Iironga 8 - Etestemente Epe ✠ 1951

ONTOPORUA 8. Eklesia tari epekua. Iironga ja Filippus omudiakoni.

¹ Mesiku ndika etidaguro enene rja tukuruka meklesia rjoku Jerusalem. Ndere ajeshe ja sharakanicua mu Judea no mu Samaria, aapostoli ike ja kara po.

² Stefanus okua fumbikua kaarumentu aajuki, jo taje mu riri eenkari duurongore.

³ Saulus okua rurumine eklesia komuenjo gue, ta guajere mo meendjugo, ta kokorora mo aarumentu naakiintu, he te ke j’ediririca mondrongo.

⁴ Ndere mboka ja sharakana ngaano, oj’endagura, jo taa huvica evangelium rjeehapu da Karunga.

⁵ Filippus okua hi kotshirongo Samaria, he e ja uvicire Kristus.

⁶ Eengundu daantu oja puakene ku di ja rombuerua ku Filippus, nde jo taje di panda, ja tara uo omadidiriko nga a ronga.

⁷ Ojendji jomu jo oja ri neembepo da njata, di da za mo nombujo onene, aavu jombanda niirema ojindji oj’erudua.

⁸ Omua ri enjanju enene motshirongo.

⁹ Ndere omurumentu guedina Simon a ri no monare omupure motshirando shija, a pukica otshiguana tsha Samaria, a ti, he otshinima otshinene.

¹⁰ Ajeshejeshe okua ja gama ku he, aanjasha naakuruntu ja ti: “Ohe eenkondo da Karunga di adi tiua enene”.

¹¹ Oshoka jo je mu iteera moru’uupure ue na shi kua e ja rurira erara ere tshiri.

¹² Ndere, sho j’iteera Filippus, ngu e j’uvicira evangelium rjuukuaniirua ua Karunga, aarumentu naakiintu oja tshatshua medina rja Jesus Kristus.

¹³ Nena Simon muene oku’iteere, he t’itshatshica, ta kara pu Filippus. A kuatua keruriro enene, sho a mona iirongadidiriko niironga iinjengandunge.

¹⁴ Aapostoli, mba ja ri ku Jerusalem, sho j’uvu aantu jomu Samaria ja tuumba eehapu da Karunga, oja tumu ku jo Petrus na Johannes.

¹⁵ Sho ja ciki ko, oje ja garikanene, ja peue Ombepo Ondjapuki.

¹⁶ Ho inahi ja kurukira manka nande oku gumue. Okua ja tshatshua ike medina rja Muene Jesus Kristus.

¹⁷ Oje ja tenteke omake gauo, nde jo taa tuumba Ombepo Ondjapuki.

¹⁸ Ndere Simon, sho a mona nokutja ja peua Ombepo Ondjapuki metenteko rjomake gaapostoli, okua a hara e ja pe iimariva.

¹⁹ Okua ti: “Piindje uo eenkondo doka, opo keshe te tenteke omake gandje, a tuumbe Ombepo Ondjapuki.”

²⁰ Ndere Petrus ta ti ku he: “Iimariva johe naji ku farere mekano, oshoka ua diradira u rande omagano ga Karunga niimariva.

²¹ Ngueje ku na otshitoporua nenge uuciga merongo ndi. Omutima guohe kagu nuujuki motshipara tsha Karunga.

²² Ano nduno idirurura, u ece uumbudi mbu. Indira Karunga e ku diminepo omadiradiro gomuenjo guohe.

²³ Ondi ku uete u’uda onjango onduru, omapando guuhineji ge ku manga.”

²⁴ Simon okua jamukura a ti: “Garikaneniindje Muene, ngaje kandi adikue ku mbjoka mua popi.”

²⁵ Sho j’okorora nde j’uvica eehapu da Muene, oja tshuna ku Jerusalem, taa huvica evangelium meemkunda odindji da Samaria.

²⁶ Ongashi omujengeli gua Muene a rombuera Filippus ta ti: “Cikama, inda ruo kuutshimbantu, kondjira ndjijaka ha za ku Jerusalem, h’uka ku Gaza. Kamu naantu mondjira ndjika.”

²⁷ Ongashi a cikama he ta hi. Ndere, tara, omurumentu omuetiopia, erenga enene rja Kandake, omukuaniirua omukiintu guomu Etiopia, omurangeri gu’uujamba ue aushe, ohe a hire ku Jerusalem okugarikana.

²⁸ Nena okua garuka. Ta kaatumba metemba rje, a lesha eehapu domuprofeti Isaias.

²⁹ Ombepo oha rombuere Filippus: “Inda k’ende popepi netemba ndija.”

³⁰ Filippus okua matukire ko nde te mu uvu sho ta lesha eehapu domuprofeti Isaias ta ti: “Ou uviteko tuu doka to lesha?”

³¹ Nguijaka ta jamukura: “Ote huvu ko ngiini, nge kapu na ngoka te di fatururirendje?” Oku’indire Filippus, a ronde metemba, he a kaatumbe posha he.

³² Eshara ndjoka a lesha mobibeli orja ri ndi: “Ngashi onzi ndji tahi farua kotshidipagero, ngashi onzona hahi muene nge tahi kururua, na he ita ka ekama okana ke.

³³ Moru’ehitshonopeko rje tari kucua epanguro rje. Ore ta vuru okujarura oruvaro rue, oshoka omuenjo gue tagu kucua mevi ndika.”

³⁴ Nena erenga rja pungurukire ku Filippus tari ti: “Otii ku indire, rombuerandje, omuprofeti ota popi ngaano ano’re. Ot’ipopi he muene nenge gurue?”

³⁵ Ndere Filippus ot’ekama okana ke, ta shimbike eehapu dika domobibeli, he te mu uvicire evangelium rja Jesus.

³⁶ Nde sho j’ende ngaano mondjira hauo, oja mon’omeja. Nena erenga rja ti: “Tara ko, omeja ogo nga. Oto imbiua ko tshee ndi tsatshue?”

³⁷ Filippus okua ti: “Ngueje nge u’iteera nomuenjo agushe, atshi pitikua.” Nguijaka okua jamukura a ti: “Ond’iteera nokutja Jesus Kristus Omumua Karunga.”

³⁸ Ta cikameke etemba. Ajeshe jaari ja rondoroka, ja hi momeja, Filippus nerenga, nde he te mu tshatsha.

³⁹ Ndere, sho ja zi mo momeja, ombepo ha Muene oha kuca po Filippus, erenga inari mu mona ue. Opo mpoka rja toora erira nenjanju.

⁴⁰ Ndere Filippus ta monikua mu Atsot. T’endagura notshirongo, t’uvica evangelium miirando ajishe sigo okotshirando Kesarea.