Iironga 13 - Etestemente Epe ✠ 1951

ONTOPORUA 13. Okuha kuotango guomuapostoli Paulus a huvicire aantu eehapu da Karunga

¹ Meklesia rjomu Antiokia omua ri aaprofeti naahongi. Mokati kauo mua ri Barnabas, Simon, ngu kua a rukua Niger, Lutsius omukireni, Manahen, ngu a putudirue puamue na Herodes omureri guotshitine, na Saulus.

² Mboka manka ja karere Karunga muukarere uujapuki oj’idirike iikurja, nena Ombepo Ondjapuki ahi ti ku jo: “Joororeriindje Saulus na Barnabas, ja ka ronge otshironga, shi nde ja ogororera”.

³ Opo ja zi okuidirika iikurja nokugarikana, je ja tenteke omake nde jo je ja rareke.

⁴ Mboka ng’aatumua j’Ombepo Ondjapuki oja hi ku Seleukia. Okuza hoka taa rondo okatembameja, ja hi ku Kipro.

⁵ Sho ja ciki ku Salamis, oj’uvica eehapu da Karunga meesinagoga daajuda. Johannes okua ri uo pu jo, omukuaci guauo.

⁶ Nde sho j’endagura otshitengedera atshishe sigo oku Pafus, oj’itsu omurumentu gumue, h’ompure, omuprofeti guiirombo, ngu a ri omujuda, edina rje Barjesu.

⁷ Ngoka a ri perenga Sergius Paulus, omurumentu omunandunge. He t’icana Barnabas na Saulus ku he, a harere okuuva eehapu da Karunga.

⁸ Ndere Elimas nokutja ompure, otsho edina rje rja fatururua, okua rudike na jo, nde ta kembadara okukerera erenga kehiteero.

⁹ Ndere Saulus ngu a rukirue uo Paulus, oku’uda Ombepo Ondjapuki, te mu deng’omesho.

¹⁰ He ta ti: “Mentu ngueje, u’uda iiherere nuumbudi aushe, ngueje omuna guomusatana, ngu omutondi gu’uujuki aushe, ito ka zimbuka okugojokica eendjira d’uka da Muene?”

¹¹ Nena, tara, eke rja Muene otari ku denge, oto ka tsika, ito ka mona ue etango omasiku gamue. “Naanzija okua siikirua keemrema eemcokocoko. T’endagura, ta kongo gumue ngu te mu kuata keke.”

¹² Erenga sho rja mona shoka tsha ningua po, orj’iteera rja rurirua kerongo rja Muene.

¹³ Paulus naakuaci je oja ronda etembameja, ja zi ku Pafus, nde taa hi ku Perge mu Pamfilia. Ndere Johannes okua topoka na jo, nde ta tshuna ku Jerusalem.

¹⁴ Okuza ku Perge oje ja ku Antiokia mu Pisidia. Taa hi mosinagoga mesiku rjesabati, nde ja kaatumba.

¹⁵ Sho pua leshua eehapu domompango no domaaprofeti, aakuruntu josinagoga oja tumu ku jo, ja ti: “Jarumentu ne aamuameme, nge omu neehapu dokukumagida aantu, popjeni nduno.”

¹⁶ Nena Paulus okua cikama, okue j’anda ja muene nde ta ti: “Jarumentu aaisraeli, nane uo jarue, mba mua tira Karunga, puakeneni!

¹⁷ Karunga kotshiguana tsh’Israel oku’ogorora ootate, he ta tanica otshiguana ngija ja ri aakuiirongo motshirongo tsh’Egipti, nokue ja piica mo nokuoko kue kua tanganana.

¹⁸ Erara ri cike peemvo eemrongo ine oku’ididimikire eemkaro dauo mombuga.

¹⁹ Ta shanagura iiguana unuuari motshirongo tsha Kanaan. Otshirongo tshauo te tshi ja topororere, te j’umbire otshihogororico.

²⁰ Shoka tsha ningua eemvo di cike pomacere gane neemvo eemrongo ntano sho da pita. Okuza hoka te ja pe aapanguri sigo okomuprofeti Samuel.

²¹ Nena oja arere omukuaniirua. Nde Karunga te ja pe Saul, omuna gua Kis, omurumentu guomezimo rja Benjamin. A pangera eemvo eemrongo ine.

²² Sho e mu kuca po, okue ja ogororere David omukuaniirua ngu e mu okorora a ti: Onda dimburura David, omuna gua Isai, ng’omurumentu guokomuenjo guandje. Ohe ta ka guanica eharo rjandje arishe.

²³ Moruvaro rue omua zi omukuriri Jesus, ngashi Karunga e tshi rombuere Israel.

²⁴ Manka he in’oroka miipaci jaantu, Johannes oku’uvicire otshiguana atshishe tsh’Israel etshatsho rjehidirururo.

²⁵ Ndere sho a shurica eendjenda de okua ti: “Kandi shi ngoka tamu erekendje na he. Ndere tara, ote ja ta randurandje. Ngaje inandi opara ndi diture eengaku dokeempadi de.”

²⁶ Jarumentu! jamuameme, ne jaana jomoruvaro rua Ambraham, na ne jarue, mba mua tira Karunga, one mua tuminua ohapu hehupico ndika.

²⁷ Aantu jomu Jerusalem naakuruntu jauo inaje mu dimburura. Ndere sho je mu pangura oja guanica eehapu di adi leshua keshe esabati.

²⁸ Nanto inaa mona mu he ondjo hokusa, oj’indira Pilatus, a dipague.

²⁹ Sho ja rongo atshishe sho tsha tshangerua, oje mu kuca komuti, jo taje mu rangeke mombira.

³⁰ Karunga okue mu jumuda kuusi esiku etitatu.

³¹ Omasiku ogendji t’ihororere mboka ja zire puamue na he ku Galilea, ja hi ku Jerusalem. Nanena ojo mboka eentari jo aahokorori je mokati kotshiguana.

³² Nasse otatu mu uvicire omarombuerero, nga ga gandjua kootate.

³³ Nga Karunga e tu guanicira ng’ojana, sho a jumuda Jesus, ngashi tsha tshangua uo mepsalmi etijari: ‘Ongueje omumuandje. Onena tuu ndjika onde ku vara.’

³⁴ Ndere okue mu jumuda kuusi, opo ka tshune ue mehoro. Sho e tshi tja otshingaa: ‘Onda ara ndi mu pe omasiroshenda omajapuki garushe ga David.’

³⁵ Ongashi ta popi uo peshara rirue: ‘Omujapuki guohe ito mu monica ehoro.’

³⁶ Oshoka David, sho kua a karera eharo rja Karunga pecimbo rje, okua si. He ta gongerua pookuku, nokua mona ehoro.

³⁷ Ndere nguno okua jumudua kuusi ku Karunga, he ina mona ehoro.

³⁸ Ongashi ano jarumentu jamuameme, kareni mu tshi tshi naua, morua nguka otamu uvicirua edimopo rjeendjo no miinima ajishe mbi mua njengerue okuucua aajuki kompango ha Moses.

³⁹ Omu he ta ningi omujuki keshe ngu a hiteera.

⁴⁰ Ano nduno, kotokeni, kamu adikue ku mbjoka ja popiua meehapu daaprofeti:

⁴¹ ‘Tareni ne jadini, mu rurirue ne mu jonuke po, oshoka ngaje ote rongo otshironga momasiku geni, eno, otshironga nge tamu tshi okororerua, itamu tshi iteere’.”

⁴² Ano, sho ja zi mo, oj’indirua okuuvica eehapu doka nomesabati rja nofu.

⁴³ Otshigongi tshomosinagoga, sho tsha rarekua, aajuda ojendji na mboka jarue, mba ja tira Karunga, oja randura Paulus na Barnabas. Mboka oje ja kumagida nokudiginina, ja kare moshenda ha Karunga.

⁴⁴ Ndere esabati ndijaka rja nofu, konjara otshirando atshishe omo kua tsha gongara okuuva eehapu da Karunga.

⁴⁵ Nena aajuda, sho ja mono eengundu daantu, oja kuatua kuukodi, ja patana Paulus sho a popi, jo taa tsheke.

⁴⁶ Opo ja zi Paulus na Barnabas okupopja nuufure: “Ne omua ri mu nokuuvicirua tangotango ohapu ha Karunga. Ndere nena, sho mue hi kandura po, ne jene mu’itara kutja inamu oparera omuenjo guarushe. Tareni ano, ss’otatu pungurukire kaapagani.

⁴⁷ Oshoka otsho ngii Muene e tu rombuera: Onde ku tura po uujerere uaapagani, u ninge ehupico sigo okongamba hevi.”

⁴⁸ Aapagani, sho je tsh’uvu, oja njanjukua, jo ja simaneka ohapu ha Muene. Najeshe mba j’ucirua omuenjo guarushe, oj’iteera.

⁴⁹ Nohapu ha Karunga oha taandera motshirongo shika atshishe.

⁵⁰ Ndere aajuda oja tsitsimika aakiintu aanamadina noonakutirakarunga, naakuruntu jotshirando. Oja tukurire Paulus na Barnabas etidaguro, noku ja tida mo motshirongo tshauo.

⁵¹ Jo oje ja pupurire ontsi hokeempadi dauo, nde taa hi ku Ikonium.

⁵² Ndere aarongua oja ri j’uda enjanju n’Ombepo Ondjapuki.