Iironga 7 - Etestemente Epe ✠ 1951

ONTOPORUA 7. Stefanus

¹ Ongashi omupristeri omukuruntu a ti: “Otsho tshi ri ngaano?”

² Stefanus okua jamukura: “Jarumentu jamuameme nootate, puakeneni! Karunga kesimano oku’orokere tate Abraham ngija a ri mu Mesopotamia manka ina rumba mu Haran.

³ E mu rombuerere: ‘Za mo mevi rjaandjeni mo motshirongo tshaakuazimo, ngueje u he kotshirongo, andi tshi ke ku urukira.’

⁴ Nena nduno okua zi mevi rjaakaldea, ta tura mu Haran. Okuza hoka, she sho a si, he te mu eta mevi ndika mu mu ri sigo onena.

⁵ Moka ine mu pa mo nande uuciga u cike pomutamo guompadi, aaue, okue ri mu rombuerer’ike, ri ninge rje noruvaro rue okuza ku he, nanto okua ri ke na omona.

⁶ Karunga okue mu rombuera nokutja: Oruvaro rue otaru ka ninga aakuiirongo mevi rjaantu jarue, taa turua muupika noku mon’iishuna uure ueemvo omacere gane.

⁷ Ndere otshiguana shi taa rongere muupika, ngaje andi tshi pangura, Muene ta ti. Okuza mpoka taa tembuka, jo taa ka karerandje peshara ndika.

⁸ H’okue mu pa eguaneno rjefukareko. Otsho a varerua Isaak, he te mu fukareke mesiku etiuunutatu. Isaak okua varerua Jakob. He Jakob ta varerua aapatriarke omurongo na jaari.

⁹ Jo aapatriarke oja sire Josef okasheshe, taje mu randa po ku Egipti. Ndere Karunga okua ri puamue na he.

¹⁰ Okue mu upica muudigu ue aushe, te mu pe oshenda nuunongo kotshipara tsha Farao, ngu omukuaniirua gu’Egipti. Ongoka e mu ningi erenga enene mu Egipti no mombara he ahishe.

¹¹ Ndere ondjara he ja ha geja motshirongo atsishe tsh’Egipti no mu Kanaan, opua ri oruepo orunene, ootate kua kaa mon’iikurja.

¹² Ndere Jakob, sho a huvu nokutja mu Egipti omu niirja, okua tumu ko ootate ekato rjotango.

¹³ Sho ja ri ko orutijari, Josef ta dimbururua kaamuashe. Ongashi Farao a tshiua ezimo rje.

¹⁴ Nena Josef ta tumu ko, nde t’icana she Jakob nezimo rje arishe, okutja aantu eemrongo uunuuari na jatano.

¹⁵ Otsho Jakob a hi ku Egipti, hu a ka sira, he muene nootate.

¹⁶ Oja farua ku Sikem, taa rangekua mombira ndjoka Abraham a randere iimariva kaana ja Hamor mu Sikem.

¹⁷ Ndere ecimbo rjomarombuerero ndi Karunga a shunganekere Abraham, sho rj’engene popepi, aantu oja ningi ojendji mu Egipti

¹⁸ sigo okecimbo rjomukuaniirua gurue guomu Egipti, ngu ina tshiua Josef.

¹⁹ Ngu a kotokerere otshiguana tshetu, t’epeke ootate, e ja ciminika okuekerashi uunona uauo, kau kare u nomuenjo.

²⁰ Mecimbo tuu ndika omo Moses a varua. Karunga e mu panda, nde ta jamicua eemuedi ndatu mondjugo ha she.

²¹ Ndere sho a ri a hekeruashi, omumua Farao omukadona te mu kuca po, te mu putuda a f’omumati gue muene.

²² Moses okua rongua eendunge adishe daaegipti, a ri neenkondo odindji meehapu no miironga je.

²³ Ndere sho a ningi eemvo eemrongo ine, okua adikua momuenjo gue kediradiro rjoku ka tarera po aamuashe, nokutja aana j’Israel.

²⁴ Sho a mona gumue a mon’iishuna neji, okue mu upica, a ning’omupopiri guomuhepekua, he ta dipaga omuegipti.

²⁵ Okua ri a ruka aamuashe taa tshi dimburura nokutja Karunga a hara oku ja etera ekuaco keke rje. Ndere inaa tshi dimburura.

²⁶ Esiku rja nofu ta hi ku jo manka taa ru. A hara e ja angukunune nombiri, he e ja rombuere: ‘Jarumentu, ne amushe aamuashe, otshike ano mua ningiracana uuhineji?’

²⁷ Ndere nguijaka kua ta arura neji mukuauo okue mu umpire nde ta ti: ‘Ore e ku tura po u ninge omureri ngu’omutokori gueehapu detu?

²⁸ Oua ara shira okudipagandje ngashi ua dipaga omuegipti ohera?’

²⁹ Moru’eehapu dika Moses okua h’onda po, ta ka ninga omukuiirongo kevi rja Madian. Moka a varerua ojana aamati jaari.

³⁰ Eemvo eemrongo ine sho da piti, mombuga moka mu nondundu Sinai, omujengeli okue mu orokere momuriro guomano ga sama.

³¹ Pokumona emoniko ndika Moses okua cikama a rurirua. Sho a hengene popepi e ri tare naua, oku’uvu eui rja Muene rja ti:

³² ‘Ongaje Karunga koosho, Karunga ka Abraham, Karunga ka Isaak, Karunga ka Jakob! Moses okua kekama, in’erekera oku tara ko ue.

³³ Ndere Karunga ta ti ku he: ‘Shura ko eengaku dohe, oshoka eshara ndika ua cikama, orjo evi ejapuki.

³⁴ Ngaje onda mona uudigu uotshiguana tshandje mu Egipti, nde nd’uvu omakemo gauo. Onda kuruka ndi ja mangurure. Ira ano, ngaje ndi ku tume ku Egipti.’

³⁵ Omoses tuu ngu, jo ja dina sho ja ti: ‘Ore e ku tura po omureri nomutokori guetu’ongoka Karunga a tuma ng’omureri h’omuhupici nekuaco rjomujengeli, ngu e mu orokere momano.

³⁶ Ohe e ja tembukica a rong’iironga iinjengandunge niinjengadidiriko motshirongo tsh’Egipti, mefuta etirigane, no mombuga eemvo eemrongo ine.

³⁷ Ohe Moses ngu a rombuerere aana j’Israel: Karunga ote ke mu pendurira omuprofeti maamuasho ngashi ngaje, mu uveni!

³⁸ Ohe ngu a ri pegongaro mombuga puamue nomujengeli, ngoka a popire na he kombanda hondundu Sinai, a ri puamue nootate, ohe a peua eehapu domuenjo, e di tu rombuere.

³⁹ Ndere ootate kaa harere okuvurika ku he, okua je mu dina, jo taa pungurukire neemuenjo dauo ku Egipti,

⁴⁰ sho ja rombuerere Aaron ja tire: ‘Tu ningira iikarunga mbi taji tu tetekerere, oshoka Moses, ngoka e tu kuca mo motshirongo tsh’Egipti, katu tshiuo shoka a ninga.’

⁴¹ Momasiku ngejaka okua j’iningir’ontana. Otshimenka shika oje tshi etere omagano, ja njanjukirua otshironga tshomake gauo.

⁴² Ndere Karunga okua piramene ku jo, he te j’eca, ja karere uo eengundu dokejarero ngashi tsha tshangua momambo gaaprofeti: ‘Ne omu’eterandje nani omagano giitserua nomagano omakuauo mombuga meemvo dija eemrongo ine, ngueje Israel?

⁴³ Etsari rja Molok omue ri kuca, h’onjoci ha karunga keni Remfam, iiherekera mbino, mu’ihongera ne mu ji garikane. Ndere ngaje andi mu kandurire ko handijaka ha Babilon.’

⁴⁴ Etsari rjeguaneno orja ri mombuga pootate. Otsho Karunga a hara, sho a rombuera Moses e ri tunge, ri fe otshoorerua shi a muenene.

⁴⁵ Ootate mba je ri tuumba, taa ja narjo, sho ja kuca puamue na Josue otshirongo tshaapagani, mba ja tidua mo ku Karunga kotshipara tshootate. Otsho tsha kara sigo okomasiku ga David.

⁴⁶ Ngu a monen’oshenda pu Karunga, he te mu indire epitiko rjokutungira Karunga ka Jakob ondjugo.

⁴⁷ Salomon okua ri e mu tungira ondjugo.

⁴⁸ Ndere ngu guokombandambanda ka kara meenguru di da tungua nomake, ngashi omprofeti a ti:

⁴⁹ ‘Eguru orjo otshipangerapundi tshandje, ndere evi orjo otshirjatero tsheempadi dandje. Ne mua ara okutungirandje onguru hatshee, Muene ta ti, nenge eshara rjevururuko rjandje ori ri peni?

⁵⁰ Kari shi nani eke rjandje ndi rja thita atshishe shoka?’

⁵¹ Janatshitjani ne, jafukurume ne keemuenjo no komakutsi. Arushe mu nondumbo n’Ombepo Ondjapuki, Ngashi oosho otsho nane uo.

⁵² Ore guomaaprofeti ina tidagurua koosho? Ojo ja dipaga mboka ja shunganeka ejo rj’Omujuki nguka, ne jene mua ninga nena aagoueki naadipagi.

⁵³ Omua peua nekuaco rjomujengeli ompango, ndere inamu hi guanica.”

⁵⁴ Pokuuva eehapu dika oja geja nokugejerera meemuenjo dauo, jo taje mu kotokere omeego.

⁵⁵ Ndere he okua ri a hud’Ombepo Ondjapuki, a rigamena keguru, he ta mono ehadimo rja Karunga, na Jesus a cikama korurjo rua Karunga.

⁵⁶ Oku’igida a ti: “Tara ngaje ondi uete eguru rj’eguruka, n’Omona guomuntu a cikama korurjo rua Karunga.”

⁵⁷ Nena oja ningi ombujo oneenene, taj’icitike komakutsi. Ndere jo ajeshe taje mu nukire tshanka.

⁵⁸ Oje mu tida mo motshirando, taje mu dipaga nomamanja. Eentari oda tura eenguuo dauo keempadi domunjasha, edina rje Saulus.

⁵⁹ Otsho ja denga Stefanus nomamanja, manka he muene a garikana a ti: “Muene Jesus, tuumba omuenjo guandje.”

⁶⁰ Ta tseengoro, he t’igida muure a ti: “Muene ino ja jarurira ondjo ndji.” Hera e di ti, okua koca ngaa nduno. Ndere Saulus okua panda okudipagua kue.