Iironga 3 - Etestemente Epe ✠ 1951

ONTOPORUA 3. Iironga jomuapostoli Petrus

¹ Petrus na Johannes oja rondo ja hi motempeli mostunde ontimugoji kegarikano.

² Tapu etua omurumentu a humbatua, a ri otshirema hera a varua, kua ha kaatumbikua keshe esiku potsheero tshotempeli, shi atshi tiua “otsheero tshopara”, a hehere pu mboka taa hi motempeli.

³ Nena, sho a mono Petrus na Johannes, ja ara oku ha motempeli, okue ja hehera.

⁴ Petrus na Johannes uo oje mu deng’omesho, nde Petrus ta ti: “Tu tara.”

⁵ Okue ja deng’omesho metegerero rjokupeua tsha ku jo.

⁶ Ongashi Petrus a ti: “Otshisilveri notshingoldi kandi tshi na. Ndere shi ndi na, otii tshi ku pe: Omedina rja Jesus Kristus omunatsaret, cikama, ngueje enda.”

⁷ Te mu kuata keke rjokorurjo, e mu cikameka. Naanzija omatundji neempadi de oda koro.

⁸ Ta nuka po, ta cikama t’ende, he ta hi puamue na jo motempeli, t’ende, ta tanta nenjanju nokua amberera Karunga.

⁹ Aantu ajeshe oje mu tara, sho t’ende nokuamberera Karunga.

¹⁰ Sho je mu dimburura, nokutja ohe tuu ngu kua ha kaatumba potsheero shija tshotempeli, shi atshi rukua tshopara, ngija a hehera, oj’aruka, ja rurirua, sho ja mono shoka a ningua.

¹¹ Ndere, sho a gama ku Petrus na Johannes, aantu ajeshe oj’enderera, ja gongara pu jo momukara hagu tiua gua Salomon, jo oja kuatua komaruriro.

¹² Petrus, sho e tshi mona, okua popica aantu a ti: “Jarumentu ne aaisraeli, shi tshe mu rurira otshee, nenge otshike mue tu tara tua f’osse tua endica omuntu nguno moru’uujuki nenge moru’eenkondo detu jene?

¹³ Karunga ka Abraham no ka Isaak no ka Jakob, Karunga kootate, ohe a simaneka Omona Jesus. Ohe tuu ngu mua gandja, mue mu idimbika miipaci ja Pilatus, ngu a harere a hece.

¹⁴ Ndere one omu’idimbika Omujapuki n’Omujuki, mu’indira omudipagi a hecue.

¹⁵ Omutshiti guomuenjo mua dipaga, ngu a jumudua ku Karunga. Osse eentari de.

¹⁶ Mokuiteera edina rje, edina ndika orja koreke omurumentu nguka, mu uete no mu mu tshi. Ehiteero ndi rja zi ku he, orja pa nguno uundjangere aushe miipaci jeni.

¹⁷ Ndere jamuameme, ondi tshi tshi, nokutja omue tshi ningi muusama ueni, ngashi uo ngaa omarenga geni.

¹⁸ Ndere Karunga otsho a guanica shoka a shunganekere nare mokana kaaprofeti ajeshe, nokutja omeepeko g’Omuguajekua gue.

¹⁹ Ano nduno idirurureni, ne mu tshune ku Karunga, opo eendjo deni di dimue po.

²⁰ Opo omacimbo getarareko ga ze kotshipara tsha Muene, he e mu tumine Jesus Kristus, ngu mua uvicirua.

²¹ Ngu e nokutuumbua meguru, ta kara mo sigo okomacimbo gokuucirira naua iinima ajishe, ngu Karunga a popja nare mokana kaaprofeti aajapuki.

²² Na Moses uo okua tire: ‘Muene Karunga keni ote mu penducire maamuanjoko omuprofeti nga ngaje, omu noku mu uva miinima ajishe mbi te mu rombuere.

²³ Ndere shoka otatshi ningua: keshe omunamuenjo ngu it’uvu omuprofeti ngu, ota ka tidatidua motshiguana.

²⁴ Naaprofeti ajeshe, mba j’uvica, okuza Samuel, najeshe mba je mu randura, jo ja shunganeka omasiku ngaka.

²⁵ Ne ojana jaaprofeti no jeguaneno ndi Karunga a panga nootate, ngija a rombuerere Abraham a tire: ‘Moruvaro ruohe otamu jambekua omazimo ageshe gevi.

²⁶ One mua tuminua tango ku Karunga Omona gue, ngu e mu jumuda. He e mu jambeke, opo keshe gumue n’idirurure kuuhineji ue.”