Iironga 2 - Etestemente Epe ✠ 1951

ONTOPORUA 2. Pentekosten

¹ Esiku rja Pentekosten sho rje ja, ajeshe kua j’igongera peshara rimue.

² Naanzija okue ja epupo rj’uvika meguru, rja f’otshikunguru tatshi ende, tsho tatshi uda ondjugo ahishe, mu kua ja kaatumba.

³ Omaraka ga f’omuriro oge ja orokere, go pombanda ge neempaga. Nde keshe gumue guomokati kauo okua namberua ku rimue.

⁴ Jo ajeshe oj’udua Ombepo Ondjapuki, taa shimbike okupopja omaraka giiri no giiri, ngashi Ombepo Ondjapuki he ja pe okupopja.

⁵ Nde mo mua kara mua menekera mu Jerusalem aajuda, aarumentu aajuki jokiirongo ajishe jokoshi heguru.

⁶ Eui ndika, sho rj’uvika, ongundu onene haantu oha gongara, ja rurirua, oshoka keshe gumue okue j’uvu, sho taa popi eraka rjaangandjauo.

⁷ Ajeshe oja rurirua, nde taa ti: “Tareni ajeshe mboka taa popi, kaje shi aagalilea?

⁸ Ongiini sho tatu j’uvu keshe gumue mokati ketu meraka rjotshirongo tshetu, mu tua vererua.

⁹ Ss’aaparti naamedi naaelamiti, sse aantu jo mu Mesopotamia, jo mu Judea, jo mu Kappadokia, jo mu Pontus, jo mu Asia,

¹⁰ jo mu Frigia, jo mu Pamfilia, jo mu Egipti, jo meemkunda doka da Libia, da gama ku Kirene, sse tua zi ku Roma,

¹¹ aajuda naaproseliti naakreta naarabia, ss’atu j’uvu taa huvica iironga iinene ja Karunga momaraka getu?”

¹² Ajeshe oja rurirua, oja puracana ja ti: “Shino otshitshee nduno?”

¹³ Ndere jamue oja njana ja ti: “Oja korua ngiika komavinju omatoue.”

¹⁴ Okuza mpoka Petrus okua cikama puamue nomurongo na gumue, neui rjomuure he t’uvica ta ti: “Jarumentu aajuda, na ne aajerusalem amushe, kareni mu tshi tshi naua, puakeneni eehapu dandje.

¹⁵ Mboka inaa korua ngashi mua ti, aaue, otu nostunde ontitatu hesiku.

¹⁶ Ndere otatshi guanicua shoka tsha romborua komuprofeti Joel:

¹⁷ ‘Otaku ka ninga momasiku ga shugunina, — Muene ta ti, — Ngaje otandi tirire kombanda honjama ahishe ombepo hom’Ombepo handje; nojana jeni aamati nojana jeni aakadona otaa ka shunganeka, naanjasha jeni otaa ka mona omamoniko, jo aakuruntu jeni taa ka rar’eendjodi.

¹⁸ Eno, no kombanda haapija jandje no haarerua jandje otandi tirire ombepo hom’Ombepo handje, jo taa ka shunganeka.

¹⁹ Otandi rongo iironga iinjengandunge pombanda keguru, nomadidiriko poshi kombanda hevi: ombinzi, nomuriro niikogo joruci.

²⁰ Etango otari ka tshituka eemrema, omuedi ombinzi manka inari cika esiku ndjoka rja Muene, esiku enene, ndi rja simana.

²¹ Otaku ningi nokutja keshe ngoka t’icana edina rja Muene, ota ka upicua.

²² Jarumentu ne aaisrael, puakeneni keehapu di: Jesus omunatsaret, omurumentu tuu ngu mua okororerua ku Karunga miironga jeenkondo no miinjengandunge, no momadidiriko, nga Karunga a ronga mokati keni mu he, ngashi ne jene mu ga tshi.

²³ Kehuco rja Karunga, ndi itari rundururua, no kouino ue uokutshiua uo iinima jokomesho, okue mu gandjerua. Nde ne mue mu arerica komutshigakano, ne mue mu dipagica komake gaahineji.

²⁴ Karunga e mu jumuda, he te mu ditura momeehamo geso, ongashi inari vura oku mu kuatera mu rjo.

²⁵ Oshoka David ote mu popi: ‘Muene oku ri arushe motshipara tshandje. He ta cikama korurjo ruandje, kandi punduke.

²⁶ Otsho omuenjo guandje otagu njanjukua, neraka rjandje otari rigora, nonjama handje otahi ka vururukua metegerero.

²⁷ Oshoka omuenjo guandje ito gu ecere motshirongo tshaasi, nomujapuki guohe ito mu eca a mone ehoro.

²⁸ Ngueje oto urukirendje ondjira homuenjo, oto ka udicandje enjanju enene, ndi tari zi kotshipara tshohe.’

²⁹ Jarumentu ne jamuameme, inandi ara okuumba omushe te popi omupatriarke David. H’okua sa, nde ta fumbikua. Ndere ombira he ohi ri ngaa nanena mokati ketu.

³⁰ Sho a ri ano omuprofeti, he a tshiua naua, nokutja Karunga e mu ganena, he ta rangeke kotshipundi tshuukuaniirua ue gumue guaaranduri je, ta zi mombuto he.

³¹ Otsho ngaa, manka a tara iinima jokomesho, ongashi a popja ejumuko rja Kristus, nokutja ita ka cigua motshirongo tshaasi, ho onjama he itahi ka mona ehoro.

³² Ohe naanaa Jesus, ngu Karunga a jumuda. Sse atushe eentari, ss’aahokorori jarjo.

³³ Okuza mpoka okua rengua, he ta kaatumba korurjo rua Karunga, he ta tire Ombepo Ondjapuki, ndji e hi mu rombuerua ku She, ndji mua mona no mua uva.

³⁴ Oshoka David ina ronda keguru, aaue, he muene ota ti: ‘Muene okua rombuera Muene guandje: Kaatumba korurjo ruandje,

³⁵ sigo andi ningi aatondi johe otshirjatero tsheempadi dohe.’

³⁶ Ano nduno, ondjugo ahishe ha Israel nahi tshi tshiue ng’ohapu hotshiritshiri, Jesus ngu mua arera ngaa komutshigakano, Karunga okue mu ninga Kristus, h’Omuene.”

³⁷ Sho je di uvu, oja rongora komuenjo, jo taa rombuere Petrus naapostoli jakuauo taa ti: “Jarumentu ne jakuetu, sse natu ninge ngiini?”

³⁸ Nde Petrus te ja rombuere: “Idirurureni, keshe gumue mokati keni, n’itshatshicire medina rja Jesus Kristus kediminopo rjeendjo deni. Ne tamu ka peua omagano g’Ombepo Ondjapuki.

³⁹ Oshoka ne jene mua rombuerua omarombuerero ngaka, naana jeni uo, najeshe mba je ri kokure, najeshejeshe, mba Muene Karunga ketu ta k’icana.”

⁴⁰ Oneehapu odindji do diiri e ja okororera, he te ja kumagida a ti: “Inamu tinda, opo mu upicue mo moruvaro nduka rua pirarara.”

⁴¹ Mba ja tuumba eehapu de, oja tshatshua. Rjo esiku tuu ndika okua guederua aantu ja fa je ri omajovi gatatu.

⁴² Ojo ja diginina merongo rjaapostoli, meguaneno rjokupambura ombroto, no momagarikano.

⁴³ Ajeshe oja kuatua ketiro enene. Otsho iironga iinjengandunge nomadidiriko omanene ga ningua kaapostoli mu Jerusalem. Opua ri etiro enene apeshepeshe.

⁴⁴ Aahiteeri ajeshe oja karacana naua puamue, rjo eriko rjauo taa ri tura mumue.

⁴⁵ Taa randa po iinima jauo ajishe, ja toporere ajeshe mba ja pumbua tsha.

⁴⁶ Keshe esiku oja kara motempeli, ja ts’ompango himue, nde jo taa pambura ombroto meendjugo. Ja rire iiparuca nenjanju no nuujuki ueemuenjo dauo.

⁴⁷ Oja amberera Karunga, jo ja ri mohore naantu ajeshe. Nde keshe esiku Muene okua nenepeka omujaru gua mbo ja ara kuupicua.