Iironga 9 - Etestemente Epe ✠ 1951

ONTOPORUA 9. Ehidirururo rja Saulus. Omuapostoli Petrus mu Iidda no mu Joppe.

¹ Nanena Saulus okua siririre aarongua ja Muene ondjashi nuuharu uoku ja dipaga. He ta hi komupristeri omukuruntu.

² Ote mu indire eentumuafo da tshangerua eesinagoga domu Damaskus, opo nge ta mono mo aahiteeri jerongo ndika, aarumentu naakiintu e ja mange nde te ja fara ku Jerusalem.

³ Opua ningi, sho a ri mondjira popepi na Damaskus, naanzija okua adiminua kuujerere uokeguru.

⁴ Oku’ishata po pevi, nde t’uvu eui rja ti ku he: “Saulus Saulus, otshike to tidatidandje?”

⁵ He ta ti: “Muene ongueere?” He ta jamukura: “Ongaje Jesus ngu to tidatida. Otshidigu kungueje okurjata omakegua.”

⁶ Okua kuatua keruriro nokua kekama a ti: “Muene oua ara tshee ndi tshi ninge?” Muene okue mu rombuere: “Cikama, inda kotshirando. Oko to ka rombuerua shono u nokuninga.”

⁷ Aarumentu, mba j’enda puamue na he, oja s’onkunkumucika. Nanto j’uvu eui, inaa mona nand’omuntu.

⁸ Nena nduno Saulus okua cikama po pevi. Ndere sho a pashura omesho, ka ri e uete tsha. Jo je mu kuata keke, nde taje mu fara ku Damaskus.

⁹ Ta kara uure uomasiku gatatu a tsika, ina rja tsha, h’ina nua tsha.

¹⁰ Ndere mu Damaskus omua ri omurongua, edina rje Ananias. Muene okue mu popica memoniko a ti: “Ananias!” He ta jamukura: “Tara ongaje ngu Muene.”

¹¹ Nena Muene okua ti ku he: “Cikama, u he kondjira ndji tahi rukua ‘ondjira h’uka’, mondjugo ha Judas u ka pure omurumentu, edina rje Saulus guokotshirando tsha Tarsus, oshoka tara, oha garikana.”

¹² Ohe okua mono omurumentu a ri nedina Ananias, te ja ku he he te mu tenteke omake, opo a taatare.

¹³ Ananias okua jamukura: “Muene omurumentu nguka onde mu uvu kojendii, nokutja okua ningira aajapuki johe mu Jerusalem uuhineji oundji.

¹⁴ Nokuri he oku neenkondo, e di peua kaapristeri aakuruntu oku manga ajeshe mba haa hicana edina rjohe.”

¹⁵ Muene okue mu rombuere: “Inda ko, oshoka ohe otshirongico tshandje tsh’ogororua, a hokorore edina rjandje miipaci jaapagani, jaakuaniirua no jaana j’Israel.

¹⁶ Oshoka nda ara uo ndi mu urukire uunene u’uudigu mbu ta ningirua moru’edina rjandje.”

¹⁷ Nena Ananias okua hi, nde ta hi mondjugo, te mu tenteke omake nokua ti: “Mumuameme Saulus. Muene Jesus ngu e ku orokore mondjira ndji ue ja na ho, okua tumandje ngueje u taatare u ude Ombepo Ondjapuki.”

¹⁸ Opo tuu mpoka pua fe iishuuo ja gu momesho ge nokua taatara itsheue nde ta tshatshua.

¹⁹ Nde sho a ri eendia okua koro. Nde ta kara omasiku gamue paarongua jomu Damaskus.

²⁰ Naanzija oku’uvica meesinagoga, nokutja Jesus ohe tshiri Omumuua Karunga.

²¹ Ndere ajeshe, mba je tsh’uvu, oja rurirua ja ti: “Ke shi nani nguijaka, ngu kua ha tidatida mu Jerusalem ajeshe mba j’icana edina ndino? Ha he nani nguijaka ngu kua he ja huka, a mange he e ja fare kaapristeri aakuruntu?”

²² Ndere Saulus okua koro nokukorererera. Okua rimbirika aajuda, mba ja ri mu Damaskus noku ja tompa nokutja he oKristus.

²³ Omasiku ogendji, sho ga piti, aajuda oj’uvacana, je mu dipage.

²⁴ Saulus okue tshi rondorerua. Ndere mboka oja rangera iijeero omutenja nuusiku, je mu dipage.

²⁵ Ndere aarongua oje mu kuca mo uusiku, taje mu kurukicire motshimbamba kombanda hekuma.

²⁶ Sho e ja ku Jerusalem, okua kembadara okutshiga kaarongua. Ndere ajeshe oje mu tira, inaa hara okuiteera nokutja he a ninga omurongua tshiri.

²⁷ Ndere Barnabas okue mu tuumba, he te mu fara kaapostoli, nde te ja okororere ngashi he a mona Muene mondjira, ngu e mu popica, na shi a ronga mu Damaskus nuufure medina rja Muene.

²⁸ Ta kara mokati kauo moku ha nokupita puamue na jo mu Jerusalem, nde ta rongo nuuradi medina rja Muene.

²⁹ T’uvicire uo aapagani, nde ta rudike naaheleni. Ndere mboka ja ara oku mu dipaga.

³⁰ Aamuahina tsho je tshi dimburura, oje mu fara ku Kesarea, jo taje mu rareke a he ku Tarsus.

³¹ Meklesia arishe mu Judea atshishe, mu Galilea no mu Samaria omua ri ombiri. Orja koka sho rja enda metiro rja Muene, rjo tari uda ehekererico rjok’Ombepo Ondjapuki.

³² Opua ningi, Petrus, sho a ka tarera po ajeshe, okue ja uo kaajapuki mbejaka ja ri mu Lidda.

³³ Oko a hitsu omurumentu edina rje Eneas, a hera ombanda, a rara kontara eemvo uunutatu nokuri.

³⁴ Petrus okue mu rombuere: “Eneas, Muene Jesus Kristus, ote ku eruda, cikama, ijarera ngueje muene ontara hohe.” Nopo tuu mpoka h’okua cikama.

³⁵ Nena ajeshe jo ku Lidda na mbo jo ku Sarona oje mu mona, jo taa gama ku Muene.

³⁶ Motshirando Joppe omua ri omurongua omukiintu, edina rje Tabita, meraka rjotshigreka, Dorkas, okutja omenje. Ha rongo iironga iihanaua, he ha kuaca aacigona.

³⁷ Ndere pomasiku ngejaka a kuatua kuuvu nde ta si. Sho kua je mu kosha, oje mu rangeke motshoto tshokombanda.

³⁸ Ndere otshirando Lidda, sho tsha ri popepi na Joppe, aarongua mba je tsh’uvu, nokutja Petrus oko e ri, oja tumu ku he aarumentu jaari je mu garikana: “Ino shukumana ko hoka, ira kusse.”

³⁹ Petrus okua cikama, nde ta hi puamue na jo. Sho a ciki ko, oje mu fara motshoto shijaka tshokombanda. Aaserekadi ajeshe oja ri mo, ja cikama ouara jo taa riri, je mu urukira eenguuo neehema, di Dorkas e ja ondjera.

⁴⁰ Petrus okua tida mo ajeshe, ta tseengoro nde ta garikana. Okuza mpoka okua pungurukire komudimba a ti: “Tabita, penduka po.” Okua pashura omesho, nde sho a tara Petrus, okua kaatumba.

⁴¹ Okue mu pe eke, e mu jambidida. Na sho a hicanene mo aajapuki naaserekadi, okue mu tura miipaci jauo, e nomuenjo.

⁴² Shoka otsh’uvika mu Joppe atshishe, nojendji oj’iteera Muene.

⁴³ He muene okua menekera omasiku ogendji mu Joppe mondjugo ha Simon, omuperi guiipa.