Iironga 27 - Etestemente Epe ✠ 1951

ONTOPORUA 27. Paulus ta hi ko Roma

¹ Ano sho tsha popirue otshingongo nokutja Paulus na farue ku Italia, okua gandjua puamue naakuatua jakuauo kondjai hongundu homukuaniirua, edina rjaho Julius.

² Otua ronda etembameja rja zi ku Adrumet, tua shimbike okuenda, tu’uka kiirando jokomukunkuro gua Asia. Tua enda puamue nomumakedonia Aristarkus, a zire ku Tessaloniki.

³ Esiku ndi rja randura ko otua ciki ku Sidon. Julius okua ri nombiri na Paulus, nde te mu pitikire okutarera po ookuume ke, jo je mu kuace.

⁴ Sho tua zi ko, otu’ukirire ku Kipros, kombinga hokuumbangarantu, oshoka ombepo ha ri he tu denga motshipara.

⁵ Sho tua konda efuta rjopopepi niirongo ja Kilikia na Pamfilia, otue ja nduno ku Listra tshomu Likia.

⁶ Hu ondjai ha tsakaneka etembameja rja zi ku Aleksandria tari hi ku Italia. Ongashi e tu tura murjo.

⁷ Omasiku ogendji tu’enda nokuisisida sigo otua tegamene na Kidnos, sho tua ri katu nombepo ombuanaua. Tua kunkura na Kreta popepi na Salmone.

⁸ Sho tua kunkura tu nuudigu, sse tua ada eshara hari tiua “omaturiro gopara”, popepi notshirando Talassa.

⁹ Ndere ecimbo ere sho rja piti nokuri, nokuenda kuetembameja kua shimbike okumon’uudigu, ecimbo rjokuidirik’iikurja kua rja shura, Paulus okue ja kumagida.

¹⁰ Nde ta ti ku jo: “Jarumentu ondi uete nokutja okuenda kuetu taku tameke okumon’uudigu notshiponga ha kofrasha ike no ketembameja, aaue, no keemuenjo detu uo.”

¹¹ Ndere ondjai oku’inekera omushingi na muene guetembameja, nde ta dini eehapu da Paulus.

¹² Eturiro ndika, sho ka rja ri ehanaua rjokukara mecimbo rjokufu, okonjara ajeshe ja arere okuza mo nokuerekera oku ha ku Foinike, eturiro rimue rjomu Kreta, rja tshiga kuuninginino no kuutshimbantu, oko ja kare mokufu.

¹³ Ombepo hokuutshimbantu sho ha pepa naua, oja ri je tshi taa hada ko uo, oja shiri mo omakuatico getembameja popepi na Asson, nde taa hende popepi na Kreta.

¹⁴ Ndere okuza po okacimbo okatshona, ombepo “Tifon” oh’ihundurire mo kotshitengedera, nokutja otshikunguru tsha zi kombinga homokati kuuziro nombangarantu.

¹⁵ Etembameja ano, sho rja ri meenkondo dotshikunguru, shi tshe tu njenga, sse otue ri eca ouara meenkondo datsho, nde tua hi.

¹⁶ Sho tua ukirire ruo kokatengedera Kauda, okua tua kanica konjara okatembameja ketu okatshona.

¹⁷ Sho je ka shiri pombanda, ja koreka etembameja neengodi eenene. Otsho ja kurukica uo eesaila sho j’ijageka nokutja taa farua mo Sirti no j’ihecera ouara meenkondo domakucikuci.

¹⁸ Otshikunguru sho tshe tu denge keembinga neembinga, oj’ekerashi otshindji tshofrasha mesiku rja nofu.

¹⁹ Esiku etitatu oj’ekerashi uo nomake gauo iinima jetembameja.

²⁰ Ndere etango inari oroka ue, eenjoci inadi monikua ue omasiku gamue, otshikunguru tsha geja inatshi rota, nena etegerero rjehupico rjetu orja fe rja kana.

²¹ Sho ja ningi nokuri esiku inaa rja tsha, Paulus okua cikama mokati kauo a ti: “Jarumentu, ngeno okua mua uvandje, ne inamu za ku Kreta, ando inamu mon’uudigu notshiponga shi.

²² Ndere nena andi mu pe omeere ngaka: ikorereni, kapu na nande ogumue mokati ketu ta ka kana, etembameja ike.

²³ Oshoka uusiku mbu omujengeli gua Karunga oku’ire kungaje ngu e nandje ngaje omukareri gue.

²⁴ Nde ta ti: “Ino tira Paulus, ngueje u nokucikama motshipara tshomukuaniirua. Tara Karunga okue ku pa ajeshe mba je ri nangueje metembameja.”

²⁵ Ano jarumentu, ididimikeni, oshoka ond’iteera Karunga nokutja ota ningi atshishe, ngashi e tshi rombuerandje.

²⁶ Ndere sse otu nokuitsa otshitengedera tshimue tshomefuta.”

²⁷ Uusiku uutimurongo na une sho ue ja, sse otua teraganicua pokati kuusiku mefuta rja Adria, aantu jetembameja oja ri je tshi taa mono evi.

²⁸ Oj’umbu otsheera tshokuereka uure uefuta, jo ja nongere uure uefuta nokutja ou cike peendja eemrongo mbari. Sho ja engene ko katshona oj’umburura mo otsheera, no j’ereke eendja omurongo na ntano.

²⁹ Sho ja tira unene, etembameja tari tsuua komamanja gokoshi homeja, oja kurukica mo konima hetembame ja omakuatico gane, jo ja jeerukua okutsha kuongura.

³⁰ Ndere aantu jetembameja sho ja ara okuijaka mo metembameja, oja kurukica okatembameja okatshona mefuta nekoto, anuua, ja ara uo okukurukica omakuatico komesho getembameja.

³¹ Nena Paulus okua rombuere ondjai naakuiita: “Mboka nge itaa kara mo metembameja, itamu vuru oku ka upicua.”

³² Aakuiita oja keke po eengodi dokatembameja, nde jo taa ka hica ouara.

³³ Eruua sho rja tende, Paulus okua kumagida ajeshe, ja rje iikurja nde ta ti: “Omasiku omurongo na gane ga piti, hera tuu mua tegerera mu’idirika inamu rja tsha.

³⁴ Otsho ano ngaje andi mu kumagidire mu rje iikurja, opo mu kore, oshoka kapu na nande evudi rimue rjokeemtse deni tari ka kana.”

³⁵ Sho a popi doka okua kuca ombroto, a hamberera Karunga miipaci jajeshe, e hi pambura nokua shimbike okurja.

³⁶ Nena ajeshe oj’ekerericua no ja rja uo.

³⁷ Ss’atushe otua ri aantu omacere gaari neemrongo uunuari na kanekamue.

³⁸ Sho ja ri ja kuta, oja pupareke etembameja nokuumbira iirja mefuta.

³⁹ Nde sho kua tshi, inaa dimburura otshirongo shija, ndere oja mona otshikororo tshefuta tshi nomukunkuro guopara. Oko ja ara okuukica etembameja, nge taa vuru.

⁴⁰ Oja jeruca omakuatico, jo j’ihecera keenkondo domakucikuci. Oja ditura eemnja dotshipungurico tshetembameja. Nde sho ja shiri pombanda osaila hokomesho, ho hi kuatue kombepo, oj’ukirire ruo komukunkuro.

⁴¹ Sho tua denge netembameja evi rjokoshi homeja, otshitoporua tshokomesho tshetembameja otsha patekere mo, inatshi injenga ue. Ontoporua hokonima hetembameja oha teka keenkondo domakucikuci.

⁴² Nena aakuiita oja ara okudipaga aakuatua ajeshe, opo kapu kare mba taa tuurunga nokujoga.

⁴³ Ndere ondjai ndji kua ha ara okuupica Paulus, inahi tshi pitikira, aaue, oha rombuere aantu nokutja mbo je tshi kujoga naa nukire mo tango mefuta, j’ihupice nokuada kevi.

⁴⁴ Oonakukara po oja farua ko uo, jamue ja ronda kiiblanki, jamue ja ronda iipambu jetembameja. Ongashi ajeshejeshe ja ciki kevi.