Iironga 21 - Etestemente Epe ✠ 1951

ONTOPORUA 21. Paulus ota kuatua kaajuda mu Jerusalem

¹ Okuza ku mbjoka, sho tua ri tua ha nokatembameja, tua topokere na jo, sse otu’ukirire ku Kos, mesiku rja nofu ku Rodus, okuza hoka ku Patara.

² Hu tua adere okatembameja, ka ara okuha ku Fenikia. Sse otue ka ronda, tua hi.

³ Sho tua tara Kipros, nde tue tshi cindike korumosho, sse tu’ukirira ku Siria no tua ciki ku Tiros. Hu okatembameja ka ri ke nokuerura iihumbatua.

⁴ Oko tua ada aarongua no tua kara po omasiku uunuari. Jo ja rombuera Paulus meendunge d’Ombepo Ondjapuki, ka he ku Jerusalem.

⁵ Omasiku ngano sho ga shuru, sse otua cikama, atu hi. Ojo ajeshe, aakiintu naanona oja enda nasse, sigo otua zi mo motshirando. Mpono pomukunkuru guefuta, sse tua tseengoro, atu garikana.

⁶ Sho tua rarekecana, sse tua rondo okatembameja. Mbejaka ja tshuna kaandjauo.

⁷ Okuza ku Tiros sse tua shurica orueendo ruetu nokatembameja mu Ptolomais. Otua kunda aarongua aamuameme, tua kara pu jo esiku rimue.

⁸ Otua zi ko esiku rja nofu nde tue ja ku Kesarea. Tua hi mondjugo homuevangelisti Filippus, gumue gua mboka uunuari nde tua kara pu he.

⁹ Ngoka okua ri e nojana aakadona jane, inaa hokanua, ja ri negano rjokushunganeka.

¹⁰ Sho tua menekere mpano omasiku gamue, omuprofeti edina rje Agabus okue ja a zi ku Judea.

¹¹ Nguno okue ja kusse, ta kuca omunja gua Paulus, t’imanga na guo komake no komaguru, nde ta ti: “Otsho Ombepo Ondjapuki ahi ti: Muene guomunja ota ka mangua otshingi kaajuda jomu Jerusalem, nde jo taje mu gandja momake gaapagani.”

¹² Sho tue di uvu, sse jene na mboka ja ri mpo, otue mu garikana, ka he ku Jerusalem.

¹³ Ndere Paulus okua jamukura nde ta ti: “Otamu ningi tshee sho tamu riri ne tamu pendje uupongo. Itandi ihecere ike ndi mangue, aaue, ndi sire uo edina rja Muene Jesus mu Jerusalem.”

¹⁴ Sho tua njengua oku mu tshirika, otua muena tua ti: “Eharo rja Muene nari guanicue.”

¹⁵ Momasiku ngaka sse otu’irongikida tu he ku Jerusalem.

¹⁶ Aarongua jamue jomu Kesarea oja hi puamue nasse. J’eta uo omurongua guomecimbo rjonare a zi ku Kipro, Mnason, tu mone uuhenda pu he.

¹⁷ Sho tua ciki mu Jerusalem, aarongua aamuameme oje tu tuumba nenjanju.

¹⁸ Na ngura Paulus ta hi puamue nasse ku Jakobus. Mpa pua gongarere aakuruntu ajeshe.

¹⁹ Sho a minika ajeshe, okue j’okororere ajishejishe mbjoka Karunga a ronga mokati kaapagani moru’iironga je.

²⁰ Mbano sho je di uvu, oja amberera Karunga ja ti ku he: “Mumuameme, ngueje ou uete nokutja omajovi ogendji gaajuda oja ninga aahiteeri. Ndere oja kara aadiginini aanerama jompango.

²¹ Mboka oje ku kundana nokutja ua ronga aajuda mba je ri mokati kaapagani, j’iteke Moses niipango je, ngueje to ja rombuere anuua, kaa fukareke ue ojana, kaa diginine ue eemkaro.

²² Atu ningi nduno ngiini? Otshiri ongundu otahi ka gongara, oshoka otaa k’uva nokutja ngueje ue ja po.

²³ Ano nduno ngueje ninga shoka atu ku rombuere. Pusse opu naarumentu jane, mba ja gana eganeno.

²⁴ Mboka ja tuumba ano, ijereka na jo, ngueje u ja futire uo, jo j’ikururice keemtse. Nena ajeshe otaje tshi dimburura nokutja ja rombuerua iirombo, nde ngueje muene oto ende ondjira hompango nuudiginini.

²⁵ Ndere shoka otsha tsa paapagani, mba ja ningi aahiteeri, sse tua tshangere omatokoro getu, nokutja oje nokuidirika konjama hoshura kombinzi, konjama ha sotshipuininika, no komahondero.”

²⁶ Paulus ano okua tuumba aarumentu mbejaka, noku’iceta esiku rja nofu na jo, okua hi na jo motempeli nde t’orora esiku ndi tari shurica omasiku gehiceto na ndi rjokueta egandjo rja keshe gumue.

²⁷ Ndere omasiku uunuari sho ga piti, aajuda mba ja zi mu Asia, je mu mona motempeli, oja tsitsimike aantu ajeshe, je mu kuata nde taa higida muure:

²⁸ “Jarumentu ne aaisrael, tu kuaceni! Omuntu nguno ohe tuu ngoka ta rongo aantu ajeshe nakushe noku ja dinica otshiguana nompango neshara ndika. Ongashi oku’etere motempeli aapagani, a njateka ngaano otempeli.”

²⁹ Oshoka oje mu mona motshirando puamue na Trofimus omuefesi. Jo kua ja ruka, Paulus okue mu eta motempeli.

³⁰ Nena otshirando atshishe otsha tameke okupijagana, aantu oja tondoka, je ja ko kumue, ja kuata Paulus, nde taje mu kokorora mo motempeli. Iijeero j’edirua nzija.

³¹ Nde sho j’erekere oku mu dipaga, omukuruntu guaakuiita oku’okororerua nokutja Jerusalem atshishe otsha vundakana.

³² Nguno okua kuca nzija aakuiita neendjai dauo, nde ta tondokere ko ku jo. Nde sho ja mono omukuruntu guaakuiita oj’eca okudenga Paulus.

³³ Omukuruntu guaakuiita oku’engene ko, e mu kuata, nde te mu mangica nomarjenge gaari. Te ja pura, nguno ore, na shoka a ningire.

³⁴ Jamue jomongundu oj’igida di, jamue dija. Sho a njengua mombujo ndjika okuuva tsha shoka tsha tsa, okue mu farica konguru haakuiita.

³⁵ Nokua ningi, sho e ja kiirjatero, aakuiita oje mu umbata moru’omacinaneko gaantu.

³⁶ Oshoka ongundu onene haantu ohe mu randura, h’igida ha ti: “Mu kuca po.”

³⁷ Ndere sho ja ara ja fare Paulus meni rjonguru, he a popi komukuruntu guaakuiita a ti: “Otsha pitikua ndi popje nangueje?” He okua jamukura: “Oto popi otshigreka?

³⁸ Ngueje ku shi omuegipti nguija, a tukurukicire epijagano momasiku ngeja, a farere aakorokoshi omajovi gane mombuga?”

³⁹ Paulus okua ti ku he: “Ngaje omujuda guomu Tarsus, omuntu guomotshirando tsha simana, mu Kilikia. Ngaje andi ku garikana, pitikirandje ndi popje kaantu mbo.”

⁴⁰ Nde sho e tshi mu pitikire, Paulus okua cikama potshirjatero, a handa aantu neke rje. Ongashi ja muena. A popi na jo otshihebrei nde ta ti: