Iironga 24 - Etestemente Epe ✠ 1951

ONTOPORUA 24. Paulus ta purua komureri Feliks

¹ Omasiku gatano, sho ga piti, omupristeri omukuruntu Ananias naakuruntu jamue, nomupopiri guauo Tertulus oje ja, ja cikama motshipara tshomureri guotshirongo ng’aahumaneki ja Paulus.

² Nde Paulus, sho a hicanua ko, Tertulus okua shimbike etamaneko rje a ti: “Moru’ongueje sse tu ri mombiri ohindji, nomeere gohe ga pukurura otshindji.

³ Shoka otue tshi dimburura arushe napeshe, sse tua pandura Feliks, nakusimanekua!

⁴ Ndere katu pijaganeke orure, ss’atu ku garikana u tu puakene mondjeerera hohe okacimbo okatshona kouara.

⁵ Omurumentu nguno sse otue mu dimburua omupijaganeki mokati kaajuda jomuujuni aushe, omutse guotshimpaga otshineji tshaanatsareni.

⁶ Okua erekere okunjateka otempeli. Sse tue mu kuata tu mu geere kompango hetu.

⁷ Ndere Lisias omukuruntu guaakuiita okue ja ko, te mu kuca neenkondo odindji momake getu.

⁸ A rombuera aahumaneki je, nokutja je nokuja kungueje. Ngueje muene oto vuru okutshiua tshiri iinima ajishe mbjoka atu mu umanekere, nge to mu purapura.”

⁹ Otsho aajuda jakuauo ja popi, je mu rombuera nokutja otsho tsha tja ngaa.

¹⁰ Ndere Paulus okua jamukura, ngija omureri guotshirongo e mu anda a popje: “Shoka onde tshi tshiua naua nokutja ngueje omupanguri guotshiguana shika eemvo odindji, ngaje nda ara nd’ipopire nehinekero.

¹¹ Oto vuru okutshiua naua nokutja omasiku omurongo na gaari ike ga piti, hera nde ja ku Jerusalem, ndi garikane.

¹² Jo inaa hadandje motempeli nd’umana nenge nda vundakanica aantu mosinagoga.

¹³ Nenge motshirando. Otsho oja njengua oku tshi ku tompera sho j’umanekerandje nena.

¹⁴ Ndere shoka andi tshi ku epururire nokutja otandi karere Karunga kootate handje kerongo ndi tari rukua ku jo erongo rjiirombo, nokutja nd’iteere atshishe sho tsha tshangua mompango no maaprofeti.

¹⁵ Otsho ngaje ndi netegerero mu Karunga, nokutja oku nejumuko rjaajuki no rjaarunde, ndi jojene je na uo.

¹⁶ Ano nduno ngaje nda kembadara ndi kare arushe nomutima kagu nokapogodidi motshipara tsha Karunga no tshaantu.

¹⁷ Eemvo odindji sho da piti nokuri, ngaje onde ja ndi etere jaandjetu iikuaca, ngaje ndi gandje omagano, ndi gane omaganeno.

¹⁸ Piironga mbika jo oja monandje motempeli, sho nd’icetica, ndere kapua ri epijagano rjaantu nenge ombujo.

¹⁹ Tshiri okua ri aajuda jamue, ja zi ku Asia. Jo oja fere ja cikame uo motshipara tshohe mpee, j’umanekendje, nge oje na tsha kungaje.

²⁰ Nenge mboka je ri mpoka naa tje ngaa, oja monene mungaje ejonaguro rja tshee ngija nda cikama motshigongi tshaakuruntu.

²¹ Shira ohapu ndjija himuike nd’igidire, sho kua nda cikama mokati kauo: ‘Omoru’ejumuko rjaasi ngaje tandi ka pangurua nena kune.”

²² Feliks ngu a tshiua naua omarongo ngaka, okue ja rareka manka a ti: “Omukuruntu guaakuiita Lisias, nge te ja, opo tandi puakene eehapu deni ng’omupanguri.”

²³ Okua rombuera ondjai, hi mu rangere nomarangero kage nuudigu. Jakuauo kaa hindikirue oku mu jakura.

²⁴ Okuza mpo omasiku gamue, Feliks okue ja nomukiintu gue Drusilla, ngu a ri omujuda. A hicanene Paulus, nde te mu puakene keehapu dehiteero rjokuiteera Jesus Kristus.

²⁵ Nde sho a popi uujuki nuushekesheke nepanguro rjokomesho, Feliks okua kekama a ti: “Inda manka, andi ku icana pecimbo ndi tari k’oparerandje.”

²⁶ Ndere okua diradira uo nokutja Paulus te mu pe iimariva. Otsho he e mu icana orundji, ta popi na he.

²⁷ Eemvo mbari sho da piti. Feliks okua randurua ku Portius Festus. Ongashi Feliks sho a hara okuoparera aajuda, okua cigi mo Paulus meemango de.