Iironga 17 - Etestemente Epe ✠ 1951

ONTOPORUA 17. Omuapostoli Paulus t’uvica eehapu da Karunga mu Tessalonika no mu Aten.

¹ Sho ja piti mu Amfipolis no mu Apollonia, oje ja ku Tessalonika. Mpoka pua ri osinagoga haajuda.

² Komukaro gue Paulus okua ha mo ku jo, nde te j’uvicire omasabati gatatu eehapu dobibeli.

³ Okue di ja fatururira he te ja urukire nokutja Kristus okua ri e nokueepekua nokujumuka kuusi ta ti: “Kristus nguno ohe Jesus, ngu ngaje tandi mu uvicire.”

⁴ Jamue mokati kauo oj’iteera, ja gama ku Paulus no, ku Silas. Otsho uo ongundu onene ha mboka haa simaneke Karunga kotshiri no maapagani uo nojendji jaakiintu aanamadina.

⁵ Ndere aajuda oja geje. Oja kuca mongundu haantu aarumentu jamue aahineji, ja ngundumana, ja vundakanica otshirando, ja hi kondjugo ha Jason je ja kongo, je ja fare miipaci jaantu.

⁶ Sho inaa ja mona oja kokororere Jason naarongua jamue aamuahina komarenga gotshirando nde taj’igida taa ti: “Ojo mboka mba taa vundakanica otshirando nde je ja hu.

⁷ Jason okue ja tuumba. Jo ajeshe ohaa jono iipango jomukuaniirua, oshoka ohaa ti: ’Opu nomukuaniirua gurue, Jesus.”

⁸ Otsho ja tsitsimikire aantu nomarenga gotshirando, sho j’uvu eehapu di.

⁹ Ndere moru’omarombuerero gauo Jason noojakuauo oj’eciua.

¹⁰ Uusiku aarongua aamuahina oja tumu Paulus na Silas ku Berea. Sho ja ciki ko, oja hi mosinagoga haajuda.

¹¹ Mboka oja ri neemtima eemhanaua je vure mbejaka jo mu Tessalonika. Oja tuumba ohapu noku hi arerera, nde ja konakona keshe esiku mobibeli, nge otsh’uka tuu shoka ja rombuerua.

¹² Ojendji jomu jo oj’iteere, otsho uo maapagani aakiintu aanamadina naarumentu uo, kaje shi aatshona.

¹³ Ndere aajuda jomu Tessalonika, sho j’uvu nokutja Paulus ot’uvica ohapu ha Karunga mu Berea uo, oja hi hoka, ja vundakanica aantu nokuninga mokati kauo epijagano.

¹⁴ Okuza mboka aarongua aamuahina oja tumu Paulus a he ruo kefuta. Ndere Silas na Timoteus oja tumu Paulus a he ruo kefuta. Ndere Silas na Timoteus oja kara po.

¹⁵ Mba ja cindikira Paulus oje mu fara sigo okotshirando Aten. Taa garuka nohapu he hi romborue ku Silas no ku Timoteus, je je ku he nzijanzija.

¹⁶ Manka Paulus e ja tegerera mu Aten, okua geje unene momuenjo gue, sho a mona nokutja otshirando shika okua tsh’uda esimaneko rjiikarunga j’iirombo.

¹⁷ Mosinagoga okua popi naajuda noonakutirakarunga. Nomasiku ageshe okua popi pomarandero na ajeshe mba ja ri po.

¹⁸ Aanongo jamue jaaepikurei no jaastoa oja patacana na he ja ti: “Omujejagani nguno okua ara tshee?” Jakuauo oja ti: “He okua f’omuhokorori guiikarunga iipe” oshoka he okue ja uvicire Jesus nejumuko.

¹⁹ Oje mu kuca no je mu fara ko Areopag ja ti: “Itatu vuru nani okutshiua omarongo ngaka omape, nga taga uvicua kungueje?

²⁰ Oshoka oto etere omakutsi getu eehapu dimue eempe, no tua ara okutshiua nokutja do oda tshee?”

²¹ Aahateni ajeshe naakuiirongo mba ja kara mpo, oja pitica ecimbo rjauo arishe nokuokorora nenge nokuuva iinima iipe.

²² Paulus okua cikama pokati ka Areopag a ti: “Jahateni, ondi uete mu nehiteero miinima ojindjindji.

²³ Oshoka ngaje, sho nd’endagura nda tara iiherekera jeni jiikarunga, onda mona uo ohaltari hi netshangua ndi: ’Oha Karunga ina tshiuika. “Shoka tamu amberere nanto inamu tshi tshiua, ngaje andi tshi mu uvicire.

²⁴ Karunga ngu a tshita uujuni natshishe shoka tshi ri mo, ohe Muene gueguru no guevi, ita kara meetempeli di da tungua nomake.

²⁵ He otsho ka jakurua komake gaantu, a fa ngu a pumbua tsha, oshoka ohe muene ta pe ajeshe omuenjo nomufudo niinima ajishe.

²⁶ Okua tshita uo orudi arushe ruaantu, ndu rua za momuntu gumue, ru kare kombanda hevi arishe. Okua uca uo omacimbo neengamba dokukara kuauo.

²⁷ Jo ja konge Karunga, ja tare nge taa vuru oku mu pampadara noku mu mona, oshoka ka kara kokure na gumue guomokati ketu.

²⁸ Oshoka mu he tu nomuenjo, otu’injenganjenga, nde tua kara mo, ngashi aaruki jiiteuo jakueni ja tire: ‘Nasse uo orudi rue.’

²⁹ Moruashi nasse uo orudi rua Karunga, ano nduno inatu ara okudiradira nokutja uukarunga oua f’otshingoldi nenge otshisilveri nenge emanja, ua f’otshiherekera tsh’ongua nuunkurungu nomeere gopaantu.

³⁰ Tshiri Karunga oku’ididimikire omacimbo ngaka guusama. Nedere nena ota rombuere aantu nokutja oje nokuidirurura ajeshejeshe napeshepeshe.

³¹ Oshoka oku’ucire esiku rjokupangura uujuni aushe muujuki komurumentu ngu a hogororua ku he, he e mu jumuda kuusi, opo ajeshe je mu iteere.”

³² Sho j’uvu ejumuko rjaasi, jamue oja jora, nde jamue oja ti: “Otua ara tu ku uve iinima mbika uunarumue.”

³³ Paulus okua zi mo mokati kauo.

³⁴ Aarumentu jamue oja gama ku he, j’iteera. Mokati kauo omua ri uo Dionisius omuareopagi, nomukiintu gumue, edina rje Damaris, no jakuauo puamue na jo.