Iironga 15 - Etestemente Epe ✠ 1951

ONTOPORUA 15. Otshigongi tshaapostoli mu Jerusalem.

¹ Jamue ja zi mu Judea, je ja huka, ja ronga jakuauo: “Ne nge itamu ka fukarekua komukaro gua Moses, itamu k’upicua.”

² Paulus na Barnabas oja patacana na jo uneenene. Ongashi j’uvacana nokutja Paulus na Barnabas na jamue jomaakuauo uo mokati kauo naa he kaapostoli no kaakuruntu jomu Jerusalem moru’eembata do.

³ Ngija ja cindikirua kegongaro otshikako tshimue tshondjira, oja pitire mu Foinikia na Samaria, j’okorora ehidirururo rjaapagani jo ja njanjuda jakuauo enjanju enene.

⁴ Sho ja ciki ku Jerusalem, oja tuumbua kegongaro no kaakuruntu. Taa hokorora iironga mbjoka iinene, Karunga e ja rongica.

⁵ Nena jamue jomotshimpaga tshaafarisai, mba kua ja ninga aahiteeri, oja cikama ja ti: “Mboka oje nokufukarekua. Oje na uo okurombuerua ja guanice ompango ha Moses.”

⁶ Opo nduno aapostoli naakuruntu ja gongara, ja konakone ohapu ndjika.

⁷ Ndere sho pua popiua eehapu odindji diiri no diiri, Petrus okua cikama nokua ti: “Jarumentu jamuameme, omu tshi nokutja monare Karunga oku’ogorora mokati ketu okana kandje ndi uvicire aapagani evangelium, opo jo uo ja ninge aahiteeri.

⁸ Karunga ngu a tshiua eemtima okue ja popira, sho e ja pa Ombepo Ondjapuki uo nga sse.

⁹ He ina joorora mokati ketu na jo. Okua jereka eemuenjo dauo nehiteero.

¹⁰ Ano nduno otshike amu shindi Karunga sho mua ara okutsika kekoci rjaarongua ondjoko ndji ha njengere uo ootate nasse?

¹¹ Aaue, sse otu’iteera nokutja tatu ka upicua kesiroshenda rja Muene guetu Jesus Kristus ngashi uo jo.”

¹² Nena otshigongi atshishe otsha muena Ja puakena Barnabas na Paulus mba j’okorora omadidiriko omanene niironga iinjengandunge mbi Karunga e ja rongica mokati kaapagani.

¹³ Sho ja muena, Jakobus okua cikama nokua ti: “Jarumentu jamuameme, uveni eehapu dandje!

¹⁴ Simon oku’okorora ngashi Karunga a tarera po aapagani noshenda he ruotango, jo ja ninge otshiguana tshedina rje.

¹⁵ Eehapu daaprofeti oda tsa pu tsho, oshoka opua tshangua:

¹⁶ “Okuza ku mbjoka ngaje otandi ka garuka ndi tungurure odjugo ha David, ndji ha kumuka po. Atshishe tsha teka mu ho, otii tshi tungurura, ngaje tandi ke hi dikurura.

¹⁷ Opo aantu jakuauo ajeshe ja konge Muene, niiguana ajishe ja rukirue edina rjandje. Otsho Muene ta popi, ngu te tshi ningi.

¹⁸ Muene oku tshi otshironga tshe okuza keshimbiko.’

¹⁹ Ano nduno ngaje ndi tshi inatsh’opara kumonic’aapagani mba j’idirurura ku Karunga, uudigu.

²⁰ Aaue, jo ja tshangerue nokutja naj’ikerere konigi hiimenka, komahondero, konjama ha sotshipuininika no kombinzi.

²¹ Okuza komacimbo gonare, Moses okua kara e naahuvici je miirando ajishe, mu tamu uvicirua eehapu de meesinagoga, nge tadi leshua mesabati keshe.”

²² Nena aapostoli naakuruntu notshigongi atshishe oj’uvacanene, ja ogorore mokati kauo aarumentu, jo je ja tume ku Antiokia puamue na Paulus na Barnabas. Ojo mboka: Judas guedina rjoponto Barsabas na Silas. Mboka ojo aarumentu je nosima mokati kaarongua.

²³ Oja peua eentumuafo di da tshangua ngii: “Osse aapostoli ss’aakuruntu aamuanjoko, ss’oojakueni, otatu kundu ajeshe jomu Antiokia, jomu Siria jomu Kilikia, naakuetu ajeshe jomaapagani!

²⁴ Otue tsh’uva nokutja jamue mokati ketu, mba inaa rombuerua tsha kusse, oje mu rimbirika neehapu, ja vundakanica eemuenjo deni.

²⁵ Ndere sse sho tua ri tua gongara, otua uvacana okuogorora aarumentu, tu ja tume kune puamue naahorike jetu Barnabas na Paulus.

²⁶ Jo aarumentu mba ja gandjera edina rja Muene guetu Jesus Kristus eemuenjo dauo.

²⁷ Otsho otua tuma Judas na Silas, mba taje mu tshiuicire nomakana iinima mbjoka.

²⁸ Oshoka otsh’oparere Ombepo Ondjapuki nasse uo, ne kamu umbate uudigu uiiri. Mbika oj’ike kaji diniua.

²⁹ Ne mu itshirike iinima ja saagererua iimenka, ombinzi nonjama ha sotshipuininika noruhondero. Nge tamu ikerere iinima mbika, omua guana. Kareni naua!”

³⁰ Mboka nduno oja rarekua. Ja hi ku Antiokia. Ndere egongaro arishe, sho rja gongara, jo oja gandja ontumuafo.

³¹ Sho je hi ja leshere, oja njanjukirua ehekererico ndika.

³² Ndere Judas na Silas, jo jene oja ri aaprofeti, oj’ekererica aarongua jakuauo neehapu odindji, jo je ja koreka momuenjo.

³³ Sho ja ningi omasiku gamue, oja rarekua kaarongua jakuauo nomakundo gombiri, ja tshune ku mboka je ja tuma.

³⁴ Silas okua arere okukara po. Judas ohiike a tshuna ku Jerusalem.

³⁵ Paulus na Barnabas oja menekere mu Antiokia. Oja ronga jo ja okorora puamue na jarue ojendji ekundano ehanaua rjohapu ha Muene.

³⁶ Omasiku gamue sho ga piti, Paulus okua rombuere Barnabas: “Tu heni tu he kiirando ajishe mu tua uvicire ohapu ha Muene, tu tare aakuetu nokuuharera kuauo.”

³⁷ Nena Barnabas okua ara uo okukuca Johannes guedina rjoponto Markus, ja he na he.

³⁸ Ndere Paulus okue mu indire nokudiradira nokutja inatsh’oparere okuha puamue na ngu a topokere na jo mu Pamfilia, a tinda okukara puamue na jo motshironga.

³⁹ Sho inaj’iteeracana, oja topokacana. Barnabas okua kuca Markus, a ronda etembameja, nde ta hi ku Kipro.

⁴⁰ Paulus oku’ogorora Silas nde ta toor’erira. Aamuahina oje mu tura mesiroshenda rja Muene.

⁴¹ Taa pitire mu Siria no mu Kilikia nokukoreka omagongaro. E ja rombuera ja diginine iipango jaapostoli no jaakuruntu.