Iironga 22 - Etestemente Epe ✠ 1951

ONTOPORUA 22. Ehipopiro rja Paulus miipaci jaajuda

¹ “Jarumentu ne aamuameme, nootate, puakeneni nena shoka andi popi miipaci jeni kehipopiro rjandje.”

² Sho j’uvu ta popi na jo meraka rjaahebrei, oja muena ciru ciru.

³ Nde ta ti: “Ngaje omujuda, nda varerue mu Tarsus tshomu Kilikia, ndere onda putuka motshirando shika, ngaje nda rongua keempadi da Gamaliel ndi tshiue eemkaro dotshiri nompango hookuku, nda ri ofure pokurongera ompango ngashi nane nanena amushe amu ningi.

⁴ Ngaje nda tidire ondjira ndjika sigo okeso sho nda mangere ngaje nd’edirire aarumentu naakiintu mondrongo.

⁵ Ndere omupristeri omunene, ontari homuhokorori guandje, aakuruntu uo ajeshe, mba ja perendje eentumuafo, sho nda hire kaakuetu joku Damaskus, oku za hoka ndi farere aamangua ku Jerusalem kegeero.

⁶ Opua ningi, sho nda ha ko, ngija kanda ri kokure na Damaskus, petango rjobandamutse, onda adiminua naanzija kuujerere uunene uokeguru.

⁷ Ond’ishata pevi, ngaje nd’uvu eui rja popi nangaje: “Saulus, otshike to tidatidandje?”

⁸ Ngaje onda jamukura: “Muene ongueere?” Nde he ta ti: “Ongaje Jesus omunatsaret, ngu to tidatida.”

⁹ Mba ja ri nangaje oja tara uujerere, ndere eui rja ngu a popire nangaje kaje ri uvire.

¹⁰ Ngaje onda ti: ‘Muene nandi ninge tshee?’ Muene okua rombuerendje a ti: “Cikama u he ku Damaskus. Oko to ka rombuerua atshishe sho u nokuninga.”

¹¹ Ndere ngaje sho nda togua kotshite tshuujerere, onda kuatua kaakuetu keke, nde ja ku Damaskus.

¹² Ananias omurumentu omujuki komukaro guompango, a simanekua kaajuda ajeshe, mba ja ri ko,

¹³ okue ja kungaje, ta cikama ponto handje ta ti: “Saulus mumuameme, taatara” Nde mostunde tuu ndjika ngaje onda mono ko itsheue.

¹⁴ He ta ti: “Karunga kootate okue ku uca ngueje u tshiue eharo rje, u tare Omujuki ngueje u uve eui rje ndi rja zi mokana ke.

¹⁵ Ou nokuninga omuhokorori gue u hokororere aantu ajeshe shoka ua mona na shi ua uva.

¹⁶ Nena nduno ua shukumana ko tshee? Cikama ngueje u tshatshue, eendjo dohe di koshue po, nge u’icana edina rje.’

¹⁷ Opua ningi, sho nda garukire ku Jerusalem, nda garikanene motempeli, onda s’onkunkumucika.

¹⁸ Onde mu mona, nde ta ti kungaje: ’Enderera, za mo nzija mu Jerusalem, oshoka itaa ka tuumba ehokororo rjohe rjokuokororandje.’

¹⁹ Ndere ngaje onda ti: ‘Muene jo jene oje tshi tshi nokuri ngashi nd’edirire mondrongo, ngaje nda dengicire neengora moosinagoga ajeshe mba je ku iteera.

²⁰ Ombinzi ha Stefanus, h’omuhokorori guohe, sho ha tirashirue, nangaje oko nda ri, kua nda panda nda rangera eenguo da mboka je mu dipaga!

²¹ He okua rombuerandje: ‘Inda ko, oshoka nda ara ndi ku tume kaapagani jokokure.”

²² Oje mu puakena sigo okohapu ndjika. Nena oj’igida muure ja ti: “Na kucue po pevi omuntu a tja ngaaka. Inatsh’opara a kare nomuenjo.”

²³ Sho j’igida muure, ja tshiki eenguuo dauo, ja fundire evi pombanda.

²⁴ Omukuruntu guaakuiita okua popi je mu fare monguru haakuiita, je mu denge, jo je mu epeke, opo a tshiue naua sho tshe ja igidica.

²⁵ Ano sho je mu manga a dengue neengora, Paulus okua rombuere ondjai ndji ha cikama mpoka: “Omu nepitiko rjokudenga omuroma nanto ina pangurua?”

²⁶ Ondjai sho he di uvu, oha hi komukuruntu guaakuiita nde tahi di mu rombuere ha ti: “Ngueje oua ara okuninga tshee? Omuntu nguno omuroma.”

²⁷ Nena omukuruntu guaakuiita okue ja nde ta ti ku he: “Rombuerandje, ngueje omuroma?” Nde ta ti: “Eno.”

²⁸ Omukuruntu guaakuiita okua jamukura: “Ngaje onda randa uukuatshirongo mbuka niimariva ojindji.” Paulus okua ti: “Ngaje omuroma hera nda varua.”

²⁹ Nena ajeshe mba ja ara oku mu epeka, oje mu eca. Omukuruntu guaakuiita okua tira, sho a huvu nokutja he omuntu omuroma, na shi e mu mangica.

³⁰ Ndere sho a hara kutshiua naanaa nokutja aajuda oje mu tamenekere morua tshike, okue mu mangurura mesiku rja nofu, nde t’icana aapristeri notshigongi atshishe tshaakuruntu. Nde ta tura Paulus miipaci jauo.