Iironga 6 - Etestemente Epe ✠ 1951

ONTOPORUA 6. Ehogororo rjaadiakoni

¹ Pomasiku ngejaka omujaru guaarongua sho gua tana, opua ri engongotoro rjaaheleni ja ngunguturira aahebrei oshoka aaserekadi jauo anuua ja pangua iiparuca, nge taji toporua keshe uuna.

² Ongashi mboka omurongo na jaari j’icana ongundu haarongua ja ti: “Inatsh’opara sse tu ece ehuvico rjeehapu da Karunga moru’ejakuro rjopotshiriro.

³ Ano nduno jamuameme, ogororeni mokati keni aarumentu uunuuari aahopari, jo j’uda Ombepo Ondjapuki nuunongo, ojo tu ture motshironga shi,

⁴ manka sse tua diginina omagarikano nehuvico rjeehapu.”

⁵ Otshigongi atshishe otsha panda eehapu dika. Taa hogorora mo Stefanus, omurumentu a huda ehiteero n’Ombepo Ondjapuki, na Filippus, Prokorus, Nikanor, Timon, Parmenas na Nikolaus omuproseliti omuhantiokia.

⁶ Mboka ja farua miipaci jaapostoli, nde taje ja tenteke omake noku ja garikanena.

⁷ Ohapu ha Karunga oha taandera arushe, guo omujaru guaarongua jomu Jerusalem tagu tana. Ndere ongundu onene haapristeri ahi vurika uo kehiteero.

⁸ Stefanus okua ri a huda oshenda neenkondo, a rong’iironga iinjengandunge iinene niirongadidiriko mokati kaantu.

⁹ Ndere mpo pua ri jamue jomosinagoga ndji haalibertini, haakireni, haaleksandrini, na jamue mba ja zire mu Kilikia na Asia. Oja umana na Stefanus.

¹⁰ Ndere eendunge n’Ombepo ndji he mu popica, oha kara he ja njenga.

¹¹ Nena oja rombuera aarumentu ja tje: ss’otue mu uvu a njana Moses na Karunga.

¹² Otsho ja tsitsimike aantu, naakuruntu neenkurungu domambo, oje mu kumukire, taje mu kuca, taje mu kokorora motshigongi tshaakuruntu.

¹³ Mpo j’eta aarundiri mba ja ti: “Omurumentu ngu ka zimbuka okunjana eshara ndi ejapuki nompango”.

¹⁴ Oshoka sse otue mu uvire a tire: “Jesus omunatsaret ota ka shanagura po eshara ndika, he ta ka rundurura eemkaro di tua perue ku Moses”.

¹⁵ Ajeshe mboka ja kaatumba motshigongi tshaakuruntu oje mu deng’omesho, ja mono otshipara tshe, tsha fa shi tshomujengeli.