Iironga 26 - Etestemente Epe ✠ 1951

ONTOPORUA 26. Eehapu da Paulus motshipara tshomukuaniirua Agrippa

¹ Agrippa okua ti ku Paulus: “Nena nduno ou nepitiko rjokuipopira.” Ngashingika Paulus okua jeruca eke rje nde ta shimbike okuipopira.

² “Mukuaniirua Agrippa, onda panda unene, sho nda pitikua okuipopira kotshipara tshohe moru’iinima mbi ajishe aajuda taa pendje ondjo.

³ Eno, ngueje ua tshiua naua eemkaro nomarudi geehapu daajuda. Otsho ngaje andi ku indire, puakenandje nonteni.

⁴ Aajuda ajeshe oje tshi okukara kuandje okuza kuunjasha uandje, oshoka ketameko ngaje onda ri arushe mokati kotshiguana tshandje mu Jerusalem.

⁵ Oje tshindje ketameko, nge ja ara oku tshi okorora, nokutja onda ri arushe motshimpaga shi tsha diginina uneenene ehiteero rjetu ng’omufarisai.

⁶ Ndere nena andi cikama potshipundi tshetokoro moru’etegerero rjomarombuerero ga romborua ookuku ku Karunga.

⁷ Ngaka ga arikua unene komazimo getu omurongo na gaari nokukarera Karunga omutenja nuusiku. Moru’etegerero ndi, mukuaniirua, te humanekerua kaajuda.

⁸ Otsha tja ngiini? — Itamu vuru okuiteera nokutja Karunga ota jumuda aasi?

⁹ Tshiri nangaje uo nda ri ndi tshi ndi nokuruica edina rja Jesus omunatsaret.

¹⁰ Otsho nda ningire mu Jerusalem. Aajapuki ojendji onde j’edirire meendrongo, sho nda perue eempapira depitiko kaapristeri aakuruntu. Nge ja ara oku ja dipaga, nangaje uo nd’iteera.

¹¹ Meesinagoga adishe onde ja monica egeero, nde ja ciminika okutsheka. Mongejo handje onene onde ja tidatida sigo okiirando jokokure.

¹² Ndere sho nda hi nomadiradiro ngaka ku Damaskus, meenkondo no medina rjaapristeri aakuruntu,

¹³ nena, mukuaniirua, mondjira handje, petango ljambandomutse, onda mona uujerere, ua zi keguru u vure etango mehadimo rjarjo, ua kondekandje, ngaje muene na mbaka ja cindikirandje.

¹⁴ Nde sho tua guire po pevi atushe, ngaje ond’uvu eui meraka rjaahebrei, tari ti kungaje: ‘Saulus Saulus, otshike ua tidatidandje? Atshi ningi otshidigu kungueje okurjata omakegua.’

¹⁵ Ndere ngaje onda ti: ‘Muene ongueje re? Muene okua ti: ‘Ongaje Jesus ngu to tidatida.’

¹⁶ Cikama nduno, ijeruca, onde ku ihorokere ndi ku ninge omukareri ngu omuhokorori guandje gua shi ua mona na shi andi ke ku ororera okuza mpa.

¹⁷ Andi ku kuca motshiguana shika mo maapagani ku mboka to ka tumua kungaje ngashingika.

¹⁸ Ngueje u pashure omesho gauo, opo j’idirurure, ja piramene eemrema, ja game kuujerere j’iteke epangero rjomusatana, jo ja tshune ku Karunga, opo ja peue edimopo rjeendjo nuuciga uujapuki moru’ehiteero rjokuiteerandje.’

¹⁹ Otsho ano, mukuaniirua Agrippa, inandi tinda okuiteera ehoroko ndika rjomeguru.

²⁰ Aaue, ond’uvicire tango mboka jomu Damaskus no mu Jerusalem no motshirongo atshishe tsha Judea. Okuza hoka ond’uvicire aapagani, jo j’idirurure, ja tshune ku Karunga, ja ninge iironga jehidirururo rjotshiri.

²¹ Otsho aajuda ja kuaterandje sho nda ri motempeli, ja ara okudipagandje.

²² Ndere moru’ekuaco negameno rja Karunga ngaje opo ndi ri sigo okesiku rjonena, andi okororere aacigona naajamba di da popiua ike kaaprofeti no ku Moses, di nokuguanicua.

²³ Nokutja Kristus ta k’epekua, ta ka jumuka kuusi ng’omutetekeri, he ta k’uvicira otshiguana naapagani uujerere.”

²⁴ Sho kua tire ngaano nokuipopira, Festus oku’igida muure a ti: “Oua pirarara meendunge Paulus. Ehirongo rjeehapu doka odindji otari ke ku pirarareka eendunge.”

²⁵ Ndere Paulus okua ti: “Inandi pirarara meendunge, Festus nakusimanekua, aaue, andi popi eehapu dotshiri, inandi jaduuka.

²⁶ Omukuaniirua oku tshi naua iinima mbi, omoruashi ngaje nda popi nehinekero. Ndi tshi kapu na tsha tshomu mbika tsha orama ku he, ongashi inaji ningirua mekororo rja penipeni.

²⁷ Ngueje, mukuaniirua Agrippa, ou’iteera aaprofeti? Ondi tshi tshi nokutja ngueje ou’iteera.”

²⁸ Ndere Agrippa okua rombuera Paulus: “Okonjaranjara u’ekandje ndi ninge omukriste.”

²⁹ Nena Paulus okua ti: “Ando Karunga e tshi tu pe nokutja ha konjara ike, aaue, ciruciru, ha ngueje ike, aaue, ajeshejeshe mba taa huvundje, ja ninge nena onga ngaje, omarjenge ngano, aaue.

³⁰ Nena omukuaniirua okua cikama nomureri guotshirongo na Berenike najeshe mba ja kaatumba pu jo.

³¹ Mokuza mo oja kundacana ja ti: “Omurumentu nguka ina ninga tsha tshokugeerua neso nenge nokumangua.”

³² Agrippa okua rombuere Festus: “Omuntu nguno, ngeno kua ina icana etokoro rjomukuaniirua andora ota vuru okueciua.