Iironga 5 - Etestemente Epe ✠ 1951

ONTOPORUA 5. Ananias na Safira. Aapostoli otaa geerua

¹ Omurumentu guontumba haku tiua Ananias puamue nomukiintu gue Safira okua randa po epja.

² Ndere iimariva jimue jepja te j’oreke. Omukiintu na he okua e tshi tshi. Okua fara otshitoporua tshimue tsha mbi, te ke tshi tura keempadi daapostoli.

³ Ndere Petrus ta ti: “Ananias, otshike nduno omusatana a makera omutima guohe u tshendjereke Ombepo Ondjapuki nokuoreka iimariva jimue jepja?.

⁴ Ka rja ri rjohe ngija inari randua po. Na shi rja randua po, eriko ha ngueje kua to ri uca? Otshike ano ua tura momuenjo guohe u ronge ngaano? Aantu ino tshendjereke, aaue, oua tshendjereka Karunga.”

⁵ Ananias, sho a huva eehapu dika, oku’ishata pevi, ta si. Ndere ajeshe mba je tsh’uva, oja kuatua ketiro enene.

⁶ Ndere aarumentu aanjasha oja cikama, ja kuca omudimba gue, taje gu fara pondje, je ke gu fumbike.

⁷ Ndere okuza perara rjeestunde ndatu, omukiintu gue e ja mo, he ina tshiua, shi tsha ningua po.

⁸ Petrus e mu pura a ti: “Rombuerandje mukiintu, epja rjeni omue ri randa po tuu iimariva mbi?” He ta ti: “Eno, ojo mbjo.”

⁹ Ndere Petrus te mu rombuere: “Otshike mu’uvacanene mu shinde Ombepo ha Muene? Tara eempadi da mboka ja ka fumbikire omurumentu guohe, odi ri potsheero, na jo uo otaa ke ku fara pondje.”

¹⁰ Naanzija oku’ishata pevi keempadi de, nde ta si. Aarumentu aanjasha, sho je ja mo, oje mu ada a sa nare. Oje mu fara pondje, taa ke mu fumbika posha homurumentu gue.

¹¹ Ndere etiro enene orja kuata eklesia arishe, najeshe mba je tshi uva.

¹² Komake gaapostoli kua ningua omadidiriko niironga iinjengandunge ojindji mokati kaantu. Jo ajeshe oja ri nediradiro rimue, kua haa gongarere momukara gua Salomon.

¹³ Jakuauo ajeshe oja tira okugama huno ku jo. Ongashi aantu ajeshe oja kara je ja tunda.

¹⁴ Ongundu haarumentu no haakiintu, mba j’iteera Muene oha tana kesh’uuna, ha ningi oneenene.

¹⁵ Oja tura aavu muuhanda, taje ja rangeke keentara no komarutara, opo pokupitirira kua Petrus omuzizimbe gue gu njenge gumue, he a herudue kuuvu ue.

¹⁶ Naantu jomiirando jomuutshiinda ua Jerusalem oje ja uo j’eta aavu na mboka j’epekua keembepo da njata. Ajeshe oj’erudua.

¹⁷ Nena omupristeri omukuruntu okua cikama najeshe mba ja gama ku he, okutja otshimpaga tshaasadukaji, oj’udirira uukodi.

¹⁸ Oja kuatica aapostoli, nde jo taje j’edirire mondrongo hotshirando.

¹⁹ Tapu ja nduno omujengeli gua Muene, t’egurura uusiku iijeero jondrongo, nde te ja piica mo nokua ti:

²⁰ “Indeni, mu ka he motempeli noku okororera aantu eehapu adishe domuenjo nguka.”

²¹ Sho je di uvu, oja hi motempeli ongura onene, nde taa rongo aantu. Ndere omupristeri omukuruntu nongundu he oje ja, ja shija otshigongi otshinene tshaajuda naakuruntu ajeshe jaana j’Israel. Taa tumu kondrongo, ja ka tarue ko.

²² Ndere aajakuri jetokoro, sho je ja, j’egurura ondrongo, inaje ja mona, oja garuka no je ke tshi okorora.

²³ Oja ti: “Ondrongo otue hi ada, h’edirua naanaa tshiri, aarangeri ja cikama piijeero. Nde sho tue hi egurura, inatu mono mo nand’omuntu gumue.”

²⁴ Omukuruntu guaarangeri jotempeli naapristeri aakuruntu, sho je di uvu, oja rimbirirua, kaa tshi shoka tatshi ningua.

²⁵ Tapu ja gumue e ja mo, te ja rombuere: “Tareni, aarumentu mboka kua mua tura mondrongo, oja cikama motempeli, taa rong’aantu.”

²⁶ Opo nduno omukuruntu guaarangeri a hi puamue naajakuri jetokoro, e ke ja tara. Ndere inaje ja ciminika neji, oshoka j’ijageka nokutja taa dipagua kaantu nomamanja.

²⁷ Oje ja eta nduno, taje ja tura motshigongi tshaakuruntu. He omupristeri omukuruntu ote ja pura.

²⁸ A ti: “Inatu mu indika nani okuronga komesho aantu edina ndika! Tareni ano nduno, Jerusalem atshishe mue tsh’uda eehapu deni, no mua ara mu tsike ombinzi homurumentu ngu kombanda hetu.”

²⁹ Ndere Petrus naapostoli jakuauo oja jamukura ja ti: “Okuvurika ku Karunga oku vure okuvurika kaantu.

³⁰ Karunga kootate okua jumuda Jesus, nguka mua tsirika komuti, no mue mu dipaga.

³¹ Ngu Karunga a renga korurjo rue, a ninga omureri h’omukuriri, opo a pe Israel ehidirururo nediminopo rjeendjo.

³² Osse eentari diironga mbi ajishe, n’Ombepo Ondjapuke uo, ndji Karunga a pa ajeshe, mba haa vurika ku he.”

³³ Sho j’uvu doka, oja ruruma meemuenjo dauo, ja ara oku ja dipaga.

³⁴ Nena motshigongi tshaakuruntu tamu cikama omufarisaji, edina rje Gamaliel, omurongimpango, nakusimanekua paantu ajeshe, a popja nokutja aarumentu mboka naa farue manka pondje.

³⁵ Ongashi a ti: “Jarumentu ne aaisraeli, idiradireni naua sho mua ara okuningira aarumentu mbaka.

³⁶ Monare Teodas okua cikamene a tire: ohe omutshiketshike. Ndere ongundu haarumentu omacere gane ahi mu randura. Okua dipagua. Ndere ajeshe mba je mu iteera, oja sharakanicua nde taa manua po.

³⁷ Okuza mpoka Judas t’oroka omugalilea momasiku gokujarura aantu. T’ogorora aantu ojendji je mu randure. Na nguka a jonua po, jo ajeshejeshe mba kua j’igameka ku he, ja sharakanicua.

³⁸ Ngashingika ngaje andi mu rombuere, inamu ihepica naantu mboka, j’eceni ouara, oshoka ehuvacano nenge otshironga shika nge otsha za kaantu, otatshi ka tompoka.

³⁹ Ndere nani, nge otsha za ku Karunga, itamu tshi tompora. Kotokeni, kamu fe aantu, mba taa ru na Karunga muene.” Eehapu dono oje di panda.

⁴⁰ Taj’icana mo aapostoli, nde taa ja dengica neengora, oje j’indike okuza mpoka okupopja medina rja Jesus, nde taa ja rareke.

⁴¹ Jo ja zi mo motshigongi tshaakuruntu, oja njanjukua oshoka ja ri j’opara okutshekerua edina rja Jesus.

⁴² Inaa heca okuronga keshe esiku motempeli no meendjugo nokuuvica Jesus Kristus.