Iironga 18 - Etestemente Epe ✠ 1951

ONTOPORUA 18. Paulus t’uvica mu Korint nde ta tshuna ku Jerusalem. Ita kara ko.

¹ Konima ha mbjoka Paulus okua zi ku Aten, nde ta hi ku Korint.

² Ho a hada omujuda, edina rje Akuila, ngu a varerue mu Pontus. Opo a zire mu Italia puamue nomukiintu gue Priskilla, oshoka Klaudius okua pa aajuda otshipango ja ze mo mu Roma. Okua kara pu jo.

³ Sho a rongo uo otshironga tshauo, okua kara pu jo nde ta rongo. Jo ja ri aatungi jomalapi geesaila.

⁴ Omasabati ageshe okua popi mosinagoga nokutumbura uo edina rja Muene Jesus, he a kembadara okuiteerica aajuda naapagani.

⁵ Ndere Silas na Timoteus sho ja ciki ja zi ku Makedonia, Paulus oku’uvica nerama ndi ri vure rjonare, nde ta tompo aajuda nokutja Jesus ohe ngaa Kristus.

⁶ Nde sho ja patana nokunjana, okua pupura eenguuo de nokue ja rombuera: “Ombinzi heni nahi je kombanda heemtse deni. Ngaje kandi nondjo. Okonena otandi ka ha kaapagani.”

⁷ Okua zi ko hoka, nde te ja mondjugo homurumentu edina rje Titus Justus, a ri omukareri gua Karunga, ondjugo he ha kuatacana nosinagoga.

⁸ Krispus, muene guosinagoga, oku’iteera Muene nondjugo he ahishe. Otsho tuu ojendji jomaakorinti, mba ja puakena, oj’iteera nde ja tshatshua.

⁹ Ndere uusiku Muene okua popica Paulus memoniko a ti: “Ino tira ino muena.

¹⁰ Moru’okukara kuandje pungueje kapu na gumue te ku ishirire e ku ningire uuhineji, oshoka ngaje ondi naantu ojendji motshirando shika.”

¹¹ Okua kara mo omuvo gumue neemuedi kanekamue, nde t’uvica mokati kauo ohapu ha Karunga.

¹² Ndere Gallio, sho a ningi omureri mu Akaia, aajuda oj’uvacana okukondjica Paulus, no je mu fara kotshipundi tshepanguro.

¹³ Nde taa ti: “Nguno ota pukica aantu ja simaneke Karunga mondjira ndji inahi oparera ompango.”

¹⁴ Paulus, sho a hara kuekama okana ke, Gallio okua rombuere aajuda: “Jarumentu ne jajuda, ngeno kua ne mue ja moru’ejonaguro nenge otshironga tshududu, ando ngaje nda puakena kune ng’omupanguri.

¹⁵ Ndere sho tsha tsa ouara omarudi gomarongo, gomadina no giipango jeni, ne jene tsh’uceni, ngaje inandi ara oku tshi tokora.”

¹⁶ Ongashi e ja tida po potshipundi tshepanguro.

¹⁷ Nena ajeshe oja kuata Sostenes, muene guosinagoga, je mu denge potshipundi tshepanguro. Gallio okua ri ke na kona tsha na tsho.

¹⁸ Paulus sho a kara ko nanena omasiku ogendji, okua rareke aarongua aamuahina, nde ta rondo etembameja, ta hi ku Siria puamue na Priskilla na Akuila. Mu Kenkrea okua kururica omutse gue, oshoka a ganene eganeno.

¹⁹ Oje ja ku Efesus, nde te ja cigi po. He muene ta hi mosinagoga, nde ta kundacana naajuda.

²⁰ Sho je mu indire a menekere po omasiku gamue, in’iteera.

²¹ Okue ja rareke a ti: “Otandi ka garukira kune, Karunga nge e tshi ara.” Ongashi a zi mu Efesus.

²² Sho e ja ku Kesarea, okua hi ku Jerusalem, ta kundire po egongaro. Ndere okuza mpoka okua hi ku Antiokia.

²³ Sho a ningire mpano omasiku gamue, okua hi. A hendahenda miirando jomotshirongo tsha Galatia na Frigia he ta koreke aarongua.

²⁴ Omujuda edina rje Apollo, a varerua mu Aleksandria, h’onkurungu meehapu de, omunandunge guobibeli, okue ja ku Efesus.

²⁵ Okua ri a rongua mondjira ha Muene, t’uvica nomuenjo gua sama, ta rongo nerama shoka tsha tsa pu Jesus, nanto a ri e tshi ike etshatsho rja Johannes.

²⁶ He okua shimbike okupopja nuufure mosinagoga. Akuila na Priskilla sho je mu uvire, oje mu kuca po no je mu fatururire naanaa ondjira ha Muene.

²⁷ Sho a hara kuha ku Akaia, aarongua aamuahina oja kumagida montumuafo aarongua mbejaka, je mu tuumbe. Sho e ja hoka, okua kuaca unene ajeshe mba j’iteera

²⁸ A tompo aajuda neenkondo miipaci jaantu, he te j’urukire nokutja Jesus ohe Kristus.