Iironga 14 - Etestemente Epe ✠ 1951

ONTOPORUA 14. Iironga ja Paulus na Barnabas mu Ikonium Listra na Derba. Otaa tshuna ku Antiokia.

¹ Otsho no motshirando Ikonium oja hi mosinagoga haajuda, nde j’uvica. Ongundu onene haajuda no haapagani oh’iteere.

² Ndere aajuda, mba inaa hiteera oja tsitsimike aapagani, je ja tsic’ondumbo naarongua.

³ Omasiku ogendji oja kara mo manka. J’uvica nuufure nokuinekera Muene ngu a koreka eehapu doshenda he nomadidiriko niironga iinjengandunge, mbi a ronga nomake gauo.

⁴ Nena aantu jomotshirando oja topokacana. Jamue oja gama kaajuda, jamue itshee ja gama kaapostoli.

⁵ Ndere aapagani naajuda puamue naakuruntu jauo, sho ja arere tshiri oku j’epeka noku ja dipaga nomamanja,

⁶ oje tshi dimburura nde taa h’onda po kiirando mbjoka joku Likaonia, nokutja oku Listra na Derbe, no keemkunda dehero rja jo.

⁷ Oj’uvica ko evangelium.

⁸ Mu Listra okua mua kaatumba omurumentu, a ri ke neenkondo momaguru, h’otsirema hera a varua, ina enda sigo okesiku ndio.

⁹ Ohe nduno okua puakene keehapu da Paulus, ngu e mu deng’omesho nokua dimburura mu he ehiteero rjokuerudua.

¹⁰ E mu rombuera neui rjopombanda a ti: “Cikama, ihuca momaguru gohe”. He okua cikama omucika, nde t’ende.

¹¹ Ndere aantu sho ja mona shoka Paulus a ninga, oj’igida muure ja popi meraka rjaalikaonia: “Ookarunga morupe ruaantu ja kurukira kusse!”

¹² Ongashi ja ruku Barnabas Jupiter. Paulus oje mu ruku Merkurius, oshoka a popi.

¹³ Nena omupristeri gua Jupiter ngu a ri keesha dotshirando oku’eta kotsheero eendumetana neengara di da dingirua kumue, nde ta ara oku ja fikira omagano puamue nongundu haantu.

¹⁴ Aapostoli Barnabas na Paulus sho je tshi uvu, oja tuura eenguuo dauo, nde taa matukire mokati kaantu, j’igida:

¹⁵ Ja ti: “Jarumentu ne, otshike tamu ningi ngaano? Otatu mu uvicire, ne mu idirurure kiinima mbi kaji notshironga, ne mu je ku Karunga omunamuenjo, ngu a tshita eguru nevi nefuta natshishe tshomurjo.

¹⁶ Monare oku’eca iiguana ajishe, j’ende eendjira dauo jene.

¹⁷ Ndere ka kara ouara ina oroka, oshoka okua gandja uuhanaua mbu ua zi meguru. A gandja ovura nomacimbo gerooro, nde t’uda eemuenjo detu iikurja nenjanju.”

¹⁸ Sho ja popi eehapu da tja ngaaka, konjara okua ja njengua okukerera aantu kaa ja fikire omagano.

¹⁹ Ndere aajuda jamue ja zi ku Antiokia no ku Ikonium. Oja tsitsimike aantu. Nena oj’umba Paulus omamanja je mu kokorora mo motshirando, ja ri je tshi a sa nare.

²⁰ Aarongua oje mu kondeke. Nena okua cikama nde ta hi motshirando. Mesiku rja nofu okua hi na Barnabas ku Derbe.

²¹ Motshirando shono, sho kua j’uvica evangelium, jo kua ja ronga ojendji, oja tshuna ku Listra no ku Ikonium no ku Antiokia.

²² Taa tsu omukumo eemuenjo daarongua, jo je ja kumagida ja diginine ehiteero, je ja dimburuca nokutja mondjira ndji tahi uka ku Karunga omu nuudigu oundji.

²³ Nomagarikano no nokuidirika iikurja oja turira aakuruntu momagongaro. Je ja gandja ku Muene, ngu je mu iteera.

²⁴ Oja tokora Pisidia je ja ku Pamfilia.

²⁵ Oj’uvica ohapu ha Muene mu Perge, jo taa hi ku Attalia.

²⁶ Hu ja ronda etembameja, nde taa hi ku Antiokia, okuza hoka kua ja perue oshenda ha Karunga, ja ronge otshironga shi ja guanica nena.

²⁷ Sho ja ciki ko nde taa gongere egongaro, oj’okorora iironga iinene mbi Karunga a ronga na jo, ongashi a hegururira aapagani otsheero tshehiteero.

²⁸ Oja menekera paarongua omasiku ogendji.