Iironga 25 - Etestemente Epe ✠ 1951

ONTOPORUA 25. Paulus ta purua ku Festus

¹ Festus okue ja motshirongo tshe. Okuza mpo omasiku gatatu, a zi ku Kesarea ta hi ku Jerusalem.

² Nena aapristeri aakuruntu naanamadina jaajuda oj’engene ku he nehumaneko rjauo rjokuumaneka Paulus, nde je mu indire,

³ e ja pe oshenda hokuiteera kutja ta farua ku Jerusalem. Oja ara oku mu rangera, je mu dipage mondjira.

⁴ Festus okua jamukura nokutja Paulus ta kara a kuatua mu Kesarea, na he muene ota hi ko ngashingika.

⁵ Ta ti: “Jamue jomokati keni naa je uo, jo je mu umaneke nge oku nondjo momurumentu ngu.”

⁶ Sho a menekere pu jo omasiku uunutatu nenge omurongo ike, okua hi ku Kesarea. Mesiku rja nofu okua kaatumba kotshipundi tshetokoro nde t’etica Paulus.

⁷ Ngija a farua ko, aajuda mba ja zire mu Jerusalem, oje mu kondeke, jo je mu pe eendjo eedigu do odindji. Ndere oja njengua oku di tompera,

⁸ oshoka Paulus oku’ipopire a ti: “Ngaje inandi jona tsha no kompango haajuda no kotempeli, no komukuaniirua.

⁹ Ndere Festus sho a hara okuipandica kaajuda, okua jamukura Paulus a ti: “Ngueje oua ara oku ha ku Jerusalem, oko ndi ke ku puakene?”

¹⁰ Paulus okua ti: “Onda cikama potshipundi tshetokoro rjomukuaniirua, opo ndi nokupurua. Inandi ningira tsha aajuda ngashi ngueje muene u tshi tshi naua.

¹¹ Nge nda ningi uuhineji, nenge ndi nondjo hokusa, itandi tindi ndi se. Ndere nge taa humanekerendje ouara, nena kaku na ngoka ta vuru okugandjandje momake gauo. Onda ara okutokorua komukuaniirua.”

¹² Nena Festus sho a popi nomarenga ge, okua jamukura a ti: “Ngueje ua ara okutokorua komukuaniirua. Ano oto hi komukuaniirua.”

¹³ Omasiku gamue sho ga piti, omukuaniirua Agrippa na Berenike oje ja ku Kesarea, ja tarere po Festus.

¹⁴ Sho ja menekere po omasiku ogendji, Festus oku’okororere omukuaniirua eehapu da Paulus a ti: “Mpaka opu nomurumentu omukuatua, a cigua po ku Feliks.

¹⁵ Sho nda ri ku Jerusalem, aapristeri aakuruntu naakuruntu jaajuda oje ja kungaje morue, ja arerera epanguro rje.

¹⁶ Onde ja jamukura: “Kagu shi omukaro guaaroma okupangura omuntu uusama manka ina tegamekua naahumaneki je, he ina mon’ecimbo rjokuipopira nokuiceta komajonaguro.

¹⁷ Ano, sho je ja huka, ngaje inandi arura okukaatumba kotshipundi tshetokoro mesiku rja nofu, ongashi nd’etica omurumentu nguka.

¹⁸ Nena aahumaneki je, mba je mu cikamene, inaje mu umanekera iinima mbi nda tengeneka uuhineji.

¹⁹ Aaue, oja ri ouara nomarudi gamue gomarongo gauo na nakusa Jesus, ngu Paulus a tire, oku nomuenjo.

²⁰ Ngaje shi nda rimbirirua moru’etokoro rjiinima ja tja ngaaka, onde mu pura, nge a hara oku ha ku Jerusalem, oko a ka purirue iinima mbika.

²¹ Ndere Paulus, sho a hicana omukuaniirua e mu tokore, ngaje onda gandja ohapu a kare manka a kuatua, sigo andi mu tumu komukuaniirua”

²² Agrippa okua rombuera Festus: “Nangaje uo onda ara okuuva omuntu ngu.” He ta ti: “Ngura oto ke mu uva.”

²³ Esiku rja nofu, Agrippa na Berenike, sho je ja mehoparo rjuurenga oundji monguru hetokoro puamue naakuruntu jaakuiita naarumentu aanamadina jotshirando, Festus oku’icana uo Paulus.

²⁴ Nena nduno Festus okua ti: “Mukuaniirua Agrippa, naarumentu ne amushe mu ri puamue nasse, tareni omurumentu ngu a gongarica ongundu ahishe haajuda, he ja kungaje mu Jerusalem, jo j’indira j’igida muure, ka kare ue nomuenjo.

²⁵ Ndere ngaje nda dimburura nokutja ke nondjo hokusa. Ndere he muene, sho a harere okutokorua komukuaniirua, ngaje nda ara oku mu tuma ko.

²⁶ Kandi tshiuo shoka andi tshangere Muene guandje. Otsho nde mu etera mpaka miipaci jeni, ndere unene okotshipara tshohe, mukuaniirua Agrippa, opo ndi mone ondjira hoku mu tshangera tsha, nge tue mu puakene.

²⁷ Oshoka otsha f’uurai nge atu tumu omuntu a mangua, sse inatu tshanga uo, sho t’umanekerua.