ngu a monikua omudiginini, ota ka peua ondjambi homuenjo, ndji Karunga a rombuerera mboka je mu ore.

¹³ Kapu kare ngu ta popi: “Ote makerua ku Karunga.” Oshoka Karunga ita vuru okumakerua kuuhineji, tsho otsho he muene ka makera nand’ogumue.

¹⁴ Aaue, keshe gumue oha makerua kuuharu ue muene, mbu tau mu eke noku mu rapa.

¹⁵ Uuharu nge ua ningi uusimba, otau vara uurunde. Uurunde nge ua guanicua, otau vara eso.

¹⁶ Ano inamu itshendjereka, jamuameme aahorike.

¹⁷ Egano keshe ehanaua, notshipeua keshe tsha guana tsha pua atshi zi kombanda ku She huujerere. Pu he kapu nepingakanico, kapu nomuzizimbe guerundururo.

¹⁸ Okepangero rjeharo rje e tu vara nohapu he hotshiri, sse tu ninge eententekeri detshito rje.

¹⁹ Omu tshi tshi jamuameme. Keshe omuntu n’enderere okupuakena, k’enderere kupopja, he k’enderere kugeja.

²⁰ Oshoka ondjashi homuntu itahi ningi tsha tsh’uka kotshipara tsha Karunga.

²¹ Ano omu nokuekerashi onigi ahishe natshishe sho tsha zi monjanja. Tuumbeni nengungumano ohapu ha tsikua mu ne, ndji ahi vuru okuhupica eemuenjo deni.

²² Kareni aaguanici johapu ha aapuakeni ike, mba haa hitshendjereke jo jene.

²³ Oshoka keshe ngu ta puakene ike ohapu, he ite hi guanica, okua f’omuntu ta tarere otshipara tshe montarero.

²⁴ Nge a hitara ota zi po ta ka dimbua naanzija nokutja okua tja ngiini.

²⁵ Ohe ngu ha tara naua ompango ha guana ha pua hemangururo rjotshiri noku hi diginina, ngu ke shi omupuakeni ngu ha dimbua aaue, omuguanici tshiri, ohe ta mono erago mokuguanica kue.

²⁶ Nge ku na gumue e tshi ohe omujuki, he ita pangere eraka rje ota tshendjereke omutima gue. Oku nuujuki uiirombo.

²⁷ Erongerokarunga rja jera, rjo kari nonjata kotshipara tsha Karunga Tate orjo ndika: okutarera po eecigua naaserekadi muudigu uauo, nokuikerera konjata huujuni mbuka.