Iironga 16 - Etestemente Epe ✠ 1951

ONTOPORUA 16. Paulus ta hi kehuvico rjeehapu da Karunga orutijari puamue na Silas

¹ Okue ja uo ku Derbe no ku Listra. Moka omua ri omurongua, edina rje Timoteus, omuna guomukiintu omuhiteeri omujuda, ndere she okua ri omupagani.

² Aaronga jakuauo, mba ja ri mu Listra no mu Ikonium, oje mu popi naua.

³ Paulus okue mu ara a hende puamue na he. E mu kuca nde te mu fukareke moru’aajuda, mba ja ri miirando mbika, oshoka ajeshe okua je tshi tshi nokutja she omupagani.

⁴ Sho j’endagura iirando, oje ja rombuere, ja diginine iipango mbi ja arika kaapostoli no kaakuruntu jomu Jerusalem.

⁵ Omagongaro oga korekua mehiteero, omujaru guauo ogua koko keshe esiku.

⁶ Oja tokora Frigia, ja piti mu Galatia, oshoka ja kererua k’Ombepo Ondjapuki okuuvica ohapu ha Karunga mu Asia.

⁷ Sho j’ende ruo ku Misia, oja kembadara uo okuha ku Bitinia. Ndere Ombepo ha Jesus inahi ja pitikira.

⁸ Ndere sho ja pitirire Misia, oje ja ku Troas.

⁹ Huno Paulus a mono emoniko uusiku: Omurumentu omumakedonia a cikama he te mu indire ta ti: “Tokora, ngueje u je ku Makedonia, u je u tu kuace.”

¹⁰ Sho a mono emoniko ndika, sse otua kongo ompito hokuha nzija ku Makedonia, oshoka kapua ri ue omarimbiriro nokutja Karunga okue tu icanene ko sse tu ke ja uvicire evangelium.

¹¹ Otua rondo etembameja, tua zi mu Troas, tua ukirira ruo ku Samotrake, nde tue ja ku Neapolis esiku rja nofu.

¹² Okuza mpoka otue ja ku Filippi, otshirando otshinene tsho tshotango motshitoporua shika tsha Makedonia, sho otshitembukirua tshaaroma. Motshirando shika sse tua ningi mo omasiku gamue, tua kundacana naantu.

¹³ Mesiku rjesabati otua piti potsheero tshotshirando, nde tua hi komuronga. Eshara rjokugarikana orja fa rja ri po. Otua kaatumba, sse tua popja naakiintu, mba ja gongarere.

¹⁴ Omukiintu gumue, edina rje Lidia, omutshingici gueenguuo eentirigane a zi ku Tiatira, h’onakutirakarunga, okua puakene. Karunga oku’egurura omuenjo gue, he a diginine doka da rombuerua ku Paulus.

¹⁵ Sho a tshatshua, he muene puamue najeshe jomondjugo he oku’indire ta ti: “Nge tamu tengenekendje ng’omudiginini gua Muene, ireni nduno mondjugo handje, ne mu kare mo.” Okue tu ciminike.

¹⁶ Nde pua ningi, sho tua hi keshara rjomagarikano, omupija omukadona okue tu tshakaneke, ngu a ri nombepo hokushunganeka. H’okua rongere oojene je eriko enene nokushunganeka kue.

¹⁷ He okua ramba Paulus nasse uo, t’igida ta ti: “Aantu mboka ojo aapija ja Karunga guomombandabanda, nde otaje mu uvicire ondjira hehupico.”

¹⁸ Shino okue tshi ningi omasiku ogendji. Ndere Paulus okue tshi kenjanana, ta punguruka nde ta rombuere ombepo: “Otii ku rombuere medina rja Jesus Kristus, u ze mo mu he.” Ho ha zi mo mostunde tuu ndjika.

¹⁹ Ndere oojene, sho ja mono nokutja etegerero rjeriko rjauo rja za mo, oja kuata Paulus na Silas, je ja fara kotshirandero, komarenga.

²⁰ Taje ja tura miipaci jaapanguri ja ti: “Aantu mboka otaa pijaganica otshirando tshetu, jo aajuda.

²¹ Otaa huvica eemkaro di kadi vura okutuumbua kusse noku di orera, oshoka sse aaroma.”

²² Nena aantu oje ja sire ondjashi. Aapangeri oja tuurica eenguuo dauo, jo taa dengua niitago.

²³ Sho je ja denge omadengo ogendji, oje j’umbire mondrongo, nde taa rombuere omurangeri guondrongo, e ja rangere naua.

²⁴ Ngoka, sho a rombuerua ngaano, okue j’edirira mo mondrongo homenimeni, nde he te ja tura meti.

²⁵ Ndere pokati kuusiku Paulus na Silas oja garikana, j’amberera Karunga. Aakuatua ajeshe oje j’uvu.

²⁶ Naanzija ekekamo edigu rjevi orja tukuruka, rja kekamica eemkanka dondrongo. Opo mpoka iijeero ajishe j’eguruka, nd’omapando gajeshe ga dituruka.

²⁷ Omurangeri guondrongo, sho a papuduka, nde ta mono iijeero jondrongo j’eguruka, okua pueja mo egongamuere nokua ara okuidipaga, oshoka a ri e tshi nokutja aakuatua oj’ijaka mo.

²⁸ Nena Paulus oku’igida muure a ti: “Ino iningira uuhineji! Sse atushe omo tu ri.”

²⁹ He oku’indire omuriro nokua hi mo. He ta kekama unene, t’ishata po keempadi da Paulus no da Silas.

³⁰ Ote ja fara pondje he ta ti: “Oojene, ondi nokuninga tshee ndi upicue?”

³¹ Jo ja ti: “Iteera Muene Jesus, oto ka upicua, ngueje muene, nondjugo hohe ahishe.”

³² Oje mu rombuera ohapu ha Muene no ku ajeshe mba ja ri mondjugo he.

³³ Te ja kuca mostunde ndjika huusiku, nde te ja kosho omadidimika guauo. Ongashi nduno a tshatshua puamue najeshe jomondjugo he.

³⁴ Nde sho e ja farere mondjugo he, okue j’etere iikurja nde ta njanjukirua he muene najeshe jomondjugo he, sho ja ningi aahiteeri ja Karunga.

³⁵ Sho kua tshi, aapangeri jotshirando oja tumu aajakuri jetokoro neehapu di: “Aantu mbejaka j’eca.”

³⁶ Omurangeri guondrongo okua rombuere Paulus eehapu di: “Aapangeri jotshirando oja tumu eraka mu eciue. Zeni mo ano ne mu k’ende nombiri.”

³⁷ Ndere Paulus okue ja rombuere a ti: “Porueera mpa tua dengua niitago, tu’edirirua mondrongo, sse jene inatu purua tsha, nanto osse aaroma. Ndere nena oja ara oku tu rareka ofuci. Aaue, oojene naa je.”

³⁸ Ojo naje tu piice mo. “Aajakuri jetokoro oj’okororere aapangeri jotshirando eehapu dika. Ongashi ja tira unene, sho j’uvu nokutja mboka aaroma.

³⁹ Opo je ja, taa popi eehapu dombiri. Oje ja piica mo noku ja indira ja ze mo motshirando.

⁴⁰ Ongashi ja zi mo mondrongo taa hi ku Lidia. Ja tarera po aamuahina aarongua, jo je ja ekererica, nde taa hi.