Iironga 20 - Etestemente Epe ✠ 1951

ONTOPORUA 20. Ehuvico rja Paulus mu Troas no mu Milet

¹ Ombujo ndjika sho ha muena, Paulus oku’icana aarongua, e ja kumagida, he te ja rareke nde ta zi po a he ku Makedonia.

² Sho a hendahenda niirongo mbika nde ta kumagida aarongua neehapu odindji, okua ciki motshirongo Greka.

³ Sho a ningi mo eemuedi ndatu, aajuda oje mu rangera neji, ngija a hara okuronda okatembameja a he ku Siria. Oku’idiradira momuenjo gue okugaruka nokupitira mu Makedonia.

⁴ Oj’ende puamue na he, Sopater ha Pirrus omuberea, Aristarkus na Sekundus aatessaloniki, Gajus omuderbe, na Timoteus, na mbo ja zi mu Asia, Tishikus na Trofimus.

⁵ Mboka ja tetekere, je tu tegerere mu Troas.

⁶ Omasiku giikuiira iitoue sho ga piti, sse otua zi ku Filippi, tua rondo okatembameja, nde omasiku gatano sho ga piti, otue ja ku jo mu Troas. Hoka tua menekera omasiku uunuari.

⁷ Sho tua gongarera esiku rjotango rjotshivike pepamburo rjombroto, Paulus okua kundacana na jo. Nde sho ta ara okuha esiku rja nofu, okua tsikire ehuvico rje sigo opokati kuusiku,

⁸ Eelampa odindji da ri motshoto moka tua ri tua gongara.

⁹ Omunjasha gumue, edina rje Eutikus, kua a kaatumba pekende. Okua kuatua keemposi eedigu Paulus sho a popi orure. Nde mokukoca okua gu montara ontitatu hondjugo, a ri a sa ngija a shumburua.

¹⁰ Paulus okua rondoroka, ta hi ku he, ta rara kombanda he, te mu kuata nomooko ge ta ti: “Inamu tira, omuenjo gue omo gu ri.”

¹¹ Okuza mpoka okua rondo itsheue, a pambura ombroto, a ri. Nde sho a popi ngaa nanena sigo eruua rja tende, okua hi.

¹² Omunjasha oje mu eta omunamuenjo, jo j’ekerericua unene.

¹³ Sse otua ronda okatembameja, atu hi ku Assos. Hoka tua ara tu piture Paulus. Otsho e tu rombuera, sho a hara oku ha ko korupadi.

¹⁴ Ano sho e ja kusse mu Assos, otue mu tuumba nde tua hi ku Mitilene.

¹⁵ Okuza hoka nokatembameja sse tua tegama na Kios esiku rja nofu. Esiku rimue sho rja zi ko, sse tua ciki mu Samos, nde tue ja mesiku rja nofu ku Milet.

¹⁶ Oshoka Paulus oku’idiradira momuenjo okupitirira Efesus, ka shukumane mu Asia, a henderera a ka dane efeste rja Pentekosten mu Jerusalem, nge ta vuru.

¹⁷ Mu Milet okua tumu aatumua ku Efesus, nde t’icana aakuruntu jegongaro.

¹⁸ Sho je ja ku he jo ja ri puamue, okua ti ku jo: “Omu tshi tshi ongashi nda ri puamue nane omasiku ageshe okuza kesiku rjotango ngija nda ciki mu Asia.

¹⁹ Ngaje nda rongera arushe Muene mehitshonopeko arishe, momoodi no momamakero nga nda ningirua moru’omarangero gaajuda.

²⁰ Ongashi ngaje inandi mu orekera tsha shoka tsh’opara, aaue, onde tshi mu uvicira ngaje nde tshi mu ronga miipaci jaantu ajeshe no meendjugo.

²¹ Onda kumagida aajuda naapagani, jo j’idirurure ku Karunga, j’iteere Muene guetu Jesus Kristus.

²² Ndere nena tareni, ond’ihuvite nda ciminikua momuenjo ndi he ku Jerusalem, ndere kandi tshiuo shoka tatshi ka tsakanekandje ko.

²³ Tshiri, Ombepo Ondjapuki tahi popi nde tahi rombuerendje miirando niirando okutja omapando nomeepeko otaga tegererendje mu Jerusalem.

²⁴ Ndere shoka atshishe inandi tshi tira, ngaje kandi nuutende uorutu ruandje mbu u vure mbuija uomuenjo guandje. Onda ara ouara okuguanica eendjenda dandje muukarere uohapu, mbu nda peua ku Muene Jesus, nokutja ndi okorore evangelium rjesiroshenda rja Karunga.

²⁵ Tareni ano, ondi tshi tshi, itamu ka tara ue otshipara tshandje, ne amushemushe mba mua uvicirua otshirongo tsha Karunga, ngija nda endahenda pune.

²⁶ Otsho tandi mu rombuere mesiku rjonena: Ngaje kandi nondjo hombinzi homuntu guontumba.

²⁷ Oshoka ngaje kanda ri nuuheci poku mu uvicira ehuco arishe rja Karunga ndi rjokuupica aantu.

²⁸ Ikotokereni, kotokereni otshigunda atshishe ne mua rangekua k’Ombepo Ondjapuki ng’aaepiskopi, ne mu pangere eklesia rja Jesus Kristus ndi a hirongera nombinzi he.

²⁹ Ondi tshi tshi, ngaje nge nda zi po, iimbungu ja rjagana jo taji guajere mo mokati keni, itaji sire otshigunda oshenda.

³⁰ No mokati keni omu naarumentu, taa ka cikama, jo taa ka popja eehapu di kadi shi d’uka, ja ara okushirira aarongua kombinga hauo.

³¹ Ano nduno taatareni! Dimburukueni nokutja eemvo ndatu, uusiku nomutenja inandi zimbuka okukumagida nomoodi keshe gumue mokati keni.

³² Nena ngaje andi mu gandja ku Karunga no kohapu hoshenda ha ngu e neenkondo dokutunga do dokupa ajeshe uuciga, mba ja japurua.

³³ Otshisilveri nenge otshingoldi nenge eenguuo inandi di arera ku gumue.

³⁴ Ongashi mu tshi tshi ne jene, nokutja atshishe shi tua pumbua, ngaje muene na mba ja ri puamue nangaje, omake ngaka oge tshi gandja.

³⁵ Miinima ajishe ngaje onde mu urukira nokutja sse otu nokukerera aankundi kekano niironga jetu jene, sse tu dimburukue arushe ohapu ha Muene Jesus ngu a tja: ‘Mokupa omu nerago ri vure ndjoka rjomokuperua’.”

³⁶ Sho a popja eehapu doka, okua tseengoro nde ta garikana puamue na jo.

³⁷ Ajeshejeshe oja riri uneenene, ja guire Paulus kocingo, taje mu cipi keemrungu.

³⁸ Ndere uupongo uauo ua ningi uunene moru’ohapu ndji e ja rombuera nokutja itaa ka tara ue otshipara tshe. Ongashi je mu cindikire sigo ok’okatembameja.